ISAYA 46 - Bibliyeeda Ghaydit

¹ ASEETA siguura Beli niibeada, nea dea siguura Nebo eara ada ghwahiiy geaw, sanaamajeega nyaawa gwanda badahuuka diyeanga ea dugwa; haleanjeeda ghayi oosareenay ookeali hiji ea hoowa ghamneawa niiw sareenda aba heeda diyeanga bureadi.

² Ghwahiiy geat ghwahiiy geat duwaawi, nea mwaamu ghwahiing'u sareenda, ak eara saawa gajeepaleageegwa.

³ “Ooleeysean iit, Ea fuga gheeh Yakobo, boosteanga sean bea gheeh Israeli, aniini ghayi ghaarearjeegwa ghang'eada dea sijiilaneegwa, nea ghaasareaneegwa nea gudu andana jeesinga gheamadigeagwa;

⁴ eara bwak ea awoosiita, aniini gaygutawas diida, eara gwarina iheengeagwa ghearashka gaydasareaneegwa. Aba gideaba ghayi geasindunu ak eara ghamneawa gaydasindunu; gaydasareaneegwa ak gaydalealneegwa.

⁵ “Gajagalanean ng'eaha, ak gaydawuurji ng'eaha jea eewuurjeewana sea niny,

⁶ Buuneeda inyeesa ghoahiida dahaabu siguura dahaabu aba jeesinga shageeniga nyaawa, ak goodeen lapiya aba gidida siiteeniidean, amahit geataw gadiyeeda siidida adeang'shachiin gwasin sanaamu, ak geetkung'usa ak geabwat.

⁷ Sanaamu inyeesa geesareena gheatkweaka nyaawa, amahit geamiinda aba heeda gasa saawa; ak gaygoobiita hiji nea maygoosiipteawa earahay hiji midean. Nea iisiiyeawusa ea mayghwasha ghuuta siida, nea mayghoamu ghaweat siida aba jeeda sawanadeadaanyi.

⁸ “Oapkaada ng'asheesu, ak gooteemsheesi, ooteemsheesiina aba jeeda fughareengeagwa, agoogeeda mideawa giidiinyeanyeeka,

⁹ oapkaada ng'asheega ghayi easinyi garayi, aba gideaba geawooschi ASEETA, ak ea manda nuut; aniini geawooschi ASEETA, ak ea manda dea uurjeewanean aniini,

¹⁰ ghayi geabean dargu ng'asheega huuydean ghang'eada garayi gearugu ng'asheega jea gapnu, ‘ak gideamanyiidi gaygwasa, nea gidida sean eagasayi dasiniin gaydasin.’

¹¹ Geaguursi rabearda leabu heeda ghayeawa, siida makcheameedeanyu leabu dea sheagi. Aniini neargu ak gaydasin; neamanyay ak gaydasin.

¹² “Ooleeysean iit agoogeeda hang'oonyi iheeni, agoogeeda oowooschi sheageewa lealeanooda:

¹³ Eaweeda lealeanoodeang'wa gaydeaneekiit, biissa ea mudea sheagi, eaweeda jea daalealnaneegwa mayghwashing'da; gaydalealu mujiineeda Sayuni, aba badayda fuga Israeli was giigheambiiteanyu.”