Lukka 20 - Bibliyeeda Ghaydit

Geanyaash Yesu heeda nyasa gheambalmeadaanyi

¹ Eaweecha nea ghoanaal buuneeda aba jeeda gheeda sibata ASEETEAN, nea gwarukwiida giijaasta miy, gaweay headaanyi ashoohoodiga hees ea ng'oorshoodiga ea gweargwa

² ak geeyeesha niny, “Rukuneasa gisini ng'asheesu aba gheambalmeedeabeang'a, ea ng'eaha gil siida goonyi gheambalmeani.”

³ Ghwasha saawa nea gwayeesha, “Eara aniini gaydaanyaasheagwa ng'asheanjagi, asi arukunean,

⁴ Ghayi giibaatiisanda Yohana gwaleabu humng'eeda ghana leabu heeda buuneeda?”

⁵ Hean gabiissa gwasheang'nyi nea gwayi, “Ghamneawa iisiyeeshi, ‘Gwaleabu humng'eeda,’ gaygwayi, ‘Ghwasaan anda ghayi ak ea moamwasi niny?’

⁶ Ama siyeeshi, ‘Gwaleabu heeda buuneeda,’ ada gaygafuteasa buuneesean aba lagheanga aba gideaba ghamwas sean gideaba Yohana sibaneeda.”

⁷ Hean ghwasha Saawa nea gwayeesha aseasa meanali heeleabu.

⁸ Gwayeesha Yesu saawa, “Eara aniini ea maydarukuneegwa heeda leabu giimbaliischooni iteanyu easini ng'asheesuun.”

Gida sigala fuga aragan madamnyeanda sabiibu

⁹ Hean ghoang'eat giibaloolda buuneeda nea gwarukusa galeesu, “Ghayi sih gang'eapsa sabiibu jeeda madamnyeandaanyi, hean gwanung'usa madamnyeandaanyi fuga jea gooragan, ak gawa darooraka sheagi, goobiida hoowa ea gageawiit.

¹⁰ Goodeendeen ama gul damandida, goojeakta soomjeanda heeda fuga aragan madamnyeandean eataw haghweega mwaatkwa bea sabiibu; ng'ata ghabwar fugiga aragan madamnyeandean ak geanung' gawa nea mwaada gil.

¹¹ Iidu goojeakta siidida soomjeanda nuut; hita earada geabwar ea eesawan ak geenung' gawa nea ghabwaspwasaada nea mwaada gil.

¹² Iidu goojeakta siideaba samwagu; ada geabwar ea gwasawana ak geahoan gawa jarooda.

¹³ Gwayi siidida bea madamnyeanda misabiibuun, ‘Gay dasin naaha? Gaydeajeakta orjeedeanyu aabwariinyi; gwadeepa eesisa mureeda.’

¹⁴ Daah fugiga aragan madamnyeandean, gwayeesha geat saawa, ‘Siisi dea jea gwahearaniischi, anung' eabwara ghami ak gabwaaheasa hearaniischooda.’

¹⁵ Hean geang'waay orjeedida bea siidean ak geeruuteawa jeeda madamnyeanda sabiibu ak geenuus. Asi heapi siisi bea madamnyeandean iihidu gaygwahindaan fiisu?

¹⁶ Adaaha gayghoan ama hidu gaygwanuuseada fugiga aragan madamnyeandanyiin ama hit gaygagasa fih suuk jea gwanung'usa madamnyeandaanyi.” Siyiiy ng'asheesu geeyi, “Gagasa ghoashiiy ASEETA!”

¹⁷ Hean ghoaduup ghaang' saawa, ak gwayeesha, “Abeeda ng'asheesu sing'waardunu naaha bea gideaba: ‘Lagheaneeni aneawa ghaang' fuga deekshi nea meanung' ghoah giliin niiw lagheaneeda haw washiin’?

¹⁸ Nea siida jea goobeedeaysa lagheaneeni gaygagiishachi, nea siida was sean ng'adeesa lagheaneeni gay ghang'aal.”

Giinyeashteayda giruteayda gwaadi

¹⁹ Muchu gagasa ng'oorshoodiga ea ashoohoodiga hees gichea ghoang'waayda aba damandida, ak ghoawal buuneeda; aba gideaba saawa nijeeng'u gideaba ng'asheesu sigala geadiin geerukuna badahuuka nyaawa.

²⁰ Inyeesa geasaach niny nea geegasa gheata miy ak geecheakta fuga hinda geat fuga doobiiweadi, eanyas gheata gichea eaghasta aba ng'asheesu ikaaschiin, ak geayiin geatinga sugoocheanda haw ahaaghwa ng'eanyiida.

