ISAYA 5 - Bibliyeeda Ghaydit

Duumda madamnyeanda sabiibu

¹ Nung'waada deadu sarmeeda siideanyu aabwariinyi sarmeeda siideanyu aabwariinyi bea madamnyeandaanyi bea sabiibu: siideanyu aabwariinyi gwandeawa madamnyeanda sabiibu mida uhuuda heayeeda mida sigeeda miyaas.

² Ak ghabwar muuchi nea gageanda lagheanga sean, ak ghang'aapta sabiiboodida siloadiin; nea gwadeeksa madalooda bugustaanyi, ak ghwadeas heeda jea eemuuriisa sabiibu, ng'ata ghoamuughu gwaji sabiibu, hean gwaji sabiibooda ng'weani.

³ Nea ghamneawa, ea agooga fuga ng'eanyiida Yerusalemu, ea fuga Yuda, geamuscheegwa gideaba ooheelanean aniini ea madamnyeandeanyu bea sabiibu.

⁴ Neada gida miidasin ea naaha gil aba jeeda madamnyeandeanyu? gwachi geamuuku gideaba gaygwaji haghweega, ghwasaan anda gwaji sabiibooda ng'weani?

⁵ Asi ghamneawa gaydarukuneegwa gichea dasima madamnyeandeanyu bea sabiibu. Gaydanyarja hilgweandaanyi, ak geadatas; ak gaydanyarja ghamardaanyi, ak gajeeleapsa ng'eanyi.

⁶ Ak gaydanung' ghoah raghwata; ak ea majeesuuy nea majeebarsa, ak gaygwardu ng'eamga ea halaghweenga; ak gaydayeesha shamooghuutka adiidu ghwaroabwan aba badayda ng'eanyiida.

⁷ Aba gideaba madamnyeanda sabiibu bea NG'UTAMIIDA lugweega gheeda Israeli gil, nea fuga Yuda ea sabiibooda miy ng'aapta gil; ak ghaghay gideaba gayghwadaah girgweageeda doabiiwaat, nea ghana ghwadaah agita gheanyanga, ghaghay gideaba gayghwadaah doobiiwnata, ak ghwadaah shooka!

Ng'asheega munyas sina buuneedean

⁸ Ashageada geat fuga aguuyi gheawi ea gheawi, nea iissa ghoahaada madamnyeanda madamnyeanda nuut, bwak ea eamudu gwanda heeda abit, ak giibiiti jeeda nea gibwaageaw aba jeeda ng'eanyiida.

⁹ Ghaayiinyi nea gwayi NG'UTAMIIDA bea lugweega: “Gealga saang'a maygoobiida jeeda sih, gealga hees ea gea miyaasiin maygoobiida sih.

¹⁰ Aba gideaba madamnyeanda sabiibu bea eekaji damanamughuush gaygooruudu liitaji sis ak ghwahit bea difaayi, nea siida hista giloohaji bughala bea booga gayghwalach giloohaji damanamughuush bea booga.”

¹¹ Eamuy daanyaawa gea inyeesa ghang'eatng'eat sakteayda duw, ak gaweay gwaleeshi bwak ea ghoah bugusta eaweeda ea gawuurji difaayi beasta aba jeesinga nyaawa!

¹² Gidoondooriida haw ea gidoondooriida mwanang' ea furiimbu, ea difaayi mida jeeda ghweelmoojiga nyaawa; ak ea maduupa gadiyeeda NG'UTAMIIDA, nea maduupeewana gil gadiyeeda geatingaaschi.

¹³ Asi fugeasu gajeepaleak aba gideaba mandeawana fughareenga, ak fuga nyaawa hees gayghabwar jalooda, nea gaasaang'a gabearji muwooshta.

¹⁴ Asi gheeda maloonghajeega ea niibwara ghuut aba jalooda ak ghwajaat ghuutaanyi aba badayda nyaawa ea ghwaraanya, nea giigheambiita nyaawa ea seang'ayda nyaawa ea jaliida nyaawa, nea gahoosan aba jeenyaawa ak ghwararang'aada ak gawa jeedida.

