ISAYA 40 - Bibliyeeda Ghaydit

Ng'asheega sirar

¹ Gwayi ASEETEANG'WA, anung' ghahawda gurooruunatka fugeasu, asi anung' ghahawda.

² Oopaloola fuga Yerusalemu aba ng'eeninda, arukusiina aba ghuuta haw gideaba ng'ucheeda nyaawa niisha nea riing'eega nyaawa ea sisamsa aba gideaba NG'UTAMIIDA niyaaga saawa ghoorjooda nibiyeenya aba badayda riing'eagaaschi sean.

³ Gwanda siida nyeara ghuuta: “Jeeda dareapcheeda asina naweeda NG'UTAMIIDA, oatoabiiwa naweeda bareanda bea ASEETEANYA aba jeeda eeshtearajeanda.

⁴ Gilinyoo ea moangoachi gil gajeedaksa ghwanyiit ak gooyang'deay, nea gilinyoo ea giija gil ea heayeeda gajeerareang'u nea ng'eanyiida heeda was gudung'unyeanda gajeesin gooyang'deay, nea ng'eanyiida heeda mwahida gajeanung' ghamiidu.

⁵ Ak giigheambiita NG'UTAMIIDA gajeatahaach, ak gayghwadaah buuneesean, aba gideaba nih gwarugu NG'UTAMIIDA.”

⁶ Gwanda siida nyeara ghuuta nea gwayi, “Rukwiida giijasta!” Ak geayeeshi, “Gaydarukwiida giijaspwa naaha?” Rukwiida gideaba buuneesean gawuurji nyeega, nea leanga nyaawa sean gawuurji deakghweeda dareabeeta.

⁷ Nyeega nigajeamiidi, nea deakghweeda ghwasis, aba gideaba giisiimeanda NG'UTAMIIDA gwasik badaydaanyi; aba huumwa buuneeda gawuurji nyeega.

⁸ Nyeega gaygagajeamiidi, nea deakghweeda ghwasis; nea ng'asheanda ASEETEANYA gayghamiinaada damanda manda muudeanooda.

⁹ Ang'iing'eeni irukwiidi giijasta miy aba Sayuni ding'da uhuuda giijeeda geaw; ang'iing'eeni irukwiidi giijasta miy aba Yerusalemu, ajuura muuchi, ajuura muuchi nea adibeali, eeshiina mujiinajeega Yuda, “Ang'ula ASEETEANG'WA!”

¹⁰ Ng'ula, NG'UTAMIIDA was ASEETA ghwahidu goombaliischi nea gwandeawa uurda, ak ng'ula, gwandeawa giimeardaanyi, nea haleanjeadaanyi bea guskuseega gwanda madeadaanyi.

¹¹ Ak gayghoahaaghwa hawandaanyi gawuurji haghweadoocheanda, ak gayghabwat geat dayeega gisilga aba geatingaaschi, ak ghwasar aba daghataanyi, nea gea mideawa dayeega reer gayghoawaas nea goojiileesa.

ASEETA Israeli manda gichea eegala

¹² Ghoamu ng'eaha goodeen beega basooda aba baneakta geatindaanyi ghana goodeen humng'eeda aba geatingaaschi, ghoamu ng'eaha goodeen birjeanda badayda ng'eanyiida aba gikoombe ghana goodeen durumanata giijeega ea heayeeniga aba dabicheanda siiteeniida?

¹³ Ghoamu ng'eaha ghoadoabiiw fughareeda NG'UTAMIIDA, ghana ghoanaal ak ghoah siida ghuutaanyi.

¹⁴ ASEETA gawa ghang'al ng'eaha siida ghuuta, ak ghoah gearnoocheanda ghoanaal ng'eaha niny naweeda doobiiwnata, ak ghoanaal ng'eaha niny fughareeda, nea goohiimsa niny naweeda nalooda haleanjeeda?

¹⁵ Ng'ula, aba headaanyi eemoojiga gawuurji beega abituuna jeeda ghadeeda, ak gawuurji birjeanda aba uhuuda gidasiiteeniida, ng'ula darooraka neaweesa beega aba headaanyi gawuurji birjeanda asas.

¹⁶ Ghweenga sean bea Lebanoni ea diyeangaaschi sean, maygwadeay aba haleanjeeda sisabwa geadi bea ghadooweeda sighwarda aba madeadaanyi.

¹⁷ Eemoojiga sean mawuurji gil aba madeadaanyi, nea aba headaanyi gawuurji duguuga mwadaagha marachi gil.

¹⁸ Asi gajagalana ng'eaha ASEETA, ak gajooheamnyeewana naaha niny?

¹⁹ Niny mawuurji sanaamajeega, sin siida adeang'shachi, ghoadaay dahaabu siguura dahaabu, ak ghwayeasha dahaabu ak gwasissa munyaloaleeda sisna gharinga siiteanya lapiya.

²⁰ Siida bwarbwar muuchi moamu ghoadayda haleanjeeda sisabwa geadi was lapiya ghana dahaabu siguura dahaabu, gaygagasa geeta majeek muuchi ak gwasin sanaamu, amang'ata ghamiinda nea goomajeek.

²¹ Heapi Mii anala? Mii ayiinya? Miyeebean eerukuneegwa? Mii anala ghang'eada dea ghayi sibada muunda ng'eