ISAYA 41 - Bibliyeeda Ghaydit

ASEETA gamanya ghaweat Israeli

¹ Gwayi ASEETA, “Eena saw ak giileeysean iit ea fuga mida darooraka ghuuta basooda; anung'waada ghwanyas buuneeda uurdeesh, anung' gwaneekiit ak gwarugu iita nyaawa; ak gaygwayi apkaana eabwada geat aba girgweaksiinda.

² Ng'eaha gil ii mii aniini gil dea guursa dea mwaay aba heeda ghayeawa, siida jooriischi aba heeda wassean? Aniini inyeesa ghaayiinyi eemoojiga madeadaanyi, niny inyeesa gooleapsa ng'eanyi sugoodiga, ak ghwanung' gawuurji saawa birjeanda aba ng'utaanyi, gawuurji looyda ghuuta jeameeda aba ghuweang'daanyi.

³ Niny ghwaat geeshta nyaawa ak ghang'ata nea gaba seayu, gawa nea ghwalamwajaada gawuurji gili mwala ng'eanyi.

⁴ Ng'asheesu seaniin gwasin ng'eaha, ghayi gaguursa jeacheenga aba giing'eeta? Aniini geawooschi NG'UTAMIIDA, dea madeeda ea dea huuydean aniini gil.

⁵ Ng'eanyiida ghuuta basooda ghwadaah ak ghabeal, nea ghaboadan murdajeega ng'eanyiida, ak geeneekiit ak ghapka.

⁶ Ak gaba siisi weat giischeewoocheandaanyi, nea gaba nih eesha orjeeda ghaamwat, “Amajeega geaw.”

⁷ Siida foora beehajeega goomajeek siida deanya dahaabu siguura dahaabu, ak gwasin sanaamajeega, nea goomajeek dea gulsa musumwaarajeega, ak gwayi sean “niroabwa muuchi”; nea geegulsa musumwaarajeega ak ea maygudu eamu eegeanda.

⁸ Ak ang'iing'i, Israeli, siideanyu bea gadiyeeda, Yakobo dea ghayi aaloachi, was jeata Abrahamu, siideanyu eaduupcheewi.

⁹ Ang'iing'eeda eayeananeey muudeanooda ng'eanyiida ak geaguuru nea gindi ghwanuutka sheagi, nea geayeeshiineey, “Ang'iing'i guwoosi siideanyu bea gadiyeeda, Aniini naaloacheey ak ea maydajaktaneey.”

¹⁰ Adibeali aba gideaba geendeayi, adihirbiban aba gideaba geawooschi ASEATAANG'U; gaydagoonyi uurda, ak gaydaweanyi, nea gaydaahaaghwaneey aba geatindeanyu bea dugwa doabiiwaat.

¹¹ Ng'ula, giika sean nyareekseeyiin, gaygwanyik nea gwahirbiban; nea fuga sheang'nyi sea ang'iing'i gaydanung' gawuurji gidamwadaagha, ak gaydanung' goosha.

¹² Gaygasa ak ea maydaah saawa giika ng'uchi sea ang'iing'iin gaygawuurji gidamwadaagha, gaygawuurji gidamandana giika ng'uchi sea ang'iing'iin.

¹³ Aba gideaba aniini geawooschi NG'UTAMIIDA was ASEATAANG'U, gaydaang'waay geatindaang'u bea dugwa; ak gaydayeeshiineey, “Adibeali, gaydaweanyi.”

¹⁴ Gwayi NG'UTAMIIDA, Ea fuga Yakobo ng'arng'ari nea gwadeena ghuughuucheeda, ea fuga Israeli, adoabeali, adoabeali, gaydaweadeagwa, aniini geawooschi lealnoocheandeang'wa was dea ghaydit bea Israeli.

