Lukka 13 - Bibliyeeda Ghaydit

Oapuuda riing'eegeagwa iimajameewa

¹ Abeeda damandida gwanda Fiisu rukusa iita fuga Galilaya aguuyi Bilato foojeanda nyaawa sea haleanjeeda sisabwa geadi bea ghadooweeda.

² Ghwasha nea gwayeesha, “Agooga ghoaghanyi gili fiisu bea Galilayaan gaba riing'a muuchi ea ghang'al fuga Galilaya suurja, aba gideaba gwasawaneatunu?

³ Geayeeshiineegwa, Manda; iimooduukuunani riing'eegeagwa eara agooga gajooshealda saawa.

⁴ Ghana fugiga atamasis bea Siloamu meewa iing'adeesa gheeda geawiin, ghoaghanyi gideaba fiisu niramwas muuchi ea ghang'al buuneesean abiita Yerusalemu?

⁵ Manda; geayeeshiineegwa, iimooduukuunani eara agooga gajooshealda gidashealda saawa.”

Gida sigala shaboogheecheanda manda haghweega

⁶ Goobaloola galeega nea gwayeesha, “Sih ghayi gwandeawa shaboogheecheanda aba jeeda madamnyeandaanyi bea sabiibu, iidu gawa gagasa haghweega ak ea mwanyasa eara akaleala.

⁷ Gwayeesha siida fur madamnyeanda, ‘Nih gweaydeaba samwagu gil nea geahitu dagasa haghweegeaba geedi ak ea mwaanyasi eara akaleala. Laksiina ng'eanyi, aba gideaba gaygweaksa naaha uurda sigeeda?’

⁸ Ghwasha niny nea gwayeesha, ‘Siida mureeda, eanung'waada jeemba gwanyagi, ghanyi dabarsa nea ghayiinyi sururuuda.

⁹ Iideepa gweanyiin gwaji haghweega abeeda ghoahiit; iideepa ea maji, abeeda gilaksi ng'eanyi.’”

Yesu ghoahaap gatmooda badeeda eaweeda Sabaato

¹⁰ Hean eaweecha nea goonealshi aba jeeda ghooriida siinealshacheewa eaweeda sabaato.

¹¹ Abeeda gwanda gatmooni sinyuut ng'utooschi meangeenda nea niiluul gweanyeew damasis, nea niighuumwa ea eamudu ghoamu gwadiiw geaw.

¹² Daah Yesu gatmoodida gaguursa ak gwayeesha, “Iya siihaapnyi aba geeyooni ibearjeewiin.”

¹³ Ghwayiin geatingaaschi uhuudeaba gatmoodida, deagheata gwadiiw geaw ak gwaduumsheesa ASEETA.

¹⁴ Ghwanyareas siida haw ahaaghwa ghooriida siinealshacheewa aba gideaba Yesu ghoahaap siida eaweeda Sabaato, hean gwayeesha buuneeda, “Goondeawi eawooji lah jea asinana gadiyeeda, asi apkaani eahaabeagwa askwearjoojisu, ak ea adoapkaanyi eaweeda Sabaato.”

¹⁵ Hean ghwasha Ng'utamiida nea gwayeesha, “Fuga amiitu geat! Aba agooga gwanda siida maygwajeassa heeydaanyi ghana digeadaanyi aba seamooda, eaweeda Sabaato ak gawa ghoaleayda?

¹⁶ Ama ghamneawa gatmooni, was hudeaba Abrahamu nirada Shataani gweanyeew damasisiin, mamiisiina eetin aba ghealoonigaaschi eaweecheanji bea Sabaatohiin?”

¹⁷ Rugu ng'asheesu ghabwaspwas sean; gea gwachi sheang'nyi niny nea gahoosan buuneeda sean aba ng'asheega gheambiideadi sin niny.

Gida sigala ghajiileanda haradaali

¹⁸ Ghoanyaashta nea gwayeesha, “Ghamneawa sugoocheanduumeeda ASEETA gawuurji sea naaha? Ak gaydagala naaha?

