Lukka 1 - Bibliyeeda Ghaydit

¹ Aba gideaba ng'asheesu ning'waar fuga saang'a nea goorootooschi, aba iita ng'asheega ghayi sisin aba dageascheedeanya,

² gawuurji gidaghayi goondaneasa muushoodiga dea ea aba heeda fuga rukwiida ng'asheanda,

³ Ak ea naadaayi eara aniini gideaba ghwahit, ak ea neasikteawi muuchi gidaghayi ng'eata ng'asheesu seaniin aba beanata, ak geang'oorneey ng'asheesu nea ghaadoabiiwji Diofiloheeda mureeda,

⁴ abeeda gay nala huumeanda aba badayda ng'asheega ghayi sibean sirukuneeyi.

Geerugu jeata Yohaneeda Abaatiisachi

⁵ Damanda waseewa Herode sugoocheanda Yudeya, abeeda gwanda ashoohoocheanji siguura Sakariya, bea gharmucheanda Abiya, nea gwandeawa gatmoadaanyi bea haweega Haruni, nea gheawungaaschi geeguura Elisabeti.

⁶ Nea abeeda saawa ea doobiiweadi aba madeeda ASEETA, nea ghoang'waay muuchi diigheanyeeka sean ea huumeanyeeka Ng'utamiida nea meerukunana badahuuka ng'asheega munyas.

⁷ Abeeda ea mandeawana baleanda aba gideaba Elisabeti soonooda nea niwoosiidi sean.

⁸ Nea aba damanda sineewa gadiyeeda ashoohoocheanduumeeda aba madeeda ASEETA nea abeeda ea galanyeanda sineewa gadiyeeda lugoadaanyi,

⁹ aba seareedida bea gissiniida ashoohoodiga gadiyeedean, inyeesa ghwaloat ASEETA siida gawa jeeda gheeda sibata ASEETA bea Ng'utamiida ghaghwarda geeta siing'andiita.

¹⁰ Nea aba damani siing'andiida gheedean abeeda gwanda Eemeesean daghata gheeda ghamwaash ASEETA.

¹¹ Hean goobeersa Malaykajeanda Ng'utamiida ak ghamiinaada aba murdeeda geatinda dugwa bea heeda wagiida siyiina geeta siing'andiita.

¹² Daah Sakariya gwahirbaban nea ghabeal.

¹³ Ak gwayeesha Malaykajeanda, “Adibeali, Sakariya, aba gideaba siyiiy gidimwaashi, nea eara Elisabeteeda was gatmoadaang'u gaygwajiilneey baleanda, ak gaygureewana gheawungaaschi Yohana.

¹⁴ Ak gay hoosana nea ging'weelayi muuchi, nea eara fuga saang'a gaygahoosassa jeataanyi;

¹⁵ aba gideaba gaygwaheedu aba madeeda Ng'utamiida, Mayghwali difaayi ghana gichea gooboogit, ak gajeanyiit Guroorooda Ghaydit, ghang'eada jeeda ghaamwat.

¹⁶ Ak gaygooguumsa orjooga saang'a bea Israeli Ng'utamiida was ASEETA nyaawa,

¹⁷ ak Gaygoosheedeawa aba jeeda guroorooda ea uurda Eliya, ak ghwayam gurooruunatka ghweaniga gagal diibiga, nea fuga mandeawana mureeda ghoadaw weaghuumeeda doobiiwnata, ak gwasissa Ng'utamiida fuga hideadi.”

¹⁸ Ak gwayeesha Sakariya malaykajeanda, “Gaydajeeng'daaydaan ng'asheanji? Aba gideaba aniini naawaasiichi nea eara gatmoodeanyu ea niwaasiit.”

¹⁹ Ghwasha Malaykajeanda nea gwayeesha, “Aniini geawooschi Gabrieleeda miinaada aba madeeda ASEETA, ak geecheaknean headaang'u deaneey Giijasi miyiin.

²⁰ Asi ng'ula, gayghwaroat ghuutaang'u ea ea mudamuusa baloola ea ghwahita eaweeda jea ghang'ataawa ng'asheesu, aba gideaba mimwasi ng'asheegeasu jea gwasa aba damanda nyaawa.”

²¹ Nea gafuriida buuneeda Sakariya, ghahamng'eanyi sean aba gideaba nishing'da aba jeeda gheeda sibata ASEETA.

²² Hean nea gwardu jarooda, ghwaraay goobalool buuneeda, ak gwajeeng'u buuneeda gideaba siihiimsa gil aba jeeda gheeda sibata ASEETA; goobaloola geatinga nea niroat ghuuta.

²³ Duulean galandaanyi bea gadiyeeda, gawa gheanyi.

