ISAYA 56 - Bibliyeeda Ghaydit

Fuga ASEETA gaygaguuyi sean sea eemoojiga

¹ Gwayi NG'UTAMIIDA: “Asina girgweageeda doabiiwaat nea goopiidi jeeda doobiiwnata, Aba gideaba lealeanoodeanyu nineekiit, ak gajeataajiit doobiiwnateanyu.

² Ghang'wana siida ang'waay muuchi ng'asheesu earguun, ea orjeeda siida dea ang'waay muuchi, nea ghoang'waay deaweedeeda sabaato aba mureeda nea ghwasaja geaw sinooda ng'asheega munyas sean.”

³ Nea rabascheanda mideayi sea NG'UTAMIIDA, adagwayi, “Aba huumwa NG'UTAMIIDA gayghwasajanaan fugaaschi”; Nea siida was gulaneeda adagwayi, “Aniini geawooschi geeta ghajaam.”

⁴ Aba gideaba NG'UTAMIIDA gwayeesha: “Fuga was gulanga gea ang'waay sabaatoheedeanyu, ak ghwaat geeshta ng'asheega aabwariinyi nea ghoang'waay muuchi neajeedeanyu,

⁵ suh aba jeedeaba gheenyu ea jeeda ghamardeanyu gaydaadaw gichea goopkeadi ea gheawunga miyaas ng'al gideaba gaymideawana orjooga ea haweega, ak gaydaadaw gheawunga jea goobiida damanda manda muudeanooda dea majeejakta earahay.

⁶ “Ak rabasta mideayi sea NG'UTAMIIDA, ak gagadiiyeesa, ak ghabwariiy gheawunga NG'UTAMIIDA, ak ghoah fugaaschi bea gadiyeeda, nea gilinyoo ghoang'waay sabaato ak ea mwadatasa, ak ghoang'waay neajeedeanyu–

⁷ Suh gaydeadu ea daahiidu giijeedeanyu ghaydit, ak gaydeahoosan aba jeedeaba gheenyu bea badita ASEETA; haleanjeeda nyaawa sisabwa geadi bea ghadooweeda sighwarda, ea lukghumajeega nyaawa, gajeamwas aba heedeanyu bea wagiida. Aba gideaba gheenyu gajeeguura gheeda jea eebata ASEETA bea eemoojiga sean.

⁸ Gwayi NG'UTAMIIDA was ASEETA, dea bata geat gea ghayi sihoan bea Israeli, gaydabwadageat suuk aba headaanyi gea ghayi deena gea ghayi sibwada geat.”

Fuga hees bea Israeli geeyeata ghuut

⁹ Diyeanga ng'weani sean, ea diyeanga dareabeeta sean– apkaana ayaaga fugeasu.

¹⁰ Furiischoodigaaschi ea ng'oowi, ak ea mandeawana fughareenga sean, ak sean ea gudajeega manda ghuusiga gil, mwaamu ghwareakghta, inyeesa goorgweadi nea gwalil, nea inyeesa ghabwariiy ruweanga.

¹¹ Ak gudajeesu ea ng'weani jeesin muuchi, nea maygwalang'u earahay, suh jeagiischoodiga mwanala gil, ak ea niyam geat sean gaba nih aat naweadaanyi ak gaba nih gasa nyageadaydaanyi aba meadajeega sean.

¹² Hean gwayeeniisa geat, “Apkaana eeweaya eegasa difaayi, apkaana eeleesheena eelang'uuda aba difaayeeda heeseadi, ama numuji gaygawuurji ghamneawa; nea gajea ghweelmeeda haw muuchi gil.”