¹⁹ Gawuurji ghajiileanda geeta siguura haradaali geanu sih ak gwahista aba jeeda madamnyeandaanyi mwanang', ak gwardu ak gwaheedu ea ghoah geeta, inyeesa gwasin damealga ea gwasissa dariidaka ghoorajeega nyaawa.”

Gida sigala hamiira

²⁰ Iidu gabiikta gicha gwayeesha, “Gaydagala naaha sugoocheanduumeeda ASEETA?

²¹ Gawuurji sea hamiireeda geanu gatmooda ak ghwayiin jeemba sooscheew samwagu bea dearanga, ak ghwanung' ghaghuut geat sean.”

Gidaghuuta mwariis

²² Hean ghang'eat gawa nea gwasik mujiinajeega ea gharang'weaka, goonealshi nea gagal Yerusalemu.

²³ Ghoanyaash siida nea gwayeesha, “Ng'utamiida fuga jea ghwalaalaan gajeang'ayi?” Hean gwayeesha saawa,

²⁴ “Amilmiliita ak goosikchi gidaghuuta mwanang'; aba gideaba geayeeshiineegwa, gaygagasa fuga saang'a gwasik ak ea mayghoamu.

²⁵ Gayghwahidu damanda jea ghang'eat siida bea gheeda ak ghwajap gidaghuuta, hean goobissi amiinaada ak googulguli gidaghuuta, nea gooyeenyi, ‘Ng'utamiida, jaaseasa.’ Ak gayghwasha niny nea gwayeesha, ‘Mwaanali heedooleabu.’

²⁶ Ak gajayeeshiina, ‘Aseasa ghayi geembuutooschi nea geeleeshachi sea ang'iing'i nea giinealshachi aba mujiineedeanya.’

²⁷ Ak gaygwayeesha, ‘Geayeeshiineegwa, mwaanali heedooleabu, ang'amwana heedeanyu, agoogeeni sina ng'asheega munyasiin!’

²⁸ Abeeda gayghwahidu shooka ea giiwiirooda geeshatka, iyoadaayi Abrahamu ea Isaka ea Yakobo ea sibanga sean aba jeeda sugoocheanduumeeda ASEETA nea agooga ea sihisaneegwa jarooda.

²⁹ Ak gay ghapka fuga jea gwaleabu heeda ghayeawa ea heeda biyeara, ea wiilooda ng'eanyiida ghayeawa ea wiilooda ng'eanyiida biyeara, ak gaygweagiischi aba jeeda sugoocheanduumeeda ASEETA.

³⁰ Asi ang'ula fuga huuydean gayghoah fuga madeeda, nea fuga madeeda gayghoah fuga huuydean.”

Bariinyeega Yesu bea Yerusalemu

³¹ Aba damandida ghapka headaanyi Farisaayajeesu ng'ay ak gwayeesha, “Ng'amwana hiji, aba gideaba Herode gagasa gwanuusnyi.”

³² Ng'ata gwayeesha saawa, “Aweayeena ak gooyeeshi fureayoodida, ‘Ng'ula askweareani ea numuji gaydearuuta meangeenda nea ghaahaapchi fuga miyeani, eaweedeaba samwagu gaydaahiit gadiyeedeanyu.

³³ Eara gwasa gamiisean daang'waay naweedeanyu askweareani ghanea numuji ghanea niseerida; aba gideaba mamiisiina gideaba gajeenuuksa sibaneeda heeda mawoosa Yerusalemu.’

³⁴ Ea Yerusalemu, Yerusalemu, gibarayi sibanga nea giftayi aba lagheanga fuga siicheagu headaang'u! Neagasayi niba hada damuughuushta diibigaagu gida amuguuriida nghaghooda dayeagaaschi aba jeesinga meang'eagaaschi, ak ghoaheawi!

³⁵ Ang'ula, ghaheang'wa sinung'usa heeda. Ak geayeeshiineegwa, maygudu abiikta adaahaan ea eaghus ayeena, ‘Sibadiischeesa siida wuna gheawunga Ng'utamiida!’”