ISAYA 59 - Bibliyeeda Ghaydit

Sibaneeda gweaksa habeawooda riing'eega buuneeda

¹ Ng'ula geatinda NG'UTAMIIDA mii nuwaas ea ea mudughoamu gwalealneegwa, nea eara iitaanyi ea mii miinyi ea ea mudughoamu gwayiing'shi;

² gea aheelaneegwa sea ASEETEANG'WA riing'eegeagwa gil, ak ghafuy geaw ea gwasheagiit aba heedeang'wa aba badayda riing'eegeagwa, ak ea mooleeyseegwa iit.

³ Aba gideaba geatingeagwa sing'uda ririnnyeanda aba foojeanda nea mooringeagwa ea sing'uda ririnnyeanda aba ng'asheega munyas; ghuusigeagwa gabaloola ng'uyeega, nea ng'ushapkeakeagwa gameang'sheesa gea munyas.

⁴ Manda siida ak siileeda doabiiwaat, ghana siida argweaksa nuut aba huumeanda; inyeesa ghwarar gidamwadaagha nea gabaloola ng'uyeega, inyeesa gwasin milmilanda jih ng'asheega munyas.

⁵ Inyeessa ghoabuut burunga ichibooda, nea gwasin gheareedanga diyeayda ghasmeahooda nea siida ak burunga nyaawa gayghami, ama sinyarja burung'nyeanda gwarina jeeda ichibooda.

⁶ Ak gheareedanga nyaawa ea mii hang'weaka; ak ea majeekwa aba gadiyoojiga nyaawa gadiyoojiga munyas, gadiyoojiga ng'asheega munyas gil, nea sinaweega nyaawa munyas gwanda geatinga nyaawa.

⁷ Geeshanga nyaawa gang'eang'eesa sinooda ng'asheega munyas, ak ghwalamwach ghoahiida foojeanda manda giidiinyeanda; aba giiteemshoonyaawa gooteemsheesa ng'asheega munyas, raghoonyeanda ea ng'asheega dataseadi gwanda jeeda naweadinga nyaawa bea bareanda.

⁸ Ak ea mwanala naweeda doabiiwaat, nea manda girgweageeda doabiiwaat aba jeeda giibinda nyaawa. Nisissa geat naweadinga nea roodeadi, gilinyoo gwasik jeedeaba naweedida mayghwanyas hoyyoo.

Buuneeda gwaduukuuna riing'eega nyaawa

⁹ Aba badaydeaba nih girgweageeda doabiiwaat ea sheageewaneasa, nea eara doobiiwnata ea maygwahiseasa; gwachi geararji weeshinda ak ghamneawa gwardu misaneeda, geerarji heedeesh, ghamneawa geeweayi jeeda misaneeda haw.

¹⁰ Geang'waanyaadi ghamarda eewuurjeewana siida ng'oaw, asi geang'waanyaadi eewuurjeewana fuga manda gheanyanga, geeruusaadi askweari gawuurji damanda gapkeanda beashata, nea aba jeeda gea mideawa uurjeenga geewuurjeewi muscheeka.

¹¹ Aseasa geendeawi nyeashta uurji dea ideamooda, ak geanyahuushi eewuurjeewana ghariibajeanda, ak geararji girgweageeda doabiiwaat ghana ea mandana, ea lealeanooda, ak guwoosi sheageeweasa.

¹² Aba gideaba giidiinyeanyeekaasa nisaang'ayiit aba madeadaang'u, nea riing'eegaasa gamuuwu aba badaydeanya. Aba gideaba giidiinyeanyeekaasa geendeawi aseasa, ak munyasnacheakaasa ea sinali:

¹³ sinung'usi NG'UTAMIIDA heeda ak ea siheawi niny, ak ea siheawi eayaada geeshta ASEETEANYA; ng'asheega munyas ea heeheeweega ng'asheega simanyay gil, aba jeesingaasa geeng'aday ea eerukuna ng'asheega ng'uyeega.

¹⁴ Ak girgweageeda doabiiwaat ea sijaksa bwadaw, nea doobiiwnata easheagi muuchi; aba gideaba huumeanda niibisa ghuuta naweeda bareanda, ak doobiiwnata ea mayghwahidu jeeda.

¹⁵ Ak ghwashaadeaweasa huumwa, nea danung'waada ng'asheega munyas geaghabwas. Ng'utamiida ghwadaah ng'asheesu ak ghwanyareas, ghwanyareas aba gideaba manda girgweageeda doabiiwaat.

NG'UTAMIIDA gwareapshi gwalealu fugaaschi

¹⁶ Hean ghwadaah gideaba manda siida, ak ghahamng'eanyi aba gideaba manda siida mwaash ghawooda, asi geatindaanyi ninyeesean dea eadu lealeanooda gil, nea dea weat niny ea doobiiwnata gil.

¹⁷ Gookwa doobiiwnata gawuurji hang'da sidiiwa daghanuunatka, ak lealeanooda gawuurji ngoofajeanda gharinyeanda bea uhuuda; ak gaygookwa mureandooda gawuurji hang'da, nea gwadukuta geaw gawuurji hang'da geaw gulng'eanyi.

¹⁸ Gayghabwar weajoodi aba giteena sinaweega nyaawa, asi nyarastaanyi ea waldeayda gayghwanyas weajoodigaaschi, gayghabwar eara fuga mida ng'eanyiida ghuuta basooda.

¹⁹ Asi gajeawal gheang'da NG'UTAMIIDA ghang'eada heeda biyeara, ea giigheambiitaanyi ng'eada heeda ghayeawa; Aba gideaba niny gayghwahitaayda ghealooda beega gulda, gutguta giisiimeanda NG'UTAMIIDA.

²⁰ “Ak lealnoocheanda gayghwahidu Sayuni, aba geanung'waada ng'asheega nyaawa munyas bea jeacheenga Yakobo gwarugu NG'UTAMIIDA.

²¹ “Nea aba ng'asheegeasu, nih neajeedeanyu gil aniini ea saawa, gwarugu NG'UTAMIIDA gurooroodeanyu mida badaydaang'u ea ng'asheegeasu aayiinyi ghuutaang'u maygoosiipteawa ghuutaang'u ea ghuuta diibigaagu, ea ghuuta diibiga geaba gaagu, gwarugu NG'UTAMIIDA ghang'eada ghamneawa ea ghoah damanda manda muudeanooda.”