ISAYA 60 - Bibliyeeda Ghaydit

Giigheambiita Yerusalemooda eesh

¹ Ng'eada aboang'da, aba gideaba weeshindaang'u nihidu, ak ea giigheambiita NG'UTAMIIDA.

² Aba gideaba ng'ula, gaygwadukuta ng'eanyiida misaneeda, nea gwadukuta misaneeda haw buuneeda; nea NG'UTAMIIDA gayghoabwaanyi, ak giigheambiitaanyi gajeadaah aba headaang'u.

³ Ak eemoojiga gayghapka heeda weeshindaang'u, nea eara sugoodiga gaygaweesa weeshinda iboong'si.

⁴ Gatgada gheanyangaagu ak giing'weersi meadajeega sean, ghabwatgeat sean ak ghapka headaang'u, gayghapka orjoagaagu nea gwaleabu deasheagi nea haweagaagu gajeasareena geatinga.

⁵ Hean inyeesa gidaahi gaynyasa weeshinda, ak gayghabwadan gurooroadaang'u nea gahoosan, aba gideaba baruureega basooda gajeekealu headaang'u, nea eara baruureega eemoojiga gayghapka headaang'u.

⁶ Gaygwadukuta ng'eanyiidaang'u hawanda ngamiya, asaha muhooga ngamiya leabu ng'eanyiida Midiyani ea Efa, ea gea leabu Sheba sean gayghapka. Nea gweadu dahaabu ea hideeda ng'andidi, nea gwarukwiida alooheeda NG'UTAMIIDA.

⁷ Gayghabwat geat hawanda sean bea Gederi aba headaang'u, ak gaygadiyeata lagweendiga Nebayoti, ak gajadayda lukghumeeda simwas aba heeda wagiida Ng'utamiida, ak gayghoaghaambiit gheanyi ghaambiidaat.

⁸ Suh naaha ng'eetiideayda shamooghuutkean naaha gil, nea gawuurji ghariibajeega weay jeeda ghoorajeega nyaawa?

⁹ Aba huumwa gayghoamuukghunaan ng'eanyiida ghuuta baskweega, nea gidamadeeda ea maleambajeega hees bea Darshishi gil, ak gaygweadu orjoagaagu aba deasheagi, ea lapiyeenyaawa ea dahaabu, sea saawa, aba gheawunga NG'UTAMIIDA was ASEATAANG'U, ea aba badayda Deaghaydit Asagi bea Israeli, aba gideaba siikghaambiinyi.

¹⁰ Ak ghamardaang'u gayghwadeas rabasta, nea gagadiyeeseey sugoodiga nyaawa; Aba gideaba ghaabwarjeey aba nyarasteanyu, nea aba shiitmeedeanyu ea naabwaydaneey.

¹¹ Nea gidaghuudajeagaagu gajea jaadaat galeagasean, mwajeajap askweari ghana eawa; aba gideaba gaygweaneey buuneeda baruureega eemoojiga, nea sugoodiga nyaawa gayghapka nea ghwaroapgeat.

¹² Aba gideaba gilinyoo ea eemoojiga gil ea sugoocheanduumeeda buuneeda gea magasa gagadiyeeseey gajealas uhuuda; Asaha eemoojisu gajealas uhuuda.

¹³ Gayghwahidu headaang'u giigheambiita Lebanoni, ea hoonyaweanda, ea lagawjeanda, ea masagharajeanda, ak gajeataamdaam heedeanyu ghaydit; ak gaydasissa suulga heechea deabiida.

¹⁴ Ak gayghapka orjooga fuga ghayi ghabwasnyi headaang'u ak ghwahiiy geat aba madeadaang'u; ea gea ghayi foolnyi sean gaygwatkuy aba madeeda geeshangaagu, ak gajeeguureewaneey Mujiineeda NG'UTAMIIDA, Sayuneeda dea Ghaydit Asagi bea Israeli.

¹⁵ Aba gideaba sinung'useey heeda ak geasinyi, ak ea manda eara siida sigu headaang'u, asi gaydagoonyi hawunda damanda manda muudeanooda, ea hooseaneega jeacheenga saang'a.

¹⁶ Gaygweaneey eemoojiga gichea aga, ak gaygweaneey sugoodiga hamita miy; abeeda gaynala gideaba aniini geawooschi NG'UTAMIIDA ea lealnoocheandaang'u, ea giitinoocheandaang'u was dea hoauur asagi bea Yakobo.

¹⁷ Hoorgeeda lagheanga oomng'i, gaydeadu dahaabu, ak hoorgeeda gharinyeanda gaydeadu lapiya; hoorgeeda geeta, lagheanga oomng'i, ak hoorgeeda lagheanga, gharinyeanda gil. Ak fugaagu ambaliischi gaydaadaw hoyyoo, nea ghaadawji doobiiwnata giika ang'oonyi lapiyeedaang'uun.

¹⁸ Ak jaliida ea mwaygudiinya aba jeeda ng'eanyiidaang'u, ghana ng'asheega dataseadi aba moonghoadaang'u; ak gaygureewana ghamardaang'u lealeanooda, nea dooshingaagu giguuri giigheambiita.

¹⁹ Nea aseeta ea maygutgwadagu askweari, nea eara sheeda ea maygwadagu weeshindaanyi, aba gideaba NG'UTAMIIDA gayghoah weeshinda manda muudeanooda aba headaang'u. Nea ASEATAANG'U gayghoah giigheambiitaang'u.

²⁰ Ak ASEATAANG'U ea maygutgamikta, nea eara sheadaang'u ea maygamikta, aba gideaba NG'UTAMIIDA gayghoah weeshindaang'u damanda manda muudeanooda, ak askwearjoojigaagu jea gutuuni heareega gaygoosha.

²¹ Abeeda fugaagu gajea doobiiweadi sean, ak gaygwahearan ng'eanyiida damanda manda muudeanooda. Nih damealeanda aang'aapti aniini gil was gadiyeeda geatingeasu, ak abeeda geakghaambiidan.

²² Daamwanang' aba jeedeang'wa gayghoah dooshta, nea dea mwanang'eawa sean gayghoah eemeeda haw. Aniini geawooschi NG'UTAMIIDA, iihita damanda gaydasin suh nea ghaalamwaji.