ISAYA 63 - Bibliyeeda Ghaydit

Jooriischooda Ng'utamiida aba heeda eemoojiga

¹ Siisi leabu Edomuun ng'eaha gil, nea gaba hang'weaka mideawa foojeanda nea gwaleabu Bosra? Nea gwandeawa hang'weaka ghaambiidaat, ak ghabeawa uurdaanyi, “aniini gearugu aba doobiiwnata, nea geawooschi daruus aba weeta.”

² Ghwasaan anda hang'weakaagu ea areeri, ea gawuurji gea siida muura sabiibu?

³ “Huumwa, geamuuray sabiibu nea gabwageaw, ak ea manda siida hidu ghaweadan. Ghaalaabwaadi eemoojiga aba nyarasteanyu, geagulguli aba nyarasteanyu, ak hang'weakeasu ea sibwara ririnnyeanda foojeanda nyaawa, ak hang'weakeasu sean ea naabwari ririnnyeanda.

⁴ Aba gideaba eaweeda waldeayda mureandooda gabean gwanda jeeda gurooroodeanyu. Nea gweayda jea deatina ea nihidu.

⁵ Geang'ulayi ak ea manda siida jea ghaweadan, ghahamnyi ng'eanyi ak ea manda siida mida meatkweedeanyu. Asi lealeanooda gweanean geatindeanyu, ak ghaweadan nyarasteanyu.

⁶ Ghaalaaplaapchi buuneeda aba nyarasteanyu ak ghaanung' gaboogidi aba nyarasteanyu, nea ghaanung' gaweay ng'eanyi foojeanda nyaawa.”

Alooheeda NG'UTAMIIDA aba heeda fuga Israeli

⁷ Gaydargu alooheeda NG'UTAMIIDA, ea giigheambiita NG'UTAMIIDA, aba ng'asheega sean sinneasa NG'UTAMIIDA, aba seang'ayda alooheadaanyi aba gheeh Israeli, nea gwasinneasa baydeaydaanyi aba seang'ayda alooheadaanyi.

⁸ Aba gideaba gwayi aba huumwa suh fugeasu gil, orjooga meaka gheanyanga buuneeda; ak gaydoaw lealnoocheanda nyaawa.

⁹ Nea aba sawanadeeda nyaawa sean, ea miigoojeakta siinuut jea ghaweat, ghwahidu ninyeesean ghaweat. Ak gootina bariinyeagaaschi ea baydeayda ghang'eada garayi ghwasar ak ghwaat.

¹⁰ Hean geaheawa niny, ak geenyareas gurooroadaanyi ghaydit, hean gwayamsa geaw ak ghoah weajoocheanda, ak gang'uchi sea saawa.

¹¹ Hean ghoapkaat damanda ghayi bea garayi bea Musa, was siidaanyi bea gadiyeeda. Gwanda yeenu dea ghayi ascheeng'na basooda sea jeagiischoodiga gisilgaaschi? Gwanda yeenu dea ghayi iin Guroorooda Ghaydit bugusta nyaawa.

¹² Ghayi adoabiiw aba geatindaanyi ghaambiidaat, aba geatinda dugwa bea Musa? Ghayi nung' gwaheeli beega aba madeanyaawa ak gwasissa geaw gheawunga manda muudeanooda.

¹³ Ghoadoabiiw aba bugusta basooda bea beega sheagi jih? Nea gawuurji faraasi aba eeshtearajeanda aba gideaba adagwaruusa geat.

¹⁴ Gawuurji dugwa rarang'eesa moangoachi, ak saawa ghwanung' guroorooda NG'UTAMIIDA gafuuf. Asi ea gida iidoabiiwdi fugaagu gil, ak gisisi geaw gheawunga ghaambiidaat.

Mooshta ASEETA bea baydeayda ea weeta

¹⁵ Ng'uleasa nea gindi humng'eeda ak ging'uleasa nea gindi heeda iibiiti ghaydit nea ghaambiidaat. Gwanda yeenu badiidaang'u aba badaydeanya ea uurdaang'u? adinung'waadi giihiimnooda bariinyeagaagu aba heedeanyu.

¹⁶ Aba gideaba ang'iing'i guwoosi ghweandeanya earapeadi Abrahamu mwanaleasa, iinea eara Israeli ea moapkaadeasa. Ea NG'UTAMIIDA ang'iing'i guwoosi ghweandeanya, lealnoocheandeanya ghang'eada garayi suh gheawungaagu.

¹⁷ Ea NG'UTAMIIDA ghwasaan anda ginung' easchoora naweadingaagu nea ginung' gahang'oonyiidi gurooruunatkaasa ea ea mudeawaleey? Biikni aba badayda fugaagu bea gadiyeeda, eemeeda hearaniischoadaang'u.

¹⁸ Fugaagu ghaydidi, ambaliischi gili mwanang' weajoodigaasa niila headaang'u ghaydit.

¹⁹ Siwuurjeewi fuga ghayi mii ambala earahay, geewuurjeewi fuga meeguuriisiina aba gheawungaagu.