ISAYA 66 - Bibliyeeda Ghaydit

Ng'utamiida goorgweaksa eemoojiga

¹ Gwayi NG'UTAMIIDA: “Humng'eeda hoorgeedeanyu bea gheambalmeeda gil, nea ng'eanyiida ea hoorgeeda jea dayiin geeshangeasu gil; gajadeeknean gheeda uurjiin? Ak heechea dafuufa ea eenu gil?

² Aba gideaba haleanjeeni seaniin geasinyi aniini, ak gwardu haleanjeeni seaniin, gwarugu NG'UTAMIIDA. Ak siisi ea siichea dang'ula gil, siida ng'eeni ak ea niduukuuna, nea iiyiiy ng'asheandeanyu ghang'ut muuwda.

³ “Fiisu gwasinda ng'asheega gidagasiida saawa, gagoonan lukghumeeda deeda, nea aba hich gwanuus buuneeda ak ghaghadoawanda; inyeesa gagoonan haleanjeeda sisapa geadi bea ghadooweeda was dayeenda gisilleanda, nea gwahirja gheata gudeeda; inyeesa gweanean haleanjeeda sisapa geadi bea ghadooweeda was booga, ea foojeanda bicheanda, inyeesa ghaghwarda geeta ng'andit aba madeedeanyu ak gaweay ghabwat sanaamu. Ak suh ea niloat naweeda nyaawa nea gabwageat, nea aba jeesinga nyaawa gahoosassa munyasnacheeka nyaawa.

⁴ Ak aniini gaydeadu sawanadeeda aba badayda nyaawa, ak gaydeadu muuwda nyaawa badahuuka nyaawa; aba gideaba iyeaguurdi ea manda siida nyeara ghuuta, nea iyeabalooli ea mayiing'shi, ak gwasin gea munyas aba madeedeanyu, ak ghwaloat gea meahoosanan.”

⁵ Ooleeysiiniit ng'asheanda NG'UTAMIIDA, agoogeeni ng'udeagwa muuwda aba ng'asheandaanyiin “fugeagwa ooduupcheewi ghwasteagwa, ghayi ak gwahistaneegwa aba gheawungeasu. Ak geeyi, ‘Asi oakghaambiida NG'UTAMIIDA ak gajeadaha hooseaneegeagwa’; nea ghana gajeapwaaspwaas saawa.

⁶ “Oaleaydiit deambirista jeeda mujiini, ghuuta nyeara jeeda gheeda sibata ASEETA ghuuta NG'UTAMIIDA gil, ghwaaga weajoodigaaschi ghoorjooda.

⁷ “Damanda miighwanyasa lajooda aba jeata, hean gwaji; damanda miighwanyasa sawanadeeda, gwaji baleanda.

⁸ Siida iiy ng'asheanda uurji nih ng'eaha gil? Siida daah ng'asheega uurji suh ng'eaha gil? Ng'eanyiida gajeemu eeji eaweecheanjagi? Ak eemeeda gajeemu eeji aba geeshangiga? Aba gideaba Sayuni iinea ghwanyas lajooda, gwaji orjoagaaschi.

⁹ Heapi gaydeadu ama neekiisa damanda jeata ea meanung' gwaji? Gwarugu NG'UTAMIIDA; aniineeda inyeesa geanyaksi diibiga heapi gaydarat jeataanyi? Gwarugu ASEATAANG'U.

¹⁰ “Ahoosana sea Yerusalemu, ang'weela aba badaydaanyi, agoogeeda oabwariinyi; ahoosana sea niny aba hooseaneega, agoogeeda ooyeawdi aba badaydaanyi;

¹¹ agooga gajareera ea alang'uuda aba eanoagaasa ak gajahoosana aba seang'ayda giigheambiitaanyi.”

¹² Aba gideaba gwayi NG'UTAMIIDA; “Ng'ula gaydeadearsa hoyyoo gawuurji eenda, nea giigheambiita eemoojiga gawuurji eenda gulda; ak agooga gajareera, nea geesareaneegwa, ak geekareegwa nea geasapsabeagwa.

