Lukka 14 - Bibliyeeda Ghaydit

Yesu ghoahaap siida miyaan

¹ Eaweecha nea gwanda sabaato gawa gweagiischi aba gheapa siyagi ambaliischi bea Farisaayajeega, hean geeng'ula niny.

² Asi ng'ula, gwanda madeeda siisi looloohani saseeda.

³ Goobalool Yesu diinagoodiga ea Farisaayajeega, nea gwayeesha, “Heapi ghwadoabiiwi gideaba gajeahaap siida eaweeda Sabaato, ghana manda?”

⁴ Hean geasiinda. Ghoang'waay siidida ak ghoahaap, ak gwasiksa gawa.

⁵ Ak gwayeesha saawa, “Gajea ng'eaha aba jeedeang'wa, jea ghoabita, orjeedaanyi ghana heeydaanyi jeeda healadeeda, eaweeda Sabaato jea ea maygabay gwalealu?”

⁶ Ea measha ng'asheanji.

Ng'eeninda ea inyeanda jeeda

⁷ Iidu gwarukusa Yesu buuneeda gidagala fuga siguush, iidaah gidiisa ghwaloata buuneeda hoorgajeegeaba mwadi, ak gwayeesha,

⁸ “Iiguurneey siida wassean nyeangiida, adiidu giipteadawi hoorgeeda madeeda, aba gideaba gwadeepa ea siguush siida siiwal gheang'da mawuurjeeweey;

⁹ ak ghwahidu siida guusheegwa ak gwayi, ‘Asiipta goopteada siisi aba hiji,’ abeeda gajuna apteadawana hoorgeedeaba bwadaw nea gibwaspwasaadi.

¹⁰ Asi iisiguushnyi, guwi ak giipteadi aba hoorgajeegeaba bwadaw, iihidu siida guurneey gaygwayi, ‘Siida eaduupcheewi beeni hiji bea mwadiin,’ abeeda gaynyasa mureeda aba madeeda buuneesean iimbuucheewi.

¹¹ Aba gideaba siisi nyooh goodiing'u geaw gajeahiing'u nea dea hiing'u geaw gajeetiing'u.”

¹² Ng'ata gwayeesha siidida guush ninyiin, “Iidaydi hamiteaba askweari ghana ghweelmeeda, adiguushi fuga iduupcheewi ghana orjooga geamadu ghana buweadeagaagu ghana giischeewdaang'u was meanang'oodiga, gajiidu gaguushnyi saawa gawalu guushtida ghayi itaang'uun.

¹³ Eaweeda isini ghweelmeeda aba gheang'u abeeda giguursi fuga barbari, ea gea ghanyeata ea gea badoojiga, ea gea ng'oowi,

¹⁴ abeeda gaynyasa ng'wanooda, aba gideaba fiisu mandeawana gichea gawalneey. Ak gaygawalneey ASEETA eaweeda duunooda fuga doobiiweadi.”

Gida sigala ghweelmeeda haw

¹⁵ Iiy Siyagi bea jeeda fuga ambuuchi gwayeesha, “Ghang'wana siida jea ghwaak mukaate aba jeeda sugoocheanduumeeda ASEETA!”

¹⁶ Ghwasha ak gwayeesha niny, “Siyagi ghayi gwasin ghweelmeeda haw, ak gaguush fuga saang'a;

¹⁷ hita damanda ghweelmeeda goojeakta soomjeanda gaguush rabastaanyi nea gwayeesha, ‘Abeeni aba gideaba haleanjeeda sean nihit.’

¹⁸ Hean ghabwar badooji sean. Ak gwayeesha dea madeeda siidida, ‘Naashaayi madamnyeanda ak gaydawa dadaah; geamuscheey samsean.’

¹⁹ Gwayi niirja, ‘Naashaayi heew damanamughuush bea barooda, ghamneawa geawi daanaal, geamuscheey samsean.’

²⁰ Gwayi niirja, ‘Naagheanyi gatmooda ak ea maydaamu dahidu.’

²¹ Iidu gawa soomjeanda ghoadaw siidaanyi haw iiteaba ng'asheesu seaniin. Ak ghwanyareas siida bea gheeda ak gwayeesha soomjeandaanyi, ‘Lamwaja una jeeda naweadinga hees ea gea manang'i bea mujiiniin, ak giyeadu fuga barbari ea gea ghanyeata ea gea badoojiga ea gea ng'oowi.’

²² Ak gwayeesha soomjeanda, ‘Siida mureeda, gida iijeakteawanean naahiichi ak gheeda ea miighwanyiit.’

²³ Hean gwayeesha Siidida hawiin soomjeanda, ‘Rita jarooda una guuyeeda naweadinga ea moonghajeega ak gidiing'si buuneeda ghapka gah ghwanyiit gheanyu.

²⁴ Aba gideaba geayeeshiineegwa, manda eara siyagi aba jeedeaba fugiga siguushiin dea jea gwasamu ghweelmeedeanyu.’”

Gidamiisa sinooda iijeahuuwa giinealaneeda

²⁵ Hean gaweay eemeeda nea goodeay niny; ak Ghwayam geaw ak gwayeesha,

²⁶ “Siida iihidu heedeanyu nea mwasida ghwaan ea ghaamwat ea gatmoadaanyi ea diibigaaschi ea orjooga ghaamwat ea haweega ghaamwat, nea ea mwasida eaweagaaschi moamu ghoah giinealaneedeanyu.

²⁷ Siida mwaada beehiidaanyi ak gweadu geeshteanyu, moamu ghoah giinealaneedeanyu.

²⁸ Heapi gajea ng'eaha aba agooga gasa ghwadeas gheeda haw siikeawiit, ak ea meapteada gwayiida nea goodeen haleanjeeda jea ghwadeakta ghwadaah ea jea gwadeay?

²⁹ Aba gideaba gajiidu gwasin sindeeta, ak ghwaraay ghoahiit, ak abeeda gwajuuga fugiga sean daahiin,

³⁰ nea geeyi, ‘Siisi ghoang'eat ghuuta deekshooda ak ghwaraay ghoahiit.’

³¹ Ghana gajea ana sugoochean gil jea iigasa gawa gang'uchi sea niirja, jea ea mayghanyi goopteada, ak gooteemshi ghwadaah ea ghoamu niny sea fih sagalamnyooji damanamughuush, ea jea ghoamu gang'uchi sea niirja mideawa fih sagalamnyooji diktam?

³² Ak iidaah gideaba moamu gabay goojeakta buuneeda gabay gagasa hoyyoo nea gudeasheagi.

³³ Asi gwasunu eara aba agooga, siida manung'usiina heeda haleanjeadaanyi sean mideawa moamu ghoah giinealaneedeanyu.

Balang'da masamna gil

³⁴ “Balang'da aamiy, ak balang'da iinihuta samneeda, ea manda gichea eekuuyi gabiiksa matawanda?

³⁵ Biisa ea mudugwarachi gil eara aba ng'eanyiida ghana raghwata, inyeesa gageanu buuneeda ak goohiisa jarooda. Siida mideawa iidiga ea dayiing'shi.”