ISAYA 47 - Bibliyeeda Ghaydit

Girgweaksiinda Babeli

¹ Rarang'aana ak giipteadi aba jeeda birjeanda, Ea huda miyeegeanu, hudeaba Babeli; apteada aba ng'eanyi nea manda hoorgeeda sugoocheanduumeeda, Ea hudeaba Galdayo! Aba gideaba maygudu eeguureewaneey huda miy bea leanga.

² Geani lagheaneeda ng'ealshooda ak ging'ealshi, geanda weasta mida uhuudaang'u, fwakta hang'daang'u, suuda hang'weakaagu ak giighaawi eeniga.

³ Ak gayghwadaah buuneeda dawiishnataang'u, nea gajeadaah baspaseegaagu. Aniini gaydawalda mureandoodeanyu, ak ea maydabwayda eara siyagi.

⁴ Lealnoocheandeanya–was NG'UTAMIIDA bea lugweega nih gheawungaaschi gil– was Dea Ghaydit Asagi bea Israeli.

⁵ Apteada ak gisiindi, ak guwi jeeda misaneeda, Ea hudeaba Galdayo; aba gideaba maygudu eeguureewaneey gatmooda was sugoocheanda.

⁶ Aniini geanyareeksi fugeasu, ak ghaang'udi ririnnyeanda hearaniischoodeanyu; ak ghaayiinyi saawa geatingaagu, ak ea mii bwayda saawa; nea eara gweargwa giidawi gadiyeeda hang'waay muuchi.

⁷ Ak giyeeniisi geaw, “Aniini gaydoaw gatmooda was sugoocheanda damanda manda muudeanooda,” ak ea mii iina ng'asheegeasuun jeeda gurooroadaang'u nea mii apkaada muudeanooda ng'asheesu.

⁸ Asi ghamneawa aleaydiit ng'asheanji, ang'iing'eeda ibwariinyi miyeenooda, nea gighayi gideaba gibea seayu, nea inyeesa giyeeni aba jeadaang'u, “Aniini geabwaageaw, manda siinuut uurjeewean; ak ea maydeabiida nea geawuurjeewi masinung'weanda maydandeawa iita miyeeda diibiga.”

⁹ Ak ng'asheesu asiyeenyean gayghwanyasnyi aba geeshangiga, eaweecheanjagi; miyeeda diibiga ea masinung'weanduumeeda ng'asheanji gaygwahiseey muuchi, earapeadi indeawi beeneetkweanduumeeda haw ea uurda haw bea meang'nyeanduumeeda.

¹⁰ Aba gideaba gighusi ng'asheagaagu munyas, nea giyeeni, “Manda siida ng'ulean”; weaghuumeadaang'u ea fughareadaang'u nihutaneey, ak giyeenayi aba jeeda gurooroadaang'u, “Aniini geabwaageaw, manda siinuut uurjeewean.”

¹¹ Ak gaygoobiseey habitkweeda majamuusa mulsiina; ak gaynyasa ng'asheega munyas, gea majamuusa adeala; gaynyasa lasooda uhuuda aba geeshangiga, dea eara heeda ghayi mii nala.

¹² Asi miinaada ea meang'nyeanduumeadaang'u ea seang'ayda beeneetkweanduumeadaang'u, ghayi ideawiisi aba gheareemaneanduumeadaang'u; ghayi irarsi gideaba gaynyasa gea jea ghoahaada, ghana gwadeepa nyasa jooriischooda.

¹³ Ang'iing'i niibuurnyi fugheerga saang'a bea buuneeda; asi damiinaada saawa ak ghaweanyi, fuga inyeesa gwalaja humng'eeda, nea gwasikiideawa miinga, nea gilasheeda gwaramoori gichea gapnu.

¹⁴ Ng'ula, saawa gawuurji mbarariida gajeami, jea ghwaak beasta; mayghoamu ghaweat geat aba uurda ng'ushapta beasta. Nih mii beasta shang'shang' gil, nea mii beasta jea eeju gil!

¹⁵ Ak ng'asheesu ea gichea gawuurji gil ibatiidunu, ghayi ideawiisi ghang'eada gheareemaneanduumeadaang'u; gaygaba nih neaydooschi nea ghwaat naweadaanyi, ak ea manda eara akaleala dea jea ghoamu ghaweanyi.