²⁴ Ng'ata eawoojisu ng'ay ghwadurmwaniit gatmoadaanyi siguura Elisabeti, ak ghafuy geaw sheemuut nea gwayi,

²⁵ “Nih gissinnean Ng'utamiida aba eaweeda ng'uleewanean ak gageandeawean rearga aba jeeda buuneeda.”

Geerugu jeata Yesu

²⁶ Sheedeaba lah goojeakta ASEETA malaykajeanda siguura Gabrieli gawa mujiineeda Nasareti mida ng'eanyiida Galilaya,

²⁷ hichpa hudi miyeasat siguura Mariya, anyeari siisi siguura Yosefu bea dooshagi sea sugoocheanda siguura Dawdi.

²⁸ Ghwahidu headaanyi ak gwayeesha, “Seayu ang'iing'eeda siitaw dagheerjeanduumeeda ang'iing'i gindeayi sea Ng'utamiida!”

²⁹ Hean gwadeawiit muuchi aba ng'asheanji ak gooteemsheesa seayoani giduurji.

³⁰ Gwayeesha Malaykajeanda, “Adibeali Mariya, aba gideaba nigoonyi ASEETA dagheerjeanduumeeda.

³¹ Asi ng'ula, gaygweayiida ak Gayjiila baleanda, ak gayguureewana gheawungaaschi Yesu.

³² Nea gajeahaw, ak gajeeguura Orjeeda ASEETA haw mida humng'eeda; nea gayghoadaw Ng'utamiida was ASEETA hoorgeeda sugoocheanduumeeda Dawdi was ghwaan,

³³ nea gayghoahaaghwa gheeh Yakobo ea ghoah gweanyeeka manda muudeanooda; nea sugoocheanduumeadaanyi ea maygwanda muudeanooda.”

³⁴ Gwayeesha Mariya malaykajeanda, “Gayghoawataan ng'asheanji nea aniini ea meandeawani siyeeda?”

³⁵ Gwayeesha Malaykajeanda, “Gaygwashuubeeseey Guroorooda Ghaydit, nea uurda ASEETA haw gaygookwealseey jirooneeda; aba sareani baleanda jea eeji gajeeguura siida ghaydit, Orjeeda ASEETA.

³⁶ Asi ng'ula, buweacheandaang'u was Elisabeti eara niny nigweayiit aba jeeda woosindaanyi ak gaygwaji baleanda; nea nih ea sheedeaba lahi; nea niny abeeda geeguura soonooda.

³⁷ Aba gideaba manda ng'asheanda jea ghwaraay ASEETA.”

³⁸ Gwayeesha Mariya, “Ng'ula, aniini geawooschi soomjeanda Ng'utamiida, nung' gwasa aba heedeanyu ng'asheanji inyaashiin.” Ak ghabeawa headaanyi Malaykajeanda.

Mariya gabareasa Elisabeti

³⁹ Askwearjoojigiga ghang'eat Mariya ak ghwalamwajaada gawa ng'eanyiida heayeeniiga jeeda mujiineeda Yuda.

⁴⁰ Ak gawa jeeda gheeh Sakariya ak googeachi Elisabeti;

⁴¹ Iiy Elisabeti giigeacheeda Mariya, ghwadanghan baleanda mida jeadaanyi ak geanyiit Elisabeti Guroorooda Ghaydit

⁴² goojuur aba ghuuta haw nea gwayi, “Sigoonyi ghawooda aba jeeda gadeemga, ak ea siitaw ghawooda dea jea jiila!

⁴³ Gayghoawdaani aba heedeanyu, gideaba ghwahidu heedeanyu gheamata Ng'utamiideanyu?

⁴⁴ Aba gideaba ng'ula, iyaayiinyi ghuuta seayoadaang'u ghwadanghan baleanda mida jeedeanyu aba ng'weelooda.

⁴⁵ Ghang'wana siida jea ghamwas gideaba gay gwasa ng'asheega rukusa Ng'utamiida.”

Sarmeeda Mariya bea duumsheesiinda

⁴⁶ Gwayi Mariya, “Jeedeanyu ghoaghaambiit Ng'utamiida,

⁴⁷ Nea guroroodeanyu gahoosasa ASEETA was lealnoocheandeanyu

⁴⁸ Aba gideaba nidaah nyoota uurda soomjeandaanyi. Asi ng'ula, ghang'eada ghamneawa gaygaguureewean jeacheenga sean dea sing'usha;

⁴⁹ Ak ea nisinnean siida siitaw ghawooda hoauur ng'asheega hees muuchi, ak gheawungaaschi ea ghaydit.

⁵⁰ Nea baydeaydaanyi gwanda heeda buuneesean awal gheang'daanyi ghang'eada jeacheenga ea gagul jeacheenga.

