Lukka 12 - Bibliyeeda Ghaydit

Reekusiinda giimiinoodeaba geaw

¹ Damandida bwadeewa geat eemeeda nyiit sagalamnyoojiga ea gooleabi geadiin hean gwayeesha niny ginealangaaschi, “Afura geat aba hamiirayda fuga Farisaayajeega was giimiituunoodeaba geadiin.

² Gilinyoo eedukuta gajeanung' ghwadaajiit, ghana dea funyaat jea ea mwajeanal.

³ Eara ng'asheega oobalooli aba jeeda misaneeda, gajeayiiy aba heedeesh, nea gea oomeang'shi aba ghoorajeega gajearukwiida aba iheenga ghoorajeega.

Siida miisa gheawalmeeda

⁴ “Fuga eaduupcheewi, geayeenyi adoawali fiisu ammu gwanuus saseedean, ama ng'ata ea manda gil nuut ammu gwasiniin.

⁵ Gaydamiin gheang'deang'wa aba dea jea oawala, diita ama nuusiin, ghoamu gwajaksa jeeda duwayda mamiisean; asaha geayeenyi oawala niny!

⁶ Neada udabwaraadaji muut meesheahideawana heelaji iyeenya? Ak ea manda dea jea gwaroosa ASEETA eara akaleala.

⁷ Eara buudeesu bea iheengeagwean siyiida sean. Asi adoawali ng'eang'i, ghoang'waaneewi agooga udabwaraadajeega saang'a.

Masaweega ea gissiheawaata Gristo

⁸ “Ak geayeeshiineegwa gilinyoo ea siida gil nyooh ghamwasan aba madeeda buuneeda, eara niny gayghamwas Orjeeda Siida aba madeeda malaykajeega ASEETA;

⁹ nea siida heawanaan aba madeeda buuneeda gajeaheawa niny aba madeeda malaykajeega ASEETA.

¹⁰ Siida wassean rugu ng'asheega munyas aba badayda Orjeeda Siida gajeesamsa; nea siida ang'eawi Guroorooda Ghaydit ea majeesamsa.

¹¹ Ama deepa eayaadeagwa ghooriida siinealshacheewa ea fuga ahaaghwa ng'eanyiida ea madeeda gea mideawa gheambalmeeda, ea adoohirbabanyi aba gichea ashaayda ea ng'asheega jea arukuta;

¹² aba gideaba gayghoanaaleagwa Guroorooda Ghaydit gichea arukuta aba damandideani.”

Gida sigala meanang'oocheanda dasha

¹³ Ak gwayeesha Siyagi aba jeedeaba eemeedida, “Giinealshoocheanda, rukusiina orjeeda iyya gagwalnean haleanjeeda jea dahearan.”

¹⁴ Gwayeesha niny, “Siida, ghwayiinan ng'eaha doaw siichea gooheeldooscheegwa ghana siida jea gwalakuuneegwa haleanjeeda?”

¹⁵ Ak gwayeesha saawa, “Afura geat aba geawunda gheang'da; aba gideaba eaweega siida manda jeeda haleanjeeda saang'a mideawa.”

¹⁶ Gwarukuteawa gwarukusa saawa galeega nea gwayeesha, “Ghayi madamnyeamba siisi was meanang'oocheanda ghwaheas muuchi;

¹⁷ hean gooteemshi nea gwayi, ‘Gaydasin naaha aba gideaba mutandeawa heechea dayiin boogeasu?’

¹⁸ Iidu gwayi, ‘Gaydasindunu: gaydanyarjeaweada gijigoongeasu ak geasinyi suuk gea hees; ak gaydayiin boogeasu ea haleanjeedeanyu sean.

¹⁹ Ak gay dayeesha geaw, Ea jeedeanyu, gindeawi haleanjeeda saang'a miyaasiin iidiing'deaysi geaw aba gweanyeeka saang'a, fuufa, agiischeena, leesheena, ak gihoosani.’

