Lukka 18 - Bibliyeeda Ghaydit

Gida sigala masiinung'weanda ea siida laja girgweaguutka

¹ Hean gwarukusa ng'asheega nea gagala geat nea gagasa gideaba gaygamiisa saawa mooshta ASEETA galeagasean nea mapura.

² Gwayeesha, “Aba jeemba mujiinajean gwanda Siisi laja girgweaguutka meawala ASEETA nea maduupa eara sih;

³ ak aba jeedeaba mujiineani gwanda Gatmooni was masiinung'weanda, wuna headaanyi galeaga sean nea gwayeeniisa, ‘Weadaan nung' danyas gidamiisean aba heeda weajoocheandeanyu.’

⁴ Ea goola gaheewachi, ama muchu gwayeesha geaw, ‘Eara ea meawali ASEETA ghana gheang'ba sihiin,

⁵ aba gideaba goodeawiidan masinung'weanji gaydaadaw gidagasa ea meabuurean aba hituunooda heedeanyu.’”

⁶ Hean gwayeesha Ng'utamiida, “Oaleaydiit ginyaashta Siidida mii doabiiwaat laja girgweaguutkean.

⁷ Gajeeyeena ASEETA mayghoadaw doobiiwnata fugaaschi loosageaw ayeawusa askweari ea eawa? Gayghwashing'da aba weeta nyaawa?

⁸ Geayeeshiineegwa, gayghwalamwach ghoadaw gidamiisa, nea Orjeeda Siida iihidu gayghwadaah masaweega aba jeeda ng'eanyiida?”

Gida sigala Farisaayajeanda ea siida ang'oonyi gwaadi

⁹ Iidu gwarukusa galeega fuga hinda geat gilidoobiiweadi nea gafool suurja.

¹⁰ “Ghayi gwanda headi iyeenya siyeang'da gaweay ghamwaash ASEETA aba jeeda gheeda sibata ASEETA, akaleala Farisaayajeanda gil nea niirja ea siida ang'oonyi gwaadi.

¹¹ Ghang'eat Farisaayajeanda ak ghamwaashtunu ASEETA aba jeadaanyi, ‘Ea ASEETA, geabadiischooweey aba gideaba aniini meawuurjeewani buuneeda suurja, fuga areedi buuneeda haleanjeeda, ea fuga miidoobiiweadi, ghana fuga mealuuli, nea meawuurjeewani eara siisi ang'oonyi gwaadiin.

¹² Aniini inyeesa gealuuldi geaw nibiyeenya aba jeemba eawooji ispwa, ak aba jeeda gilatamanamughuush bea haleanjeedeanyu, iissa ghaadaydi akaleala.’

¹³ Hean ghamiinaada siidida ang'oonyi gwaadiin nea dildeaweat nea eara gheanyangaaschi ea meageala humng'eeda, gagiisan nea gwayi, ‘ASEETA, bwaydanaan aniini geabea riing'a!’

¹⁴ Geayeeshiineegwa, ghwararang'aada siidida ang'oonyi gwaadiin gawa gheanyi nea siitaw doobiiwnata ea ghang'al niirja; aba gideaba siida nyooh goodiing'u geaw gajeahiing'u, nea dea hiing'u geaw gajeetiing'u.”

Yesu ghoadaw ghawooda diibiga manang'i

¹⁵ Hean geeyeassa diibiga ghoadaw ghawooda; daah giinealanga goowoowsa buuneeda.

¹⁶ Ng'ata gaguursa Yesu saawa nea gwayeesha, “Anung'waada diibiga ghapka heedeanyu adoakghuumnyi, aba gideaba gea uurji suh gammiisa sugoocheanduumeeda ASEETA.

¹⁷ Aba huumwa gearukuneegwa gideaba, siida mwadeaptaayda sugoocheanduumeeda ASEETA baleanda maygawa jeeda.”

Siida was meanang'ocheanda

¹⁸ Ghoanyaash siyagi ahaaghwa ng'eanyiida nea gwayeesha, “Giinealshoocheanda miy, gaydasin naaha iijeadanyas eaweega manda muudeanooda?”

¹⁹ Gwayeesha Yesu niny, “Ghwasaan anda giguureewean siida miy? Manda siida miy geaghus ASEETA ak ghwahit.

