ISAYA 44 - Bibliyeeda Ghaydit

NG'UTAMIIDA was ASEETA geaghus niny

¹ “Asi aleaydiit ghamneawa, Ea Yakobo was siideanyu bea gadiyeeda, Ea Israeli ghayi aaloachi!

² Gwayi NG'UTAMIIDA ghayi sinyi, ak gwasinyi nea gudumidana jih ak gayghaweanyi: Adibeali, Ea Yakobo was siideanyu bea gadiyeeda, Ea Yeshuruni ghayi aaloachi.

³ Aba gideaba gaydeadalealsa beega uhuuda ng'eanyiida gasa beega, nea ghaanung' gwarina ghealooniga beega jeeda ng'eanyiida ghajaam, ak gaydeadalealsa gurooroodeanyu jeacheengaagu nea ghaadawji ghawoodeanyu giika jea jiilean.

⁴ Ak gaygwardu nea gawuurji nyeega mida bugusta beega, ak gawuurji nyeega mida ghuuta ghealooda.

⁵ Nea siyagi gaygwayi, ‘Aniini geabea NG'UTAMIIDA,’ nea nuut gang'asa geaw gheawunga Yakobo, nea nuut gang'oorsa geatindaanyi gideaba ‘Geabeayi NG'UTAMIIDA,’ ak gwarukuta geaw aba gheawunga Israeli.”

⁶ Gwayi NG'UTAMIIDA was sugoocheanda Israeli was lealnoocheandaang'u was NG'UTAMIIDA lugweega: “Aniini geawooschi dea madeeda ak geawooschi dea huuydean; ak ea manda aseeta nuut geakghusan.

⁷ ASEETA uurjeewean ng'eaha gil? Asi darukwiida iita, nea gwarugu aba madeedeanyu. Ghayi garayi gwarugu ng'eaha gideaba ng'asheesu gaygapnu, asi darukuna gea jea gapnu.

⁸ Adoabeali, nea adaghang'udeagwa muuwda; ghayi garayi ng'asheesu mii daahiimneegwa nea miidarukuneegwa? Nea agooga goowooschi muushoodigeasu! Heapi gwanda ASEETA nuut ng'alaani? Heapi gwanda dea burdeawean uurda? Nih mwaanali.”

Leendeeda sibwat sanaamu

⁹ Fuga sina sanaamu ak gawuurji gidamwadaagha, nea haleanjeeda nyaawa bwariiy saawa ea mayghwaloat gil, ak eara muushoodiga nyaawa ea mwadaaha gil, nea mwanala gil ak gajeepwaaspwaas.

¹⁰ Siisi ng'eaha gil sin sanaamuun, ada abeeda gwasin sanaamooda was gidamwadaagha.

¹¹ Ng'ula, fugaagu iduupcheewi sean gajeapwaaspwaas, ea gearnoodiga nea saawa ea buuneeda gil, asi dabwadageat saawa aba hijagi, ak gayghamiinaada ak ghang'ut giyoonda ak gajeapwaaspwaas sean.

¹² Siida adeang'shachi gaygageanu gharinyeanda ak ghaghwar, amang'ata ghwaadaay sanaaamu. Ak gagulgul aba yundu ghwanung' ghwadaamdaam nea gwasin aba uurda geatindaanyi inyeesa ghwayeat jih nea gabur ak ghwaak muwooshta nea goosha uurda.

¹³ Ak eara siida foora beehajeega inyeesa goodeen beehiida. Amang'ata gooroor aba galaamoadaanyi, ak gwasin aba dabitaanyi giduurji siida bwak ea ghamiidu ratoadaanyi, ak gageanu sanaamoodida sibada ak ghwayiin hichpa geaw heechea goobiida aba jeeda gheeda.

¹⁴ Siida gayghwalach gubooyeanda jea gagadiyeata ak ghwaloat geeta siguura beroshi ghana sawacheanda, ak ghwanung'waada gwaheedu aba jeeda geediga dimda. Ak ghang'aapta gubooyeanda ak gooheedu roopta.

¹⁵ Ak geedi gayghoah ghweendooda aba heedeaba siisi, nea gwaju siida beastaanyi, nea ghoawaala mukaateeydaanyi. Ak gageanu gwasin sanaamu ak ghabwat, amang'ata gageanu gwasin sanaamu ak ghabwat.