¹⁵ Ng'ula gaydanung' huwa dabicheandeesh ng'waan ghuut, jea ealaja booga nea gwandeawa geeshatka; ak gajarareang'ni giijeega ak ging'aali, ak gaynung' ghoah heayeeniga looyda;

¹⁶ gajaleala saawa ak gayghwaat jeameeda, ak ghwanung' shaarara gaguudeadayi. Ak gayhoosasiina NG'UTAMIIDA was dea asagi Ghaydit bea Israeli ak gajoakghaambiida.

¹⁷ Damanda gaseewa beega fuga barbari ea gea mandeawana gil, ak ea mwanyasa, ak ea nijeama ng'ushapkeaka nyaawa aba muwooshta aniini geawooschi NG'UTAMIIDA gaydasha ghuusiga nyaawa, aniini geawooschi ASEETA Israeli maydanung'wa heeda saawa.

¹⁸ Gaydanung' gwarina eeniga uhuuda heayeeniga, nea gwarina gheanyanga eeniga bugusta moangoachihajeega; ak gaydasissa dabascheanda beega jeeda dareapcheeda, nea ng'eanyiida ghajaam ghaanung' gwarina gheanyanga eeniga.

¹⁹ Ak gaydayiin jeeda dareapcheeda gubooyeeka, ea rabeangheeda, ea geediga ng'andidi, ea saytuunajeanda; nea ghaanung' gwardu aba jeeda eeshtearajeanda geeta siguura beroshi, ea dea siguura mtidaari ea hoonyaweanda.

²⁰ Ak gayghwadaah buuneeda ng'asheanji ak gwajeeng'u, nea ghwanal sean gideaba ng'asheesu gwasin NG'UTAMIIDA, dea asagi Ghaydit bea Israeli deasin ng'asheanji gil.

Ng'utamiida maduupeewana gil aseecheeka ng'uyeega

²¹ Gwayi NG'UTAMIIDA was sugoocheanda Yakobo, Ea aseecheeka eemoojiga, ayeani girgweageedeang'wa, ayeani iiteang'wa ea ng'asheega oondeawi.

²² Apkaana hiji ak goorugu gichea gapnu, hean abeeda geanali damanda jea ghwahidu, nea goohiimneasa ng'asheegeaba garayi akeega gil, ak geayiinyi jeeda gurooruunatkaasa nea geanali huuydeandaanyi.

²³ Arukuneasa gichea gapnu, ak gajeamwasa gideaba agooga goowooschi aseecheeka, asi asina gea miyaasiin ghana gea munyas abeeda gayghang'udeasa muuwda nea geehirbabanyi.

²⁴ Ng'ula, agooga goowuurjeewi gidamwadaagha, ak eara gadiyeedeang'wa gaba mwadaagha, nea eara dea loadeagwa ak ghabwadeagwa agooga noosinyi gidamuy.

²⁵ Naanung' ghang'eat siida leabu wiilooda ng'eanyiida ghayeawa, ak ea nihidu, ak gwaleabu heeda ghayeawa, ak gaygwaruku gheawungeasu; ak niny gaygooleapsa ng'eanyi fuga ambaliischi gawuurji sheang'weeda gawuurji gida dasta sheang'weeda siida sina dahuundiga.

²⁶ Siida rukwiida ng'asheega ghang'eada mwadi ng'eaha gil, geebay eanala, siida bean gwarugu ng'eaha ak gajeeyeena, “Ghoadoabiiw?” Asi manda siida rukwiida ng'asheega, asi mandana eara akaleala dea ahiimneegwa, asi mandana eara akaleala dea iiy ng'asheegeagwa.

²⁷ Aniini gidamadeeda gaydayeesha Sayuni, ng'ula, eara suh gaydaadaw Yerusalemu dea eadu giijasta miy.

²⁸ Ak iyeang'weersi hoowa ea mwaadaahi eara siyagi aba bugusteaba suh, manda siida ghuuta eara akaleala aanyaashti ng'asheanda ghwasha ghuuteanyu.

²⁹ Ng'ula, aseecheeka seaniin gaba reengaweega; manda gida jea ghoamu gwasin; sanaamu ak ea ng'arng'ari ak ea mandeawana uurjeenga.