²⁰ Ginali digheanyeeka: ‘Adimealuuli, adinuusi siida, adijagwadiischi, adimuuwu ng'uyeega, gisisi mureeda gweanu ea geamadu.’”

²¹ Gwayeesha, “Ng'asheesu seaniin naang'waanyi ghang'eada jeepcheanduumeedeanyu.”

²² Iiy Yesu ng'asheesu gwayeesha niny, “Ghwashoadeeweey ng'asheanjagi. Shaayda haleanjeadaang'u indeawi sean ak gilakiisi fuga barbari, ak gaynyasa gheaseeda aba humng'eeda, ak guwuni eani geeshteanyu.”

²³ Iiy niny ng'asheanji gagiisan, aba gideaba eabaruur muuchi.

²⁴ Gang'ula Yesu niny ak gwayeesha, “Ea hang'waaydaan beata jea gaweay meanang'oodiga jeeda sugoocheanduumeeda ASEETA!

²⁵ Asi gajea wusis muuchi gideaba gaygwasik ngamiya seawadeeda sidageeda, maygawuurji beata jea gawa meanang'oocheanda jeeda sugoocheanduumeeda ASEETA.”

²⁶ Gwayi fugiga iiy nea gwarugu ng'asheanjiin, abeeda iisunu gwanda siida jea ghaghu?”

²⁷ Ng'ata gwayeesha, “Ng'asheega hang'oonyi aba heeda siida aba heeda ASEETA mii hang'waay.”

²⁸ Gwayeesha Betaro, “Ng'ula aseasa sinung'wi heeda gealgaasa ak geeyeatu geashtaang'u.”

²⁹ Hean gwayeesha saawa, “Aba huumwa geayeeshiineegwa, manda siida nung'wa heeda gheanyi, ghana gatmoadaanyi, ghana orjooga ghaamwat, ea fuga jiilu ghana diibiga aba sugoocheanduumeeda ASEETA,

³⁰ siisi mwanyasa gea saang'a aba damani bea ghamneawean nea iidu aba damandida jea ghwahiduun, gayghwanyas eaweega manda muudeanooda.”

Yesu gwarugu deaba samwagu iita miyeadaanyi

³¹ Ng'ata goobalool ginealangaaschi atamaniyeenya nea gwayeesha, “Ang'ula ghamneawa geescheang'di eeweaya Yerusalemu, ak ng'asheega sean ghayi ng'waar sibanga aba badayda Orjeeda Siida, gaygabiisa ghwahidu.

³² Aba gideaba gajeayiin geatinga eemoojiga ak gajeebara reari nea geeng'eawi nea geeng'uriisa ng'usheega;

³³ nea gajeabwara mughoowooda, ama ng'ata geenuus, amadu eaweeteaba samwagu gaygwaduudu.”

³⁴ Ea manda siicheeng'u ng'asheesu eara gidawas nea ng'asheanji ea sifunya saawa nea majeeng'na gisibaloola.

Yesu ghoahaap siida ng'oaw musiisachi

³⁵ Geeyi bwak ama riiksa Yesu Yeriko, gwanda siisi ng'oaw apteada aba gheata naweeda nea gamusiisachi;

³⁶ iidu nea ghwayiiy gidang'ataayda eemeeda ghoanyaashta gideaba Gwanda naaha hiji?

³⁷ Geeyeesha, “Ghang'ata Yesuheedida bea Nasaretiin.”

³⁸ Gabiissa goojuur nea gwayeesha, “Ea Yesu, Orjeeda Dawdi, eaniyean bwaydanaan!”

³⁹ Goojuursa fugiga asheedeawean nea geeyeesha, Siinda; sirukusa ghoaraanya giijuureanda muuchi nea gwayeesha, “Orjeeda Dawdi, eaniyean bwaydanaan!”

⁴⁰ Hean gawus Yesu ak ghwanung' eeyeadu headaanyi. Neekiissa siidida ghoanyaash Yesu nea gwayeesha;

⁴¹ “Gigasayi dasineey naaha?” Gwayeesha, “Ng'utamiida aniini geagasayi daang'wearda.”

⁴² Gwayeesha Yesu niny, “Nyasa giing'weerdeayda; niihaapnyi masaweagaagu.”

⁴³ Miighoah gil ghoang'wearda ak ghwaat geeshta nea ghoaghaambiit ASEETA; dea eemeeda ng'asheesu ghoaghaambiit ASEETA.