ISAYA 8 - Bibliyeeda Ghaydit

Orjeeda Isaya gawuurji giirooraneeda aba heeda buuneeda

¹ Hean gwayeeshiinean NG'UTAMIIDA, “Geani beehiida haw ak ging'oorsi badaydaanyi aba galaamu ng'asheesu, ‘Gaba Maher-shalal-hashbasi.’”

² Ak aniini gaydanyaksa geaw mushoodiga doobiiweadi nea Uriya gil was ashoohoocheanda ea Sakariya orjeeda Yeberekiya, ak ghang'oar.

³ Hean geawi heeda gatmoodeanyu was ashoohoocheandean, ak gagweayiit amang'ata gwaji baleanda. Ak gwayeeshiinean NG'UTAMIIDA, “Guureewana gheawungaaschi Maher-shalal-hashbasi;

⁴ aba gideaba damanda miighoamuusa jeebi baloolda, nea gwayi ‘Bwaabwa’ ghana ‘Iya’, abeeda meanang'oocheanduumeeda Dameski ea fuga ng'uta bea Samariya gajeayaat madeeda sugoocheanda Ashuru.”

Hinooda sugoocheanda Ashuru

⁵ Ak gwayeeshiinean NG'UTAMIIDA gicha:

⁶ “Aba gideaba fiisu niheawa beega gulda nea goojiileada aba eenda Shilo, ak gahoosan aba badayda Resini ea orjeeda Remaliya;

⁷ asi ng'ula, NG'UTAMIIDA gayghwanung' gagulsa saawa beega saang'a mideawa uurda muuchi bea eenda; ak gayghwahidu sugoocheanda Ashuru ea gharbeadaanyi sean, ak gaygwasik badayda maparoojigaaschi sean, ak gagulda aba mareecheekaaschi sean.

⁸ Gayghang'ata nea ghwalamwajaada, ak gawa ng'eanyiida Yuda gaygagulda nea gwasik bugusta ak gwayi bwak ea ghwahita gheata nea inyas goowiida meang'eagaaschi gwadukuta ng'eanyiidaang'u, Ea Imanueli.”

⁹ Abwada geat aba muuwda agoogeeda eemoojiga; Oaleaydiit darooraka sheagi; Awoosa hidaat aba ng'ucheeda nea ghoabeali; Awoosa hidaat aba ng'ucheeda nea ghoabeali.

¹⁰ Asi abaloola, ak gayghwayamwa; arukuni ng'asheanda ak ea maygwasa, aba gideaba ASEETA gwanda meatkweedeanya.

Ng'utamiida ghamiin gheanyanga sibaneeda

¹¹ Aba gideaba gwayeeshiinean NG'UTAMIIDA, aba geatindaanyi majeek mida badaydeanyu, ak ghamiin gheang'deanyu aba gideaba adaayaachi naweedeaba fiisu nea gwayi:

¹² “Adooyeenyi nih foolayda gil aba ng'asheega sean jea gwarugu fiisu nih foolayda, adoabeali, adoawali gidawal saawa nea adoabeali.

¹³ Oapkaada gideaba NG'UTAMIIDA bea lugweega anda ea ghaydit ak gajoowala niny ak niny gwandeawa gharbeeda.

¹⁴ Ak gayghoah heeda ghaydit, nea lagheaneeda ruusa fih gil, was lagheanga ruusa gheeh Israeli ea fuga abiita Yerusalemu.

¹⁵ Nea fuga saang'a gaygwaruusa, ak goobeedeaysa ak gagiishachi, ak gayghoang'waay ak ghwaat.”

Miinda gheang'da maloonghajeega

¹⁶ Rada muwuunooni, ak giyiini giirooraneeda mida bugusta giinealangeasuun.

¹⁷ Gaydaamuughu NG'UTAMIIDA, dafuy gheamamdaanyi aba badayda gheeh Yakobo, ak geandeawi rarooda aba niny.

¹⁸ Ng'ula aniini ea diibiga goonan NG'UTAMIIDA geawooschi gwadeagooda ea deamdeamanga aba jeeda Israeli leabu heeda NG'UTAMIIDA bea lugweega, abiita Giijeeda Sayuni.

¹⁹ Ak inyas geeyeeshiineey, “Gasa ng'asheanda aba heeda giijoodiga ea beeneediga uurji dariidaka meang'shi.” Gwachi buuneeda magasa gagasa ng'asheanda aba heeda ASEETA nyaawa? Ng'ata gaweay gagasa ng'asheanda aba heeda fuga nimeewa aba badayda fuga majeekcheewi?

²⁰ Aba giinealshooda ea muuwuunooda! Nea aba huumwa ng'asheanji ruguun ea manda muudeanooda.

Damanda sawanadeeda

²¹ Ak gajeesik bugusta ng'eanyiida nea meanala gichea eesin, nea niing'waay jalooda, ama ang'waay jalooda, gaygoojuur nea gweaksa habeawooda sugoocheanda nyaawa, ea ASEETA nyaawa, nea googeal gheamamuunatka nyaawa humng'eeda;

²² ama ng'ata gajeeng'ula ng'eanyiida, ak ging'ulayi sawanadeeda ea misaneeda, ak ea manda ng'weelooda aba sawanadeeda, ak gajeahoan gaweay jeeda misaneeda haw.