ISAYA 54 - Bibliyeeda Ghaydit

ASEETA ghabwariiy fuga Israeli

¹ “Sarmana ang'iing'eeda uwoosi soonooda, ang'iing'eeda mii jiila; ajuura aba sarmeeda, ajuura ang'iing'eeda mindeawani lajooda! Aba gideaba diibiga diita sinung'wiin aasaang'a ea gaburdeawa diibiga dea sighi gwarugu NG'UTAMIIDA.

² Aheeni heeda maheemajeandaang'u, ak geetaarda hang'weaka beashooda bea heeda iibiiti; adiheawi ahaada geawunda ghealoonigaagu amajeega guhuunatka maheemajeandaang'u.

³ Aba gideaba ang'iing'i gayghoahaada meadajeega sean bea geatinda dugwa ea geatinda ghaadaam ak jeataang'u gaygoombal eemoojiga ak gayghwanung' ghoah mujiinajeega ghayi niiw eemeega, goobiida buuneeda.

⁴ “Adibeali aba gideaba maybwaspwasa; nea adihirbiban aba gideaba majeapwaaspwaasnyi, aba gideaba gaygwarooseey baspaseega gheareemaneanduumeadaang'u, ea ng'asheega munyas siruku aba badayda masinung'weanduumeadaang'u.

⁵ Aba gideaba dea sinyi siyeadaang'u gil, NG'UTAMIIDA lugweega gheawungaaschi gil; ea Deaghaydit bea Israeli lealnoocheandaang'u gil, ak niny, gajeeguura ASEETA ng'eanyiisean.

⁶ Aba gideaba NG'UTAMIIDA niguurneey uurjeewana gatmooda sinung' ak geanung' ghang'ut gurooroadaanyi gurmeahiida, uurji gatmooda sijakta nea gudaamwanang', gwarugu ASEATAANG'U.

⁷ Neanung'useey heeda gili mwanang', nea aba baydeayda haw gaydeadeelneey.

⁸ Aba nyarasta haw ghafunyaneey gheamamdeanyu gilimwanang', nea aba alooheeda manda muudeanooda gaydabwaydaneey, gwarugu NG'UTAMIIDA was lealnoocheandaang'u.

⁹ “Aba gideaba ng'asheanji aba heedeanyu gaygawuurji damanda ghayi bea Nuhu: aba gidaghayi aayaakti habeawooda gideaba beega damanda Nuhu maygutgabiigu badayda ng'eanyiida gicha, asi naayaaji habeawooda gideaba maygutanyareekseey nea maydeawoowseey.

¹⁰ Aba gideaba giijeega gaygoosha nea eara heayeeniga gajeegeanda, ak bariinyeegeasu ea mayghang'amwa headaang'u, eara neajeedeanyu bea hoyyoo ea majeegeanda, gwarugu NG'UTAMIIDA bayiidaneey.

Yerusalemooda eesh

¹¹ “Ea ang'iing'eeda sisawan nea ghwaanyi shaarara, ak ea meahawdaneey, Ng'ula gaydayiin lagheangaagu oormeeda miy, nea sindeecheekaagu gaygaba lagheanga meaji ea oomu.

¹² Ak madalajeega gaydasina lagheanga ng'ooreadi, nea dooshtaang'u geasini lagheanga nyawiiri, ak ghamardaang'u sean geasini lagheanga hees sheaya.

¹³ Nea orjoagaagu sean gayghoanaal NG'UTAMIIDA, ak orjoagaagu gayghwanyas hoyyooyda haw.

¹⁴ Ak gaymajeegiida aba doobiiwnata; nea gajeasheagi ghabasta aba headaang'u, aba gideaba maybeala, giyoonda gajea sheagi ak ea maygwaneekiiseey.

¹⁵ Siida was sean jea ghwahidu headaang'u aba ng'ucheeda, meajeakni aniini, nea dea jea ghwahidu ng'ucheeda jea ghwahidu ng'ucheewana, gajealas uhuuda aba madeadaang'u.

¹⁶ Ng'ula, geasinyi siida adeang'shachi aseawiisa beasta duwayda, ak gwasin dabita ng'ucheeda aba gadiyeadaanyi. Ak geasinyi diita lasa uhuudean, ghwalas uhuuda;

¹⁷ gilinyoo ea dabita ng'ucheeda sisin aba gideaba eapka eeng'ucheeweey, maygwarachi gil, nea siida was sean jea ghwaanyi gheeda girgweageeda gayjoara. Nih gichea gwahearan fuga gadiyeeda NG'UTAMIIDA gil, nih gitoobiiwsa gil leabu heedeanyu gwarugu NG'UTAMIIDA.”