¹⁵ Siida gajeanung' gwatkuy, nea fuga adiing'u geat gajeahiing'u, nea gheanyanga giika adiing'u geadiin gajeanung' ghwaat geat ng'eanyi.

¹⁶ Ak NG'UTAMIIDA bea lugweega siikghaambiit aba girgweageeda doabiiwaat, nea ASEETA Ghaydit ghoahiimu geaw aba doobiiwnata.

¹⁷ Hean dayeega gisilga gayghoajeada gawuurji gidagasiida, ak heeda haghweeda nyaawa sinung'wa heeda gayghoahaaghwa rabasta.

¹⁸ Dashageada geat fuga inyeessa gaksu ng'asheega munyas gawuurji giligisna mareamarajeega ng'uyeegean, ak ghoadaarda riing'eeda ea gooyang'da ghealooda siingiira mutuku.

¹⁹ Nea geeyi, “Anung'waada Ng'utamiida ghwalamwajaan, nea geadaayi gichea gwasinda gadiyeadaanyi; diita ghaydit bea Israeliin gajeadaah gidida gasa gwasiniin ak abeeda geanali!”

²⁰ Dashageada fuga nung' ghoah gidamuy gidamiy nea gidamiy geanung' ghoah gidamuy, ak eeshinda geenung' gwatuudu nea duwunda geenung' gaweeshiit, nea gidinya geanung' ghang'waaniit, nea gidang'waan geanung' ghwanyaaniit!

²¹ Dashageada fuga weaghoodi aba gheanyanga nyaawa, nea ghabwatgeat ea gea fughareenga aba giiteemshooda nyaawa nea ghabwatgeat!

²² Dashageada fuga ammu ghwali difaayi muuchi, ea headiga mideawa uurjeenga inyeesa googuuyi difaayi,

²³ fuga giidiinyeadi inyeesa geesiksa aba seawshooda, nea geareat siida gidagwachi doobiiwsa.

²⁴ Asi gaygawuurji ng'ushapta beasta inyeesa ghwaak mbarariida gajeami, ea nyeega gajeami abissa jeeda beasta, ak eara hawunga nyaawa gajea munyas, nea eara deakghweeda nyaawa gayghwaraghwaata jeameeda gawuurji birjeanda; aba gideaba ghaheawa deaweedeeda NG'UTAMIIDA lugweega, nea gafool ng'asheandaanyi dea Ghaydit bea Israeli.

²⁵ Asi aba seareeni ninyareas NG'UTAMIIDA aba badayda fugaaschi, ak ghoahaakta geadi ghwalas saawa, ak gayghaboadan giijeega; ea gawuurji ea muscheeka nyaawa aba dang'adga naweadinga gawuurji duguuga mwadaagha. Ak eara aba badaydeaba suh seaniin ea miighahawda nyarastaanyi orjeedaanyi gudugwanda humng'eeda aba lasooda.

²⁶ Ak niny gaygaguursa eemoojiga mida dea sheagi, nea gaguursa aba seawiirjeanda gea mida muudeanooda ng'eanyiida; ak ng'ula, gayghapka nea ghwalamwajaan muuchi.

²⁷ Aba jeenyaawa manda dea nibur ghana dea ruus geaw, manda dea ng'uta ghaat ghana dea lili, nea mayghang'arng'ariit ghealooda mananuunatka nyaawa, nea mayghang'at deanga geeka nyaawa;

²⁸ geatka nyaawa ea ng'weani, nea ghuweanga nyaawa sean ea majeekcheewi, budilga faraasajeega nyaawa ea hang'oonyi ea gawuurji lagheaneeda, geeshanga mutukwajeega nyaawa gawuurji shaarara.

²⁹ Nyeashta nyaawa gaygawuurji dea ng'adiida, ak gaygoojuur gawuurji dayeega ng'anyeeka; gayghoamuum ak ghabwar shageataanyi, gayghoang'waay ak ghwaat dea sheagi, ak ea moamu sih ghoareat.

³⁰ Ak saawa gayghoamuum eaweedida gawuurji gidajuurda basooda. Ak siida inyas gang'ula ng'eanyiida gayghwadaah duwunda ea sawanadeeda; ak weeshinda ea sinung' gwatuudu aba jeeda shamooghuutkaaschi.