²¹ Geanyaash niny nea geeyeesha, “Giinealshoocheanda, geanali gideaba giruku ng'asheega nea giidoabiiwi, nea miduupi siisi haw, ang'iing'i giinaali buuneeda naweeda ASEETA doabiiwaat.

²² Heapi, ghwadoabiiwi gideaba geataw Gaysari gwaadi, ghana manda?”

²³ Gwajeeng'u milmilanda nyaawa ak gwayeesha,

²⁴ “Oahiimnaan shiliingajeanda. Uhuuni ea gheawung'su gabeang'a?” Geeyeesha, “Gaba Gaysari.”

²⁵ Gwayeesha saawa, “Asaha ghoatawji Gaysari gea Gaysari, ak ghoatawji ASEETA gea was gea ASEETA.”

²⁶ Hean gearaay gichea eang'waayda aba ng'asheagaaschi aba madeeda buuneeda; ghahamng'eanyi buuneeda aba gida shaayda ng'asheega ak ghwasiinda sean.

Giinyaashteayda duunooda miyeeda

²⁷ Iidu ghapka headaanyi fiisu ng'ay was Sadukayajeega eena manda duunooda,

²⁸ Hean geanyaash nea geeyeesha, “Giinealshoocheanda, Musa ghayi gang'oorneasa gideaba siida iimea orjeeda ghaamwat, nea gwandeawa gatmooda mandeawana diibiga, gaygageanda orjeeda ghaamwat gatmoodida ak gwanyaksa diibiga orjeeda ghaamwat.

²⁹ Ghayi gwanda orju ispwa bea ghaamwadagi, gageeshi orjeeda haw, amadu ghami nea ghwanung'wa hiji gatmooda mandeawana diibiga;

³⁰ ea deaba iyeenya

³¹ gea deaba samwagu, iidu gwahearan orjoogiga seaniin asispwaan nea gameewa agi ea goosha sean nea gatmoodida ea mandeawana diibiga.

³² Iidu eara gatmoodida ghami.

³³ Heapi eaweeda siituuna buuneeda gatmooni gaygaba ng'eaha? Aba gideaba nighi buuneeda ea ghwahita ispwa.”

³⁴ Gwayeesha Yesu saawa, “Orjoogeaba ng'eanyiini gageeshachi, nea geegeena;

³⁵ nea fugiga sinung' ghoah gili miisa ng'eanyiita bea hooweaniin nea duunoodida bea miyeedean mageeshachi nea meegeena,

³⁶ ea maygabiikta gameewa aba gideaba gaygawuurji malaykajeega, ak saawa ea orjooga ASEETA gil ea gideaba saawa orjooga siituutu.

³⁷ Aba iita gideaba gwaduutu buuneeda, eara Musa ghoahiimu aba jeeda ng'ooruutka iita geeta mughuush damanda guursiina Ng'utamiida was ASEETA Abrahamu ea ASEETA Isaka ea ASEETA Yakobo.

³⁸ Asi ghamneawa niny mii ASEETA fuga nimeewa gil, aba gideaba ghwanyas sean eaweega aba niny.”

³⁹ Ghwasha ng'oorshoodiga mwaatkwa nea geeyeesha, “Giinealshoocheanda, aba hiji girgu huumwa.”

⁴⁰ Ea mudu gwanda siida ammu gabadaksa ghoanyaash ng'asheanda.

Giinyeashteayda iita Gristo

⁴¹ Ng'ata gwayeesha saawa, “Gaygwayeendaan saawa gideaba Gristo orjeeda Dawdihi?.

⁴² Aba gideaba gwayi Dawdi aba jeeda gitaabooda nyiigheega, ‘Ng'utamiida gwayeesha Ng'utamiideanyu, Apteada aba geatindeanyu bea dugwa,

⁴³ ea danung' ghoah weajoodigaagu hoorgeeda jea iina geeshangaagu.’

⁴⁴ Abeeda Dawdi iiguura niny Ng'utamiida ghoawdaan orjeedaanyi?”

Yesu gwayeesha buuneeda ashageada ng'oorshoodiga deaweeda

⁴⁵ Hean nea gwayiing'shi buuneesean gwayeesha ginealangaaschi,

⁴⁶ “Ashageada ng'oorshoodiga, fuga bwariiy gwaleamideawa hang'weaka geawi bwariiy eeyeeniisa seayu aba naadajeega, ea hoorgajeega miyaasiin aba gealga siinealshacheewa, nea eara iiweay gealga ghweelmeeda ghwanyoahaada hoorgajeega madeeda,

⁴⁷ fuga inyeesa gweagiisachi aba gealga masiinung'weega nea aba giimiinoodeaba geat inyeesa ghamwaash ASEETA nea googeawiit. Asi gayghwanyas girgweaksiinda haw.”