ISAYA 9 - Bibliyeeda Ghaydit

¹ Nea diita mida jeeda sawanadeedean, gaygahoosan. Aba mwadi gawa jeeda ng'eanyiida fuga Sabuloni ea ng'eanyiida fuga Naftali, nea abeeda geefooli nea aba huuydeanda ghwanyas giigheambiita, aba murdeeda basooda bea giigheawda Yordani was Galilayeeda eemoojiga.

Sugoocheanda jea ghwahidu

² Buuneeda neay aba jeeda misaneeda gayghwadaah weeshinda haw; nea gea abiita jeeda misaneeda duw, saawa gayghoabwaay weeshinda.

³ Niihaadi eemoojiga, ak ea ninung' ghwanaawda hooseaneega nyaawa; nea gahoosan aba madeadaang'u gawuurji hooseaneega damanda lajita booga, nea gawuurji fuga hoosana damanda lacha easanga.

⁴ Aba gideaba nihirji yookeeda sareandaanyi, ea mulooda sirassa gheataanyi, ea bileangida siida ghabwas niny, gawuurji gidaghayi ijoardi fuga Midiyani.

⁵ Aba gideaba dabita sean bea ng'ucheeda, bea siida aba damanda ng'ucheeda ea hang'weaka sing'uda foojeanda, gajeaghwarda ak ghoah ghweenga jea eayiin jeeda beasta.

⁶ Aba gideaba siji baleanda aba badahuukaasa, sigooneasa baleanda was baleanda; ak niny ghoamu sugoocheanduumeeda, ak gajeeguura gheawungaaschi “Siida argweakiisa buuneeda daamdaamwaat, ASEETA hoauur, ghweanda manda muudeanooda, Sugoocheanda mideawa hoyyoo.”

⁷ Uurda sugoocheanduumeadaanyi gaygawa mwadi nea gwaheedu nea sugoocheanduumeadaanyi gaygaba hoyyoo galeagasean. Aba hoorgeeda Dawdi, nea sugoocheanduumeadaanyi gaygoomajeek nea gawa mwadi aba girgweaksiinda ea doobiiwnata ghang'eada ghamneawa ea ghoah damanda manda muudeanooda. Suh seaniin gaygwashiisa ghaang' NG'UTAMIIDA lugweega.

Ng'utamiida gayghwalas fuga Israeli

⁸ NG'UTAMIIDA gwarukusa ng'asheanda Yakobo ak ghwahita heeda Israeli;

⁹ Ak gayghwanal buuneesean, fuga dooshta Efraimu ea gea abiita Samariya, ea gea inyeesa gabalool aba ghwarjeeda nea ghaghwar geat.

¹⁰ “Niibeada ghamarda, ak aseasa gajeadeasa aba lagheanga; sishit, silach meaghayga, ak gajeayiina hoorgeadaanyi gubooyeeka.”

¹¹ Asi NG'UTAMIIDA goong'eesa saawa weajoodiga Resini, nea ghwaak weajoadigaaschi

¹² Meatkweeda ghayeawa gwanda fuga Ashuru, nea meatkweeda biyeara gwanda fuga Filisti, ak ea ninyareesi sean gagasa ghabwar fuga Israeli. Ak eara aba sareani miighahawda nyarastaanyi, ak eara ghamneawa geatindaanyi gudughamiinda.

¹³ Ak fugiga ea mii gwayamsa geat ninyeeda bwar saawa, nea miyeegasa NG'UTAMIIDA lugweega.

¹⁴ Asi aba jeemba eaweecheanjagi NG'UTAMIIDA gayghwalas fuga hees bea Israeli ea fuga nyaawa gayghwalas uhuuda nyaawa ea shimng'eanda.–

¹⁵ Gweargweeda ea siida mureeda siida haw gil nea sibanga anaal ng'asheega ng'uyeega ea shoomng'eanda gil.

¹⁶ Fugiga mida madeedeaba fiisuun nihuteaw, nea fugiga sinda madeedean ea sinukghuta.

¹⁷ Asi NG'UTAMIIDA maygahoosan aba badayda gheareemanga nyaawa, nea mayghabwayda bananga ea masinung'weega nyaawa; aba gideaba manda eara siyagi awal gheang'da ASEETA ak gaba ng'uya sean, nea eara aba badaydeaba suh seaniin ea mii goosha nyarastaanyi gudughamiinda geatindaanyi.

¹⁸ Ng'asheega munyas bea buuneeda ghwayeata beasta, ak ghwaak ng'eamga ea halaghweenga; ak ghwayeata beasta mida jeeda dimda, nea ghwanung' gwardu aroosta haw gal humng'eeda.

¹⁹ Aba nyarasta NG'UTAMIIDA lugweega sighwarda ng'eanyiida ak buuneeda gawuurji ghweenga siyiin jeeda beasta; ak ea manda siida bwayda orjeeda ghaamwat.

²⁰ Ghoareat meatkweenagi bea geatinda dugwa, ak ea madeayi, ak ghwaak meatkweenagi bea geatinda ghaadaam ak ea malang'u; gaba nih ng'uchi sea orjeeda ghaamwat.

²¹ Manase gang'uchi sea Efraimu, ak Efraimu gang'uchi sea Manase, ak iyeenye nyaawa gang'uchi sea Yuda. Nea aba badaydeaba suh seaniin ea miighahawda nyarasta NG'UTAMIIDA, gudughamiinda geatindaanyi.