⁵¹ Ak ea niihiimu uurda aba geatindaanyi, nea Ghoadabwaarda fuga ghwarjajeega aba jeesinga nyaawa,

⁵² Ak ea niirareang'na fuga mideawa uurjeenga hoorgajeega nyaawa bea sugoocheanduumeeda, ak goodiing'u fugiga mandeawana uurjeengean;

⁵³ Ninyiit fuga bearji jalooda aba haleanjeeda miyaas, nea meanang'oodiga gaweay nea ghwadalaada.

⁵⁴ Ak ea niweat soomjeandaanyi was Israeli, aba giipkeata baydeaydaanyi,

⁵⁵ gawuurji gidaghayi rukusiinda ghweanigaasa, ea Abrahamu ea jeataanyi aba gweanyeeka manda muudeanooda.”

⁵⁶ Gwandeayi niny sea Mariya ea goosha sheeh samwagu, iimuchu gabiikta gheanyaawa.

Jeata Yohaneeda Abaatiisachi

⁵⁷ Iidu nea ghwahita damandaanyi bea jeata gwaji Elisabeti baleanda.

⁵⁸ Iiy giischeewdaanyi ea buweadeagaaschi gideaba nibwayda Ng'utamiida Elisabeti gang'weela sean.

⁵⁹ Eaweeteaba sis geayaat baleanda ghasmeahooda; ak ghwanyawa gajeeng'assa gheawunga ghwaan siyi Sakariya,

⁶⁰ ak gwayeesha ghaamwat, “Manda; gajeeguura Yohana.”

⁶¹ Ak geeyeesha, “Aba buweadeagaagu manda siida sing'assa gheawung'su.”

⁶² Iidu geeng'wachsa geadi ghwaan gwarugu gheawunga gasa gang'assa.

⁶³ Gamus eeyeasa beehiida jea ghang'waar, ak ghang'waar gideaba, “Gheawungaaschi Yohana.” Ghahamng'eanyi sean.

⁶⁴ Deagheata ghwajaat ghuuta nea gootina ng'ushapta ak gabadiischeesa ASEETA.

⁶⁵ Hean ghang'ut muuwda giischeewda nyaawa sean. Ak gageawiit iiteaba ng'asheesu aba heayeeniga sean mida ng'eanyiida Yudeya;

⁶⁶ Fuga sean iiy iiteaba ng'asheesu gaba nih ang'ooysa jeadaanyi nea gwayi, “Jeebi gayghoah siida uurjiin?” Aba gideaba geatinda Ng'utamiida gwanda badaydaanyi.

Ramooraneeda Sakariya

⁶⁷ Nea Sakariyayda was ghweanda baleanda geanyiit Guroorooda Ghaydit ak ghwaramoaran nea gwayeena,

⁶⁸ “Duumsheesiinda gaba Ng'utamiida was ASEETA Israeli, aba gideaba nibwareasa ak gwalealu buuneadaanyi,

⁶⁹ nimiinda gujaweeda lealnooda aba jeeda gheeda soomjeandaanyi was Dawdi,

⁷⁰ Gawuurji gidaghayi rukuteayda aba ghuuta sibangaaschi ghaydidi ghang'eada garayi,

⁷¹ ak gajeelealnaneasa heeda weajoodigaasa, ea geatinga fuga sean sideasa;

⁷² ak gayghabwayda ghweanigaasa aba gidaheeleesa, nea ghoapkaat neajeadaanyi ghaydit,

⁷³ ak gweaksa habeawooda Abrahamuheeda was ghweandeanya,

⁷⁴ ak gagooneasa gideaba gajeelealnaneasa geatinga weajoodigaasa, ak geaghadoawanyi nea meawali gil,

⁷⁵ aba ghaydidanda ea doobiiwnata galeagasean aba madeadaanyi aba jeeda eaweagaasa sean.

⁷⁶ Nea ang'iing'i baleanda, gajeeguureeweey sibaneeda ASEETA haw; aba gideaba gajasheedeawana Ng'utamiida sissiina naweadingaaschi,

⁷⁷ Nea gwarukusa fugaaschi ghwanal fughareeda lealnooda aba samsiinda aba geandeayda riing'eega nyaawa,

⁷⁸ Aba baydeayda ASEETEANYA, niirearseasa weeshinda leabu humng'eeda,

⁷⁹ ak gayghoabwaay fuga sean mida jeeda misaneeda haw bea jirooneeda miyeeda, ak ghoadoabiiw geeshangaasa eayaada naweeda miy bea hoyyoo.”

⁸⁰ Ak gwahissa heeda baleanda nea ghwanyas uurda aba guroorooda, nea goobiita dareapcheeda ea ghwahita eaweadaanyi jea goohiimsiina geaw fuga Israeli.