ISAYA 43 - Bibliyeeda Ghaydit

ASEETA ghwayiin neajeeda giighuuyda fugaaschi

¹ Ak ghamneawa gwayi NG'UTAMIIDA, ghayi bwanyi ea fuga Yakobo, gwayi dea ghayi sineegwa ea fuga Israeli: “Adibeali aba gideaba nealealneey; neaguurneey aba gheawungaagu, ang'iing'i gibeayean.

² Inyas giighaawi beega gulda aniini ea ang'iing'i gajeendeayeean, ama inyas giighaawi eeniga ea mayghwaanyi, nea eara iiwi jeeda beasta ea maymurjana, nea eara ng'ushapta beasta ea mayghwaaknyi.

³ Aba gideaba aniini geawooschi NG'UTAMIIDA was ASEATAANG'U, dea Asagi Ghaydit bea Israeli was lealnoocheandaang'u. Gaydagu ng'eanyiida Misri ghoah leadeadaang'u, ea Gushi ea Seba ak abeeda geesikseegwa.

⁴ Aba gideaba ghaabwariinyeey aba madeeda gheanyangeasu, nea geagoonyi mureeda ak ghaabwariinyeey, asi gaydanung'waada buuneeda suurja aba gideaba danyaseagwa, ak ghaanung'waadi eemoojiga suurja aba badayda eaweegeagwa.

⁵ Adibeali aba gideaba aniini ea ang'iing'i geendeayi, gaydeadeelu jeacheengaagu ghang'eada heeda ghayeawa ak gaydabwadageat ghang'eada heeda biyeara.

⁶ Gaydayeesha wiilooda ng'eanyiida ghayeawa, siksiina gaweay ak geayeeshi wiilooda ng'eanyiida biyeara, adiighuumu; aghuumni orjoogeasu ghang'eada dea sheagi, ea haweegeasu ghang'eada muudeanooda ng'eanyiida,

⁷ giliwas sih siguursiina gheawungeasu nea ghayi ghaabwachi aba giigheambiiteanyu geasinyi aniini, huumwa gil geasinyi aniini.”

Israeli mushoodiga NG'UTAMIIDA

⁸ Ayeani mwadi fuga ng'oowi, mideawa gheanyanga, ea fuga miinyi mideawa iidiga!

⁹ Dabwadageat eemoojiga sean, ak gwaroonyi buuneesean. Heapi ng'eaha gil aba jeeda aseecheeka nyaawa dea jea ghoamu gwarugu ng'asheega jea ghwahidu? Ng'eaha gil dea jea ghoahiimneasa ng'asheega ghamneawa bunu? Anung'waada muushoodiga nyaawa gwarugu gideaba ng'asheanji geesindunu anung'waada saawa ghwayiiy ak gwayi, “Ng'asheanji huumwa gil.”

¹⁰ “Agooga goowooschi muushoodigeasu,” gwarugu NG'UTAMIIDA, “ea siideanyu bea gadiyeeda aaloachi, ak abeeda ghoanali nea ghoamwaschaan ak ghoanali gideaba aniini geawooschi siidida. Damanda miidahina manda ASEETA nuut nea manda dea jea ghwahidu.

¹¹ Aniini geawooschi NG'UTAMIIDA, ak geakghusan manda lealnoocheanda nuut.

¹² Nearukwiidi ng'asheega jea gapnu, ak ghaahidu dalealneegwa, ak ea manda aseeta nuut aba jeedeang'wa nisin ng'asheesu; ak goowooschi muushoodigeasu,” gwarugu NG'UTAMIIDA.

¹³ “Aniini geawooschi ASEETA, ak gaydanda galeagasean; ak ea manda eara siyagi jea gamulsa uurdeanyu; ak ea manda eara siyagi jea ghoadeal gichea dasin.”

Wapteayda aba Babeli

¹⁴ Gwayi NG'UTAMIIDA, was lealnoocheandeang'wa, was dea Asagi Ghaydit bea Israeli: “Gaydeajeakta lugooda gaweay Babeli aba badaydeang'wa ak gaydanyarja gidaghuudajeega sean bea mujiini, ak gayghwayamwa hooseaneega fuga Galdayo ghoah gutuunooda heareega.

¹⁵ Aniini geawooschi NG'UTAMIIDA, was dea Asagi Ghaydit, ghayi geasineegwa agooga fuga Israeli ak geawooschi sugoocheandeang'wa.”

¹⁶ Gwayi NG'UTAMIIDA, ghayi nung' ghwajaada naweeda aba jeeda basooda, ea heechea eesik aba jeeda beega mideawa uurda,

¹⁷ ghaabwarji lugooda mideawa uurda, lugooda mideawa mutukwajeega ea faraasajeega ng'ucheeda; ea shirikarajeega, ea fuga daruusi bea ng'ucheeda, ghaanung' goobeedeaysa ng'eanyi, ak ea maygudu gabiikta ghang'eatng'eat, ak geanuusti beasta gheaboong'nyeanda.

¹⁸ “Adoopkeaday ng'asheega ghayi bea mwadi, nea adooteemsheeshi ng'asheega ghayi bea garayi.

¹⁹ Ng'ula, gaydasin ng'asheandeesh; nea goola gwasa ak gajadaaha ghamneawa. Gaydasin naweeda aba jeeda dareapcheeda ea eeniga aba jeeda eeshtearajeanda.

²⁰ Gaygagoonan mureeda diyeanga jarooda, fureayoonga ea shageergweega; aba gideaba gaydanung' gwarina beega jeeda dareapcheeda, ea eeniga aba jeeda eeshtearajeanda, ak gaydaadaw ghwali fugeasu aaloachi,

²¹ fuga easisi geaw, aba gideaba gwarukwiida giigheambiiteanyu.

Riing'eeda fuga Israeli

²² “Earapeadi sunu agooga fuga Yakobo; mii aghadoawana gheawungeasu Ea fuga Israeli nooburji aba badaydeanyu!

²³ Miyeanean gisilleandaang'u ghoah haleanjeeda sisabwa geadi bea ghadooweeda sighwarda, nea miigoonean mureeda aba lukghumeadaang'u. Mii doaw sareenda aba headaang'u aba haleanjeeda sisabwa geadi bea ghadooweeda sighwarda, nea miideaburnyi aba hideeda ng'andit.

²⁴ Mii sheaynean nagheeda ng'andit aba lapiya, nea minung' dalang'u aba nagheeda lukghumajeagaagu, ak riing'eagaagu ea niiw sareenda aba heedeanyu nea niiburan ng'asheagaagu munyas.

²⁵ “Asi aniini geawooschi ASEETA samiisa riing'eagaagu, ak geasinyi nih aba gideaba geabaysi nea geabwaageaw, ak ea maygudu daapkaat riing'eagaagu.

²⁶ Apkeanean, ak gihidu eebaloola; rukuni ng'asheagaagu, ak geagoonyi gitoobiiwseey.

²⁷ Ghweanigeagwa bea madeeda gwasin riing'eeda, nea fugeagwa aduuptooschi buuneeda ghwanung'wanaan heeda.

²⁸ Asi ghaang'udi ririnnyeanda fuga ambaliischi bea heeda ghaydit, ak ghaanung'waadi fuga Yakobo eegul uhuuda, nea ghaanung'waadi fuga Israeli eeng'eawi.