ISAYA 64 - Bibliyeeda Ghaydit

¹ Gidabal gwachi ginung' ghabwaasha humng'eeda ak girarang'aani, ak ghaboadan giijeega aba madeadaang'u–

² Gawuurji beasta ak murunjachkweega ea beasta silalaja beega– nea girukusi weajoodigaagu gheawungaagu, ak gaboodani eemoojiga aba madeadaang'u.

³ Ghayi iisini ng'asheega deamdeameadi meerarsiini, girarang'aani ak ghaboadan giijeega aba madeadaang'u.

⁴ Ghang'eada garayi manda siida nidaah, nea miighwayiiy aba iidigaaschi manda siida nidaah ASEETA uurjeeweey, sina ng'asheega aba badayda giika ghus ninyiin.

⁵ Ang'iing'i iissa gideapti siida hoosassa ng'asheega doabiiw ak gwasin, fuga apkeadi ak ghwaat naweadingaagu; Ng'ula, ginyareasi ak geesinyi riing'eeda; ak ea siipiidi jeedeaba ng'asheesu ea gageawiit, ak aseasa heapi gajeelealneasa?

⁶ Aba gideaba aseasa siwuurjeewi siida mideawa ririnnyeanda. Nea eara sinaweagaasa doobiiweadi niwuurji hang'da sing'uda ririnnyeanda; aseasa gajeesissa sean eewuurjeewana seendooda, ak ng'asheagaasa munyas gayghaghuutaneasa gawuurji gidaghuutiideayda jeameeda.

⁷ Manda dea nihidu gamusnyi eara akaleala, manda siida sin badiida aba gasoadaang'u. Ang'iing'i gifunyaneasa gheamamdaang'u ninung'useasa heeda eapita jeeda ng'asheagaasa munyas.

⁸ Ak ghamneawa Ea NG'UTAMIIDA, ang'iing'i guwoosi ghweandeanya, aseasa geawooschi sheang'weeda nea ang'iing'i guwoosi siida sinneasa, aseasa eesa sean geewooschi gadiyeeda geatingaagu.

⁹ Ea NG'UTAMIIDA adinyareasi muuchi, nea Adiipkaadi ng'asheega munyas galeagasean, ng'ula, daaha aseasa eesa sean geewooschi fugaagu.

¹⁰ Mujiinajeagaagu ghaydidi niiw dareapcheeda Sayuni niiw dareapcheeda, Yerusalemu ea niiw raghoonyeanda.

¹¹ Ghaheanya diita ghaydit miyiin, ghayi gwarsiinaneey ghweanigaasaan, niyaak beasta, haleanjeedeanya sean miyaasiin nidatasa.

¹² Gajang'waanya geaw ea ming'uli ng'asheesu. Ea NG'UTAMIIDA? Gaysiinda ak gisawanyeasa muuchi?