ISAYA 6 - Bibliyeeda Ghaydit

ASEETA gaguursa Isaya ghoah sibaneeda

¹ Gweaydida meawa sugoocheanda was Usiyahiin, ghaadaayi NG'UTAMIIDA nea goopteada aba hoorgeadaanyi bea sugoocheanduumeeda, mida heetiyeada muuchi nea siitiing'da muuchi, ak weeleeda hang'daanyi ghwanyiit jeeda gheeda sibata ASEETA

² Nea gwanda uhuudaanyi malaykajeega, nea gaba nih mideawa miin lah, iyeenya gwadukuteawa gheamamdaanyi, nea iyeenya gwadukuteawa geeshangaaschi nea iyeenya ghang'eataawa.

³ Ak gaba nih guursa nuut nea gwayeesha, “Dea Ghaydit, dea ghaydit, dea ghaydit NG'UTAMIIDA lugweega gil; ng'eanyiisean ghwanyiit giigheambiitaanyi.”

⁴ Ak ghwanung' nyeashta ghuutaanyi ghwaduumduum sindeeta gheeda sibata ASEETA, nea ghwanyiit aroosta jeeda gheeda.

⁵ Hean geayeenyi, “Deashageadi! Aba gideaba naaroachi aba gideaba aniini geawooschi siida muy ghuut, ak geabiidi bugusta fuga munyasi ghuusi, ak ea naadaayi sugoocheanda, was NG'UTAMIIDA bea lugweega.”

⁶ Hean ghang'eata malaykajeanjagi aba jeedeaba giika ea gwaneekiisean nea geatindaanyi gwanda rarayga beasta. Nea ghoang'waanya gharinyeanda aba heeda wagiida.

⁷ Ak ghwasat ghuuteanyu aba raraygiga nea gwayi, “Ng'ula, naang'udi ghuutaang'u gili, ak munyindaang'u ea sigeanda nea eara riing'eadaang'u ea sisamsa.”

⁸ Hean ghaayiinyi ghuuta NG'UTAMIIDA nea gwayi, “Gaydeajeakta ng'eaha, ak gaygawa ng'eaha aba badaydeanya?” Hean geayeenyi, “Geandi hiji! Ajeaktanean aniini.”

⁹ Ak gwayi, “Una ak giyeeshi fiisu, “‘Gajayiinya ak ea majanala gil; gajoang'wearda ak ea mwajadaaha gil.’

¹⁰ Nung' gwadasheahiidi fughareengeaba fiisu, nea gidukuti iidiga nyaawa, ak gidukuti gheanyanga nyaawa, adaghwadaah aba gheanyanga nyaawa, ak ghwayiiy aba iidiga nyaawa, ak ghwanal aba jeesinga nyaawa, ak gwaduukuuna ak geahaap.”

¹¹ Hean geayeeshi, “Ea ghoah eeju, Ea NG'UTAMIIDA?” Ak gwayi, “Bwak ea ghang'ut mujiinajeega salgheang'da, nea mutugwanda jeeda sih, nea eara jeeda gealga ea mutugwanda sih, ak eara ng'eanyiida gajea sidatas muuchi,

¹² Ak gaygoobaleak NG'UTAMIIDA buuneeda ea goosheagiit, ak gayghwasaang'ayiit eemeega aba jeeda ng'eanyiida.

¹³ Earapeadi boos akaleala aba jeeda gea atamanamughuush, gajeaghwarda gicha, gawuurji loongeanda ea sabiida, siipuut hawunyeandaanyi earapeadi silach.” Ak histeayda ghaydit ea hawunyeandaanyi gil.