ISAYA 57 - Bibliyeeda Ghaydit

Geamwaashta aseecheeka fuga Israeli

¹ Siida doabiiwaat iimea, ea manda siida duupa gil, ama inyeesa ghami siida miy seara, ea manda siida ateemshi nea gwayi. Siisi miyiin sigeanda ea mayghwanyas habitkweeda.

² Niny gaygawa jeeda hoyyoo; nea saawa ghwaak miyeenooda aba bulaleenga nyaawa ak gaba nih weah jeeda doobiiwnataanyi.

³ Ak agooga apkaana hiji, ea orjooga gatmooda was beeneetkweanda, ea jeata hiseadayda.

⁴ Agooga goomachiidi ng'eaha? Ghoabwara ghuusigeagwa aba badaydeabeang'a, nea gooruudu ng'ushapkeakeagwa? Heapi agooga moowoosi diibiga roodaweega? Was jeata ng'uyeega.

⁵ Agooga inyeesa gageawiit gheanyangeagwa aba heeda sawachoojiga, ea gili nyooh ea geeta nyawiiri seenga, agoogeeda inyeesa goonuuschi diibigeagwa aba jeeda moangoachihajeega, aba hing'eadayda beareega lagheanga?

⁶ Inyeessa ghoaloachi lagheanga bumbuni bea moangoachi; ak ghoanung' ghoah gheapooshta eaweegeagwa; Ak gooyamsi haleanjeeda sisabwa geadi bea ghadooweeda bea leeshooda, nea gooyeasi haleanjeeda sisabwa geadi was booga, heapi aniini gaydamwas haleanjeeni?

⁷ Ang'iing'i giyiini bulaliidaang'u uhuuda giijeeda geaw mida humng'eeda muuchi, ak guwi hoowa adayda lukghumeeda.

⁸ Nea badayda gidaghuuta ea huwanga niyiini giipkeataang'u; aba gideaba niidahaaji saseadaang'u aba badayda siinuut mii aba badaydeanyu gil, amahit gischeang'di, niihaadi bulaliidaang'u ak gisini neajeeda sea suh, gibwariinyi bulaliida nyaawa damanda idaahi.

⁹ Guweesi sugoocheanda ea nagheeda ng'andit ak giihaadi nagheadaang'u ng'andit; ak giijasoodigaagu gaweay deasheagi, ak giihiing'u geaw muuchi ea hita gheeda maloonghajeega.

¹⁰ Abeeda niibuurnyi geawunda naweadaang'u, ak ea mii eena, “Manda rarooda”, ak geanung' nyasa uurda ak ea miighoang'waay geeyooda.

¹¹ Ak giiwali ng'eaha ea ghang'udaneey giyoonda, ea napa ng'uyeega ak ea mii apkaadan, nea mii iina suh jeeda gurooroadaang'u? Heapi aniini ghang'eada garayi mii dasiinda ak ea miiwali gheang'deanyu?

¹² Aniini gaydarukuta doobiiwnataang'u ea sinaweagaagu, ak ea mayghaweadaneey gil.

¹³ Inyeessa gooyeawdi nea googasayi weeta, abeeda daweadeagwa sanaamajegeagwa oamughuushchi! Ak gayghwaat jeameeda ea goosheagiit, nea gwajakta giisiimeanda ea goosheagiit. Nea gea jea gamng'aw ghapka heedeanyu gaygoombal ng'eanyiida.

Neajeeda ASEETA bea weeta buuneeda ea giiheapta

¹⁴ Ak gaygwayi niny, “Adeasa, adeasa, asina naweeda, ageanda haleanjeeda jea gwaruusa fih aba jeeda naweeda fugeasu.”

¹⁵ “Nih ginyah ASEETA mida humng'eeda sheagi gil bea giibinda manda muudeanooda, nea gheawungaaschi ea Ghaydit. “Aniini geabiiti humng'eeda heeda ghaydit, ak geendeayi sea fuga niduukuuna ea gea eadageat ng'eanyi, ak gaydeamajeek gurooruunatka gea eadageat ng'eanyi, nea ghaadawji uurjeenga gea niduukuuna.

¹⁶ Aba gideaba maygudu deata ghuut, nea maydanyareekiisa galeagasean; Ak abeeda suh aabwachiin, gaygang'arng'ariidi aba madeedeanyu, ak giisiimeandeanyu bea eaweega ghaadawji aniini.

¹⁷ Aba badayda ng'asheagaaschi munyas bea geawunda gheang'daanyi, ghaanyareaschi, ak ghaalaschi, ak ghaafunyi gheamamdeanyu ak ghaanyareaschi; ak gawa mwadi aba hang'ooynata uhuuda nea ghwaat naweeda gurooroadaanyi nea gabwageaw.

¹⁸ Naadaayi naweadingaaschi ak gaydaahaap; ak gaydaadoabiiw hawdeaydaanyi, niny, sea suh ayeawusean.

¹⁹ Aniini geasinyi haghweega ghuuta hoyyoo, hoyyoo, aba dea mida deasheagi, ea dea mida dea heeda neeki gwarugu NG'UTAMIIDA, ak gaydaahaap niny.

²⁰ Ak fuga munyas seara gawuurji basooda aluuja laweajajeagaaschi, ak ea mayghwasiinda, ak beagaaschi gooruudu sheang'weeda ea ririnnyeanda.

²¹ Gwayi ASEETEANYU, “Fuga munyas seara maydaadaw hoyyoo.”