ISAYA 58 - Bibliyeeda Ghaydit

Giiluuldeaydeaba geaw bea huumwa

¹ “Ajuura aba nyeashta nea adisindi, aheeni daghataang'u gawuurji durumbeati; rukusiina fugeasu giidiinyeanyeeka nyaawa, rukusiina fuga gheeh Yakobo riing'eega nyaawa.

² Ak gagaseadayean galeagasean, gagasa ghwanal naweadingeasu, gawuurji eemeeda Sini gea doobiiweadi, nea mwanung'waada deaweedeeda ASEETA nyaawa, ak aba heedeanyu gagasa diigheanda doabiiwaat ak gahoosan aba gideaba gwaneekiisa ASEETA.

³ Nea geeyeesha, ‘Ghwasaan anda geeluuldi geat ak ea midaahi? Ghwasaan anda geesawanyi saseenuukaasa ak ea miing'weerni?’ Anala gideaba damanda ooluuldeawi geat googasayi miyeenoodeang'wa nea goobea geat nea ghoanung' ghoah sareenda aba heeda fuga Sini gadiyeeda aba heedeang'wa.

⁴ Ng'ula, agooga gooluuldi geat aba gideaba googasayi oang'eada ghuuta jaliida ea ng'ucheeda inyeesa gooluuldi geat aba sareani abeeda mooshteang'wa bea ghawooda mayghwahidu heedeanyu.

⁵ Heapi giiluuldeaydeaba geaw sunu dea ghayi aaloachi? Heapi damanda jea gwasawan siida saseadaanyi? Gayghwahiiy geaw ghwayiin uhuuda ng'eanyi gawuurji nyeeshtooda. Nea ghoabwarghaan hang'weaka was guniyajeega nea hing'eadaydaanyi gwanda deareeda, asi gajeena nih giiluuldeaydeaba geaw jea ghamwas NG'UTAMIIDEA?

⁶ “Manda, giiluuldeaydeaba geaw eagasayi nih gil: asiksiina fuga mida ghealooniga ghayi sirat mwadaagha, nea geegeanda yookajeega ghayi sirada, nea gea sighabwas goonung' goobal geat, nea goohirjeaweadi gil nyooh ea yooki.

⁷ Giiluuldeaydeaba geaw bea huumwa gideaba gajadawa fuga bearji jalooda hamitaang'u, ea gideaba nung' ghapka gheang'u fuga barbari manda heeda jea goobiida; ak giidawi hang'weaka fuga mandeawana hang'weaka, nea giweadi eara buweadeagaagu.

⁸ Abeeda weeshindaang'u gaygawuurji gidagharda gayeew, nea iyoomnyaanyi gajabean ahaabwa, ak doobiiwnataang'u gaygawa madeadaang'u, ak gaygweadu geashtaang'u giigheambiita NG'UTAMIIDA gafurnyi.

⁹ Hean abeeda gayguurda ak gayghwanya ghuuta NG'UTAMIIDA; gajayeawda ak gaygwayi, Geandi hiji. “Inyeessa gigeandi yooki aba jeedeang'wa, nea mimiindani mooneeda nea mirukuni ng'asheega munyas,

¹⁰ Agooga inyeesa ghoatawji fuga bearji jalooda gichea ghwaak nea ghoatawji eara fuga mida jeeda sawanadeeda haleanjeeda gasa, abeeda damanda misaneeda gajanyasa weeshinda misaneedeang'wa gaygawuurji askweari.

¹¹ Ak gayghoadoabiiwnyi NG'UTAMIIDA galeagasean, ak gaygoolang'u saseadaang'u aba heeda manda beega, nea goomajeek geakaagu; ak gajuurjeewana boostaaneeda siyiin beega, ak gawuurji gheang'deenda mayghoashoay beega.

¹² Ak fugaagu gayghwadeas heeda was raghoonyeanda, ak gaygagatkat sindeecheeka jeacheenga saang'a ak gajeeguureewaneey dadeas heeda nyaraat, ea dea adeelsa naweadinga jea eepiida.

Giimearda aba ging'ooyda eaweeda sabaato

¹³ “Inyeessa gisaji geeshtaang'u ea mwadatasa sabaato, adiyaagi miyeenoadaang'u eaweedeanyu ghaydit, ak giguuri sabaato eaweeda ghweelmeeda was eaweeda ghaydit bea NG'UTAMIIDA bea mureeda; nea giighaambiidi, ak ea misini naweadingaagu nea gibwaageaw, ak ea migassi gea jea goohoosanyi, nea mirukuni ng'asheagaagu nea gibwaageaw.

¹⁴ Abeeda gajahoosana geaw aba heeda NG'UTAMIIDA, ak gaydeadiing'daneey heetiyeada bea ng'eanyiida; ak gaydanung' aga hearanda Yakobo was gweanu, aba gideaba ng'asheesu gwarugu ghuuta NG'UTAMIIDA.”