²⁰ Ak gwayeesha ASEETA niny, ‘Rageananeeda! Eaweani geegasa eaweegaang'u; abeeda haleanjeeda iidiiwsi geaw gay gaba ng'eaha?’

²¹ Asi nih giduurji siida adiiwiisa geaw gheaseeda, Nea meabarursiina gea ASEETA.”

Adeagana geaw ASEETA

²² Hean gwayeesha ginealangaaschi, “Asi geayeeshiineegwa, adoodeawiisi eaweegeagwa gajayaaga naaha, ea gichea ookwealana sasanuukeagwa.

²³ Aba gideaba eaweega ghwalaabwa hoowa hamita ak eara saseeda ghwalaabwa hoowa hang'weaka.

²⁴ Ng'ula udaghuuh: mahisiida nea malacha, ea mandeawana gijigoonga, ghana gudihoojiga ak ghoarear ASEETA saawa. Ghoang'waaneewi agooga muuchi dariidaka!

²⁵ Ng'eaha aba agooga ammu goodeawiit geaw ak ghoahat geawunda eaweagaaschi eara ea geatinagi?

²⁶ Asi iimoamuusi eara ng'asheanda mwanang'; ghwasaan anda gooneayi geat aba ng'asheega suurja.

²⁷ Ang'ula deakghweeda gidabuwaanda; ea magadiydooschi nea mamanmana; ak geayeeshiineegwa, eara Sulemani aba jeeda baruureagaaschi sean miigookwealsheata deakghweeni.

²⁸ Asi iyakwealsheesiindunu ASEETA deakghweeda madameega mida askweareani ama numuji ea sihisa jeeda duwayda, heapi maygwasineegwa muuchi agooga, ea fuga manang'i masawi!

²⁹ Asi adoodeawiichi iheengeagwa aba gasooda gichea ayaaga ghana gichea oaleaha.

³⁰ Aba gideaba eemoojiga muunda ng'eanyiida gagaseadayi haleanjeeni; ak ghwanal Ghweandeang'wa gideaba googasayi.

³¹ Anyo ghanyi agassa sugoocheanduumeeda ASEETA ak suh abeeda gajeehoaneegwa.

Meanang'oocheanduumeeda humng'eeda

³² “Adoabeali agoogeeda ng'ay, aba gideaba gagasa Ghweandeang'wa gideaba gahaguuw gagooneegwa sugoocheanduumeeda.

³³ Ashaayda haleanjeeda oondeawi ak ghoataydi haleanjeeda sisapa geadi bea ghadooweeda; asisina geat shageeniga mawoosiita, gheaseeda mayghoashoay aba humng'eeda heeda may gwaneekiisa mareanghweanda, heeda mayghwaak eara muguyga.

³⁴ Aba gideaba heeda mida gheaseadaang'u heechea goobiida gurooroadaang'u.

Soomjooga ang'wearu

³⁵ “Arada mananuunatkeagwa nea ghoanung' ghwayeat gheaboonyangeagwa,

³⁶ awuurjeewana fuga furda siida haw jea gabiikna nyeangiida, aba gideaba iibiigu ak gagulgul gidaghuuta geebay eejeasa.

³⁷ Ghang'wana soomjoogiga hita ghweanda nyaawa nea ghoang'wearuun; aba huumwa geayeeshiineegwa, gaygwaradiischi ak gagooneegwa hamita, nea gagadiyeeseegwa.

³⁸ Iihidu bugusta eaweeda ghana beashata, ak ghwahidu nea gwasindunu, abeeda ghang'wana soomjoosu.

³⁹ Asi anala ng'asheanji, gideaba siida bea gheeda inyeeda gayghwanal damanda jea ghwahina mareanghweanda gayghoang'wearu, mayghamwas gideaba gajeenyarja gheanyi.

⁴⁰ Asi agooga awoosa hidaat aba gideaba damanda moorarsiini gayghwahidu Orjeeda Siida.”

Soomjeanda doabiiwaat ea dea miidoabiiwaat

⁴¹ Gwayeesha Betaro, “Ng'utamiida, ng'asheesu iigali geadiin girukuneasa aseasa ak ghwahidi ghana irukusi eara buuneesean?”