¹³ Gawuurji siida nung' ghaamwat ghahawda, ak eara aniini ea gichea daahaawdaaydaneegwa gil, ak gajeahawdaneegwa aba Yerusalemu.

¹⁴ Gajadaaha ak gaygahoosan gurooruunatkeagwa; ak gaygamajeegiidi geakeagwa ea gawuurji nyeega nyawiiri; ak gajeanal gideaba geatinda NG'UTAMIIDA gwanda heeda fugaaschi bea gadiyeeda, ak nyarastaanyi gaygwanda badayda weajoodigaaschi.

¹⁵ “Aba gideaba ng'ula NG'UTAMIIDA gayghwahina beasta, nea mutukwajeagaaschi bea ng'ucheeda gawuurji jeameeda shaarara, Ak ghawalda nyarastaanyi aba beasta yeat, nea goowoowsa buuneeda aba ng'ushapta beasta.

¹⁶ Aba gideaba NG'UTAMIIDA gaygoorgweaksa buuneesean aba beasta, ea aba ng'utaanyi, nea fuga jea ghabwar NG'UTAMIIDA gajea saang'a.

¹⁷ Gwayi NG'UTAMIIDA, “Gwanda fuga amiitu geat nea goohuushi aba gideaba gaygaweay jeeda boostaani heeda sibata aseecheeka, hean ghoaream nea gwanda bugusta nyaawa ashoohoocheanda. Fiisu inyeesa ghwaak banyeega ukurmeeda, ea murjeanga ea hamichoojiga suuk meeyeaka. Aba huumwa fiisu gaygoosha sean.

¹⁸ “Ak aniini ghaanali sinaweega nyaawa ea gida ateemsheata, gayghwahidu damanda jea dabwadageat eemoojiga sean iita sean ak gayghapka ak gayghwadaah giigheambiiteanyu.

¹⁹ Ak gaydayiin gwadeagooda bugusta nyaawa, ak giika ghuhiin gaydeajeakta heeda eemoojiga, mida Darshishi ea Buli, ea Ludi, mida fuga nal ng'ucheeda ghuweang'da, ak gaygaweay eara Dubali ea Yafani ng'eanyiida sheagi mida ghuuta basooda, fuga mii ghwayiiy ng'asheegeasu, nea mwadaaha giigheambiiteanyu ak gaygwarukwiida giigheambiiteanyu aba jeeda eemoojiga.

²⁰ Nea gaygweana fugeagwa sean ooduupcheewi eemoojiga sean, gawuurji haleanjeeda sisapa geadi bea ghadooweeda aba heeda NG'UTAMIIDA, aba badayda digeeniga ea mutukwajeega ea badayda ghabearanga ea badayda digeeniga, ea badahuuka diyeanga asasi, bwak ea ghwahita giijeedeanyu ghaydit Yerusalemu gwarugu NG'UTAMIIDA. Gawuurji gida eatiideayda fuga Israeli haleanjeeda nyaawa sisapa geadi bea ghadooweeda gheeda NG'UTAMIIDA aba dabicheanda miy.

²¹ Ak gaydaloat mwaatkwa aba jeenyaawa ghoah ashoohoodiga, nea mwaatkwa ghoah fuga Lawi gwarugu NG'UTAMIIDA.

²² “Aba giduurjeata humng'eeda eesh, ea ng'eanyiida eesh, jea dasin, ea gichea goobiideata aba madeedeanyu gil, gwarugu NG'UTAMIIDA; ea gichea goobiideata jeacheengeagwa gil ea gheawungeagwa.

²³ Ak gayghang'eada ng'ushiinda sheeda ea ghwahita ng'ushiinda sheeda, ak ghang'eada sabaato ea ghwahita sabaato niirja, gayghapka buuneesean ghabwat gheawungeasu aba madeedeanyu, gwarugu NG'UTAMIIDA.

²⁴ “Ak gaygwarita jarooda ak ghwadaah muscheeka fuga heawanaan. Aba gideaba ghuughuutka nyaawa maygameewa, nea eara beasta nyaawa ea maygamis, ak saawa gayghoah gidamuy aba madeeda buuneesean.”