ISAYA 65 - Bibliyeeda Ghaydit

ASEETA gayghwalas uhuuda fuga heawa ng'asheagaaschi

¹ Gwayi gwachi neawooschi hidaat dasha ghuusiga fugeasu aba mooshta nyaawa bea ghawooda, ak ea mamwaasha ghawooda. Gwachi neawooschi hidaat, aba giika gaseaniin, ak ea manda gea gasean. Eemoojiga mamwaasha ghawooda aba badaydeanyu, eara ea magassean geawooschi hidaat dasha ghuusiga nyaawa, “Geandi hiji, geandi hiji.”

² Geahiimsi geatingeasu askwearda sean fuga mideawa heeheeweega, fuga weelweela jeeda naweeda mwadoabiiwa, nea ghwaat geeshta fughareenga nyaawa.

³ Fuga inyeesa ghwanung' danyareas aba madeedeanyu galeagasean, inyeesa ghoadayda lukghumeeda aba jeeda boostaaneeda nyaawa ea haleanjeeda sisapa geadi siing'andiita aba uhuuda matafwaari.

⁴ Goobiitbiit aba bugusta bung'eadinga, nea gwalil aba heeda makcheameeda nyaawa, nea ghwaak banyeega ukurmeeda ea juubanga haleanjeeda aasichi gwanda jeeda dabita nyaawa.

⁵ Fuga eena, “Miinaada nea gibwaageaw adineekiisean aba gideaba aniini geawooschi ghaydit ea dang'alnyi.” Fiisu nih gawuurji aroosta gil aba jeeda sareenuukeasu, beasta yeat gil askwearda sean.

⁶ Ng'ula ng'asheanji geeng'oorsa madeedeanyu; “maydasiinda ak gaydawalda asaha aniini gaydawalda gidageatinda nyaawa aba daghanuunatka nyaawa.

⁷ Munyasnacheekeagwa ea munyasnacheeka ghweanigeagwa iisiikuuy; gwarugu NG'UTAMIIDA. Aba gideaba geaghwarda geeta ng'andit aba iheenga giijeega, nea goong'eawean aba iheenga heayeeniga; asi gighanyi deadeen gadiyoojiga nyaawa, aba daghanuunatka nyaawa.”

⁸ Gwayi NG'UTAMIIDA: “Gawuurji gidasinyasiida difaayi aba jeeda sabiibu mughuush ak hean gwayi, ‘adiidu geadataschi, aba gideaba jeadaanyi gwanda badiischooda’, hean gaydasin aba badahuuka fugeasu bea gadiyeeda, nea ea maydahuyda saawa goosha sean.

⁹ Ak gaydaadaw Yakobo jeata, ak gaygwahearan giijeegeasu bea Yuda, ak gaygwahearan dea aaloachi, nea goobiida fugeasu bea gadiyeeda hoowa.

¹⁰ Ng'eanyiida Sharoni gayghoah muhealeeda hawanda gisilga. Nea moangoachiyda Akori ghoah heechea gwaroocha hawanda dugwa aba badayda fugeasu gasean.

¹¹ Nea agoogeeda oanung'wi heeda NG'UTAMIIDA ak gwarooseegwa giijeedeanyu ghaydit nea measeeda siguura gheamamda miy ea gheamamda muy ak ghoanyiichi gikoombajeega difaayeeda siikuuyi sea habitkwajeega.

¹² Aniini gaydasajeagwa eabwareagwa aba ng'uta, gajeabwareagwa oogasean, aba gideaba iyeaguurneegwa ea moonyearri, iyeabalooli ea moayiinyi, aba gideaba goosinyi gea munyas aba madeedeanyu, ak ghoaloachi ng'asheega meagassi.”

¹³ Asi gwayi NG'UTAMIIDA was ASEETA, “Ng'ula fugeasu bea gadiyeeda gaygweagiischi, nea agooga gayghwayeadeagwa jih, ng'ula fugeasu bea gadiyeeda gaygwaleeshi nea agooga gayghwageagwa muwoash, ng'ula fugeasu bea gadiyeeda gaygahoosan, nea agooga gajeapwaaspwaaseagwa.

¹⁴ Ng'ula fugeasu bea gadiyeeda gaygwasarman aba hooseaneega guroorooda nea agooga gajooyeawda aba sawanadeeda guroorooda. Gajoochuura aba sawanaduutka gurooruunatkeagwa.

¹⁵ Ak gajanung'waada gheawungeagwa gamooriideawa fugeasu aaloachi nea gwayeena, gagasa ghabwarnyi NG'UTAMIIDA was ASEETA. Ak gaygang'asa fugaaschi bea gadiyeeda gheawunga eashish.

¹⁶ Asi siida adaw geaw ghawooda aba badayda ng'eanyiida, gayghoadaw geaw ghawooda aba heeda ASEETA huumwa. Nea dea ak habeawooda aba badayda ng'eanyiida, gayghwaak habeawooda aba heeda ASEETA huumwa. Aba gideaba sawanadeeda madeeda ning'ata ak ea niisha aba madeedeanyu.

Badita ng'eanyiida gicha

¹⁷ “Aba gideaba ng'ula aniini ghaabwachi humng'eeda eesh, ea ng'eanyiida eesh, nea ng'asheega ghayi bea madeeda ea maygudu eapkaat nea maygawa jeeda fughareengeagwa.

¹⁸ Asi ahoosana nea goong'weelayi, damanda manda muudeanooda aba haleanjeeni aabwachiin, aba gideaba ng'ula ghaabwachi Yerusalemu ghoah ng'weelooda nea gahoosan fugaaschi.

¹⁹ Ak aniini gaydahoosan aba badayda Yerusalemu, gaydang'weela aba badayda fugeasu, maygudu eeyiiy ghuuta shookcheanda aba jeadaanyi earahay ghana ghuuta giinyahuushooda.

²⁰ Maygudugwanda miyeeda diibiga manang'i nea eara gweargwa ea maygameewa iimiighwahita damanda nyaawa, inyeesa ghami siida nea gaba gweanyeew bughala, ghami nea gudea gheareemaneeda gil, nea inyeesa ghami nea miighwahita gweanyeew bughala ada abeeda ea simwaashta.

²¹ Ak saawa gayghwadeas gealga ak goobiida jeeda, gajeehista geediga sabiibu ak geayaak dayeagaaschi.

²² Mwajeadeas ak goobiida sih nuut jeeda, majeehista ak ghwaak sih nuut, aba gideaba gidayang'da eawoojiga geeta, ea gichea gawuurji eawoojiga fugeasu gil, ea fugeasu aaloachi, gaygahoosan aba gadiyeeda geatinga nyaawa ea gageanu eawoojiga saang'a.

²³ Gadiyoojiga nyaawa maygaba mwadaagha, ak ea maygwaji diibiga jea gameewa, aba gideaba saawa niidaw NG'UTAMIIDA ghawooda sea jeacheenga nyaawa.

²⁴ Damanda mii gaguurnean gajea naashaay ghuusiga nyaawa. Nea damanda mii ghoabuut baloolda nyaawa, gajea gaydayiiy ghuusiga nyaawa.

²⁵ Suuyeeka ea dayeenda gisilleanda gayghoajeada aba hijagi, nea ng'adiida ghwaak nyeega gawuurji deeda, nea birjeanda gayghoah hamita ichibooda. Aba uhuuda giijeedeanyu sean ghaydit manda gichea gwahisa ghana ealas uhuuda, gwarugu NG'UTAMIIDA.”