⁴² Hean gwayeesha Ng'utamiida, “Gajea ng'eaha gil was haghweadoocheanda doabiiwaat biissa ea bwaraawuh, jea ghoahaaghwa gheanyi nea ghoadaw siida haw goombal, ak ghoadaw buuneeda gichea ghwaak aba damandaanyiin?

⁴³ Ghang'wana soomjeanda jea gabiigu siida haw ak ghwahiita nea gwasindunuun.

⁴⁴ Aba huumwa geayeeshiineegwa gayghwanung' goombal haleanjeadaanyi sean.

⁴⁵ Ama eesha geaw soomjeandida aba jeadaanyi, ‘nishing'da siida haw aba hinnooda,’ ak ghoang'eat bayiiga soomjeandideani was headiga ea gadeemga, ak gweagiischi nea gwaleeshi ak gaboogit,

⁴⁶ gaygabiigu siidida haw bea soomjeandida eaweeda mararsiina ea damanda mwanala. Gayghwaaga ghoorjooda ak ghwayiin hijagi sea fuga miidoobiiweadi.

⁴⁷ Nea soomjeanda nal gidabwariiy siida hawiin ak ea mwang'aabwa geaw nea masina gidasibwariiyiin, gajeabwar muuchi.

⁴⁸ Nea siidida mwanalaan ak gwasin gida miisa bayiigean, gajeabwar gil mwanang'. Gilinyoo eataw gea saang'a aba headaanyi gajeegasa gea saang'a nea dea siitaw ghoahaaghwa gea saang'a muuchi, aba headaanyi gajeegasa gea saang'a ea ghwanaawda.

Yesu gweadu dardeayda

⁴⁹ “Aniini ghaawunyi dajaksa beasta jeeda ng'eanyiida; ak gidabal ea ning'ata giiyeeta!

⁵⁰ Ak gwanda giibaatiisanda miisa gideaba gajeepaatiisanan ea eaghus ea nihit!

⁵¹ Agooga ghoaghanyi gili aawunyi deadu hoyyoo jeeda ng'eanyiida? Manda, Geayeadu dardeayda;

⁵² ghang'eada ghamneawa aba jeeda gheedassagi gaygwanda fih muut dardaawaat samwagu fuurji iyeenya nea gafuurji iyeenya gea asamwagu;

⁵³ gayghwadarda ghweanda ea orjeeda ea orjeeda ea ghwaan, ak ghwadarda gheamata ea huda ea huda ea ghaamwat, nea ghwadarda ghamasiyeeda ea gatmooda orjeeda ea gatmooda orjeeda ea ghamasiyeeda.”

Nalooda damanda

⁵⁴ Ak gwayeesha eemeeda, “Iyoadaayi shamooghooda aba heeda biyeara, deagheata gooyeenyi ‘Ghwaan roopta’; ak ea huumwa gil ghwahidu.

⁵⁵ Inyeesa iighuudu jeameeda leabu wiilooda ng'eanyiida ghayeawa gooyeenyi, ‘Gayghwaraanya daknooda’; ak gwasa.

⁵⁶ Fuga amiitu geat! Ghoanali arukuni giduurji ng'eanyiida ea humng'eeda ak ea moanaldaniin arukuni damani bea ghamneawean?

Duupcheewana weajoocheandaang'u

⁵⁷ “Ghwasaan anda agooga moamuusi alaja girgweageedeang'wa nea goobeayi geadi?

⁵⁸ Aba gideaba iideayeewi siida ahaaktaneey madeeda siida laja girgweaguutka, hiji duu andeewana naweedean ghang'wana gooduupchi ada ghwaanyi ea ghoahiitaneey madeeda siida laja girgweaguutka, ak ghwayiinyi siida laja girgweaguutka geatinga shirikarajeanda ak gwajakseey shirikarajeanda ghealooniga.

⁵⁹ Aba huumwa geayeeshiineey mayriteawana ghealooniga ea eaghus ea niidaydi heelajeanda huuydean.”