ISAYA 45 - Bibliyeeda Ghaydit

Ng'utamiida ghwaloat Goreshi

¹ Gwayi NG'UTAMIIDA aba badayda Goreshi, ‘Ang'iing'i guwoosi sugoocheandeanyu aaloachi. Ak gaydagoonyi uurda ak gijoari eemoojiga aba madeadaang'u nea gihirjeaweadi gidaghuudajeega mujiini aba madeadaang'u nea maygwanda gidaghuuta jea eajap.

² “Aniini gaydeasheedeawaneey ak ghaanung' gooyang'deay giijeega mida madeadaang'u, ak gaydanyarja gidaghuudajeega oomng'i, nea ghaalajaadi gharinga sirata gidaghuudajeegean.

³ Gaydagoonyi haleanjeeda siitiiw aba heeda funyaat, ea haleanjeeda mida heeda misana, ak ginali gideaba aniini geawooschi NG'UTAMIIDA was ASEETA Israeli ghayi eaguurni gheawungaagu.

⁴ Aba badayda Yakobo was siideanyu bea gadiyeeda, ea Israeli ghayi aaloachi, geaguurneey aba gheawungaagu, geagoonyeey gheawunga mureeda, earapeadi ang'iing'i minalaan.

⁵ Aniini geawooschi NG'UTAMIIDA, ak ea manda nuut, ASEETA nuut mandana geakghusan; geamajeekcheeweey, earapeadi minalaan,

⁶ ak ghwanal buuneesean ghang'eada gayeew ea gwarakta, gideaba ASEETA nuut mandana geakghusan; aniini geawooschi NG'UTAMIIDA ak ea manda nuut.

⁷ Aniini geasinyi weeshinda ea misaneeda, ak geayeadu hooseaneega ea gurmeahiida, aniini NG'UTAMIIDA gil, ak geasinyi haleanjeeni seaniin.

⁸ “Ea humng'eeda roabwana roopta leabu humng'eeda, nea ghoabuutbuudu shamooghuutka doobiiwnata; ak geatineadi ng'eanyiida ak gwardu lealeanooda nea gaftu eara doobiiwnata; aniini NG'UTAMIIDA gil, dea sin ng'asheesu.

Giimuusta haw bea ASEETA

⁹ “Eamuy daanyi siida ng'aleali sea ASEETA sin niny, siida was dabicheanda sisna sheang'weeda gwasheang'nyi sea dea sin niny! Heapi sheang'weeda gayghoanyaash dea sin niny nea gwayeesha ‘gisini naaha aba hiji?’ Ghana gwayeesha ‘gadiyeadaang'u mwahida’?

¹⁰ Eamuy daanyi baleanda eesha ghwaan, ‘Anda gijiilean?’ Ghana gwayeesha ghaamwat, ‘Lajooni bea jeatean ginyasi aba naaha?’”

¹¹ Gwayi NG'UTAMIIDA Ghaydit Asagi bea Israeli, was dea ghayi jih Israeli: “Gajanyaashaan iita diibigeasu? Ghana iita gadiyeeda geatingeasu?

¹² Aniini geasinyi ng'eanyiida, ak geasinyi siida abiita jeeda; ak geasini humng'eeda geatingeasu, ak lugooda sean bea miinga gwanda aba diigheandeanyu.

¹³ Ghaamiindi niny aba doobiiwnata, ak gaydaadoabiiw naweadingaaschi sean; ak gayghwadeas mujiineedeanyu was Yerusalemu, nea ghoadaw giibaldeaba geat fugeasu ghayi siipaleak, nea mii gideaba gajeataw lapiya ghana haleanjeeda guskuseega,” gwarugu NG'UTAMIIDA bea lugweega.

¹⁴ Gwayi NG'UTAMIIDA: “Meanang'oocheanduumeeda Misri, ea haleanjeeda Gushi, ea gea fuga Sheba was fuga geawi, gayghapka headaang'u ak gayghoah gaagu, gaygweadu geashtaang'u; ak gayghapka nea sirada aba munyaloali, ak gayghaghadoawanyi aba madeadaang'u Ak gayghamwas nea gwayi, ‘Aba huumwa gindeawi ASEETA, ak ea manda nuut geaghus niny.’”

¹⁵ Aba huumwa ang'iing'i guwoosi ASEETA funyaat, Ea ASEETA Israeli was lealnoocheanda.

¹⁶ Fuga sina sanaamu, gajeapwaaspwaas nea gajeanung' gwahirbiban, ak fuga sean gayghang'ut munyinda.

¹⁷ Ak eemeeda Israeli gaygwalealu NG'UTAMIIDA, aba lealeanooda manda muudeanooda; ak agooga ea mwajeapwaaspwaaseagwa nea majahirbibana damanda manda muudeanooda.

¹⁸ Aba gideaba gwayi NG'UTAMIIDA, ghayi sin humng'eeda, (niny ASEETA gil!), ghayi bwat ng'eanyiida ak gwasin (nea goomajeek; masina aba gideaba gaygwarachi geaw, gwasin aba gideaba goobiida buuneeda jeeda!); “Aniini geawooschi NG'UTAMIIDA, ak ea manda nuut.

¹⁹ Aniini miidabalool aba makcheameeda, ghana aba jeeda ng'eanyiida mida misaneeda; aniini miidayeesha jeata Yakobo, ‘Agasean mwadaagha.’ Aniini NG'UTAMIIDA gil gearugu doobiiwnata, ak gearugu ng'asheega was huumeanda.

Ng'utamiida ng'eanyiida ea sanaamajeega Babeli

²⁰ “Abwada geat nea goobea geat ak ghoapkaanyi aneekiida nea gooteanyi, agoogeeda ghayi siipuudeagwa bea eemoojiga! Was gea mandeawana fughareenga sareeni geeta was sanaamu, inyeesa ghamwaash ASEETA maygwalealu fih

²¹ Arukuni iidi nea ghoatahaachi, ak goorugu iiteang'wa; nea gooyeasi iheenga hijagi! Siida ghayi bean gwarugu ng'asheesu bunuun ng'eaha? Ghayi ng'asheesu gwarugu ng'eaha? Neada ea mii aniini, NG'UTAMIIDA? Ak ea manda aseeta nuut geakghusan, aniini geawooschi ASEETA doabiiwaat ea lealnoocheanda, manda nuut geakghusan.

²² “Abiikni heedeanyu ak gajeelealneegwa, aba heeda oondi sean bea badayda ng'eanyiida! Aba gideaba aniini geawooschi ASEETA ak ea manda nuut.

²³ Aniini ghaayaaji habeawooda nea geabea geaw, aba gideaba ghuuteanyu gwarina ng'asheanda doabiiwaat, ak ng'asheandeanyu ea maygabiikta bwadaw, ‘nea gaygaba siisi duguy aba madeedeanyu nea gaba nih ak habeawooda.’

²⁴ “Ak gajeebaloola badaydeanyu nea geeyi, doobiiwnata ea uurda gwanda heeda NG'UTAMIIDA nea gabwageaw, nea fugiga ghayi nyareas aba badayda Ng'utamiidean gaygaweesa niny ak gajeapwaaspwaas.

²⁵ Aba heeda NG'UTAMIIDA jeata sean bea Israeli gajeataw doobiiwnata nea geaghaambiit.”