Biblia Todo Logo
Bìoball air-loidhne

- Sanasan -

ISAYA 42 - Bibliyeeda Ghaydit


Siida gadiyeeda Ng'utamiida

1 Ng'ula, siideanyu bea gadiyeeda aaloachi ak ghaadawji uurda, ak ghwanung' gahoosan gurooroodeanyu, ak ea naayiinyi gurooroodeanyu jeadaanyi ak niny gaygoorgweaksa eemoojiga girgweageeda doabiiwaat.

2 Maygooyeawda nea maygoojuur nea mayghwanung' eayiiy aba jeeda naweeda bareanda;

3 niny maygwahirja diigheecheanda riikghta gagiinya, nea maygwanuus gheaboong'nyeanda aroasan; gaygweadu girgweageeda doabiiwaat.

4 Ak ea maygabur uhuuda nea mayghoahiil, bwak ea ghwayiin girgweageeda doabiiw badayda ng'eanyiida; nea ng'eanyiida ghuuta basooda ghoamuughu deaweedeadaanyi.

5 Gwayi ASEETA was NG'UTAMIIDA, dea ghayi bwat humng'eeda ak ghoabwarghaan, dea ghayi bwat ng'eanyiida ea haleanjeeda mida jeedida, dea ghayi adaw buuneeda giisiimeanda, ak ghoadaw gurooroadaanyi fuga mida badayda ng'eanyiida.

6 “Aniini geawooschi NG'UTAMIIDA, ak geaguurneey aba doobiiwnata, ak gaydaang'waay geatindaang'u nea ghaahaaghwaneey, nea aba badaydaang'u gaydasin neajeeda sea buuneesean, ak ang'iing'i gayhuuwa gheaboong'nyeanda eemoojiga,

7 gaynung' ghwajaada gheanyanga fuga ng'oowi, nea giiruudu fuga mida ghealooniga, nea giiruudu fugiga mida jeeda misaneedean.

8 Aniini geawooschi NG'UTAMIIDA, nih gheawungeasu gil; giigheambiiteanyu maydaadaw siinuut, nea eara giigheambiiteanyu ea maydaadaw sanaamu.

9 Ng'ula, ng'asheega ghayi eabean dargu nisa, ak biissa ghamneawa gaydargu ng'asheega eashish; damanda mii gapnu gaydargu iita.”


Duumda giigheambiita

10 Asarmasiina NG'UTAMIIDA duumdeesh, ea giigheambiitaanyi ghang'eada muudeanooda ng'eanyiida! Basooda ea haleanjeeda sean mida jeeda, ng'eanyiida ghuuta basooda ea fuga mida jeeda.

11 Ak deajuura eeshtearajeanda ea mujiinajeagaaschi sean, ea gharang'weaka mida fuga Gederi, ak ea dasarmana eara fuga mida Sela aba hooseaneega, ak deajuura saawa ghang'eada iheenga giijeega.

12 Asi daaghaambiida saawa NG'UTAMIIDA, nea geerukwiida giighaambiitaanyi aba ng'eanyiida ghuuta basooda.

13 NG'UTAMIIDA gaygwardu nea gawuurji siida daruus, gawuurji shirikarajeanda ng'uchi aba ng'ucheeda; ak gaygooyeawda aba ghuuta haw, nea ghoahiimu uurdaanyi aba heeda weajoodigaaschi.


ASEETA ghwayiin neajeeda weeta fugaaschi

14 Gwayi ASEETA, “Aba gideaba naasiindi gidageaw, ak ea miidasha ghuuta fugeasu asi nihita damanda, gaydeajuur gawuurji gatmooda mideawa lajooda damanda jeata, nea gwatkan aba sawanadeeda.

15 Gaydalas uhuuda giijeega ea heayeeniga, nea ghaanung' gagajeamiidi geediga ea nyeega; ak gaydanung' ghoah eeniga beega ng'eanyiida ghajaam, nea ghaanung' ghwajaam dabaschoojiga beega.

16 Gaydeadu fuga ng'oowi aba naweeda mwanala saawa, ak gaydaadoabiiw nea mwanala naweeda sik, ak gaydanung' ghoah misaneeda weeshinda aba madeanyaawa nea ng'eanyiida heeda mida burguutka gaydanung' ghoah miyng'eanyajeanda ghwadoabiiw Nih gichea dasin gil, nea saawa ea maydanung'wa heeda.

17 Gajeenung' gabiikta bwadaw ak gajeapwaaspwaas muuchi, giika bada sanaamajeega sisna lagheangean, nea gwayeesha sanaamooda sisna lagheangean, “Agooga goowooschi aseecheekaasa.”


Miiynata fuga Israeli

18 Oaleaydiit Ea agooga fuga miinyi ak ghoang'weardi, fuga ng'oowi, ak ghoadaayi.

19 Siida ng'oaw ng'eaha, meakghusa siideanyu bea gadiyeeda? Ghana siida miy ng'eaha, gawuurji giijasoocheandeanyu eajeakiidi? Siida ng'oaw ng'eaha uurji siideanyu aamiidu, ghana siida ng'oaw uurji siida gadiyeeda NG'UTAMIIDA?

20 Agooga ghoadaayi ng'asheega saang'a, ak ea moayiini jeesingeagwa; iidigaaschi gwayiing'shi, ak ea mwayiinya gil.

21 NG'UTAMIIDA gahoosan aba badayda doobiiwnataanyi, ghwanung' gageawiit deaweedeadaanyi nea ghoaghaambiit,

22 Ak suh ea fuga sijagwat haleanjeeda nyaawa gil nea geareat ak ea niing'waay sean shoomeanga nea siyaat ghealooniga; ak ea nuwuurji diyeanga shageata nea manda siida jea ghoaghu, ak ea niiw easanga nea manda siida ayi, “Oakghuumda!”

23 Ng'eaha gil aba jeedeang'wa dea jea ghwayiiy ng'asheanji, ak gooleeysiit aba damanda jea ghwahidu?

24 Heapi ng'eaha gil dea adayda Yakobo ghoah easanga, ak ghwayiin fuga Israeli geatinga mareanghooga? Neada ea mii NG'UTAMIIDEA dea sisissi riing'eeda, ghayi siheawa eayaat geeshta naweadaanyi nea meamwasa eayaat geeshta deaweedeadaanyi.

25 Ak gwanyareeksa aba nyarastaanyi ng'waan, ak ghwanung'waada gwaroonyi ng'ucheeda ng'waan, nea gwarina nyarastaanyi meadajeega sean, nea saawa ea majeeng'na gil ghwaak beasta ak ea mwayiina ng'asheanji jeadaanyi.

The Bible in Datooga © Bible Society of Tanzania, 2015.

Bible Society of Tanzania
Lean sinn:



Sanasan