¹⁶ Ng'ata gageanu gidanung' googween iyeenya ak ghaghwarda aba beasta, nea gidagween iyeenya nuut ghwaak banyeega, ak ghabeash banyeega ak ghwaak ea gwalang'u, ama ng'ata gwaju beasta nea gwayi, “Geajooyi beasta ak ea naadaayi beasta.”

¹⁷ Nea heeda abit bea geetida gageanu gwasin sanaamooda sibada, ak gwatkung'usa aba madeadaanyi ak ghabwat, ak ghamwaash nea gwayeesha, “Weadaan aba gideaba ang'iing'i guwoosi aseeteanyu.”

¹⁸ Fiisu mwanala gil ak ea maygwajeeng'u gil, aba gideaba sidukuta gheanyanga nyaawa, eara fughareenga nyaawa ea mwanala gil.

¹⁹ Ak ea manda siida ateemsheesa ng'asheanji ghana dea mideawa fughareeda, ak gooteemshi nea gwayi, “Gidagween iyeenya bea geedi ak geasinyi mukaate aba badayda ghuurga ghaaghwari beasta ak ghaabeashi banyeega ak ghaayaaji. Heapi dea abit gaydasin sanaamu sibada mwahida, ak ghaaghadoawanyi?”

²⁰ Ak giiteemshoadaanyi gweateay sea gil was deareedean. Siisi abeeda niroat mayghoamu ghaweat geaw nea gabwageaw ak gwayi, “Aba huumwa gili aang'oanyi geatindean reengaweega beachi gil.”

Ng'utamiida gwasin haleanjeeda sean ak ea lealnoocheanda gil

²¹ Ea eemeeda Yakobo apkaada ng'asheesu, eara ang'iing'i Israeli aba gideaba guwoosi siideanyu bea gadiyeeda; geasinyeeyi huwa siideanyu bea gadiyeeda, Ea Israeli, ak aniini ea maydanung'uneey heeda.

²² Neabuuschi giidiinyeanyeekaagu ea gawuurji shamooghooda, eara riing'eagaagu ea gawuurji dung'usta; biikni heedeanyu, aba gideaba nealealneey.

²³ Asarmana aba hooseaneega agooga humng'eeda, aba nih sin NG'UTAMIIDEAN; oochuura aba ghuuta haw ea ghooroong'ajeega badayda ng'eanyiida; asarmana aba hooseaneega ea giijeega, ea dimda ea gilinyoo ea geeta gil mida jeedida! Asarmana aba gideaba NG'UTAMIIDA nilealu eemeeda Yakobo, ak gajeakghaambiit aba jeeda ng'eanyiida Israeli.

²⁴ Gwayi NG'UTAMIIDA was lealnoocheandaang'u, sinyi nea miyeejiilnyi: “Aniini geawooschi NG'UTAMIIDA ghayi sin haleanjeeda sean, ghayi ghaabwachi humng'eeda nea gabwageaw, ak ghaabwachi ng'eanyiida aba uurdeanyu abeeda geandeawi ng'eaha?–

²⁵ Inyeessa ghaadataschi gwadeagooda fuga ng'uyeega, nea ghaanung' gwadasheahiidi fuga was meanga; nea ghaaheawi ng'asheega fuga mideawa weaghuumeeda, nea ghaayamji fughareenga nyaawa ghoah leendeeda;

²⁶ dea amajeek ng'asheanda siidaanyi bea gadiyeeda, nea ghwanung' ghoah huumwa ng'asheega giijasoodigaaschi; ak geayeeniisi Yerusalemu, ‘Gaygoobiida buuneeda,’ ak mujiineeda Yuda, ‘Gajeadeas, nea gaydanung' ghamiinaada gicha eemeegeagwa ghayi sinyarja’;

²⁷ aniini geayeeniisi ghooroong'eeda, ‘Ghajaamiida, ak gaydaaghajaam eeniga’;

²⁸ aniini geayeeniisi Goreshi, gideaba ‘guwoosi jeagiischoocheanda fugeasu, ak gaysina gea eamanyayi dasin sean’; ak aniini geayeeniisi Yerusalemu, ‘Ang'iing'i Yerusalemu gajeadeasnyi gicha,’ ak ‘sindeeta gheeda sibata ASEETA gajeadeas.’”