ISAYA 55 - Bibliyeeda Ghaydit

ASEETA ghoadayda baydeayda

¹ “Asi giliwas sih bearji muwooshta, apkaana heeda mida beega; nea dea mandeawana lapiya, apkaana, ashaaha ak ghoayaaji! asaha apkaana ashaaha difaayi ea eanooga nea majootayda lapiya ghana gida sheayeeda haw.

² Iijea oatayda lapiya aba gida mawoosa hamita? Ak googadiyeesi gidamwajanyasa lang'uudadeeda? Ooleeysean iit muuchi, ayaaga gidamiy, ak goohhoosanyi saseanuukeagwa aba ghashneeda.

³ Oaleaydiit ak ghoapkaanyi heedeanyu; ayiinya, ak gajanyasa giibinda; ak gaydasin neajeeda manda muudeanooda sea agooga, asaha ea baydeayda majeek bea Dawdi.

⁴ Ng'ula, niny naanung' ghoah muushoocheanda buuneeda, ak gwanda madeeda buuneeda nea shirikarajeanda haw bea eemoojiga buuneeda.

⁵ Ng'ula gayguursiina eemoojiga minali, Ak gaygwasalu ghapka headaang'u eemoojiga mwanalnyi, aba badayda NG'UTAMIIDA was ASEATAANG'U, ea aba badayda Deaghaydit asagi bea Israeli aba gideaba niighaambiinyi.

⁶ “Agasa NG'UTAMIIDA aba gideaba gayghwanyagaan, aguursiina iidu eaneeki;

⁷ fuga munyas danung'i naweadinga nyaawa munyas, fuga munyas danung'waada giiteemshooda nyaawa munyas dabiksiina NG'UTAMIIDA, ak gayghabwayda, ak gaweesa ASEETEANYA ak gaygwasamsa.

⁸ Aba gideaba gideateemsheati mii gidooteemsheati agooga gil, nea naweadingeagwa ea mii naweadingeasu gil, gwarugu NG'UTAMIIDA.

⁹ Aba gideaba gidasheagita humng'eeda muuchi, sea ng'eanyiida, asi eara naweadingeasu ea sheagachi muuchi sea naweadingeagwa ea gideateemsheati ea gidooteemsheati.

¹⁰ “Aba gideaba gidawunda roopta ea gapkeanda leabu humng'eeda, ak ea mabiikta humng'eeda, ak gwaroobassa ng'eanyiida, ak gwardu nyeega ea geediga ak gwaheetu, ak ghoadaw siida hisiida histeanga nea ghoadaw siida gichea ghwaak,

¹¹ ea gichea gawuurji ng'asheandeanyu leabu ghuuteanyu gil; maygabiiksean mwadaagha. Gaygwasinda gideagasiidi, gayghwanyagaada aba ng'asheega ghayi eajeakteawi.

¹² “Aba gideaba gajarita nea goohoosanyi, ak gajeatoabiiweegwa aba hoyyoo; ak gaygwasarmana giijeega ea heayeeniga aba madeedeang'wa nea ghabwar geediga sean bea dareabeeta baneaguuka.

¹³ Ak heeda gwachi jea gwarina halaghweenga gwarina hoonyaweanda; nea heeda gwachi jea gwarina ng'eamga gwarina mareambiida; Ng'asheanji gayghoah gichea ghwanyasta NG'UTAMIIDA gheawunga, ak gayghoah gwadeagooda manda muudeanooda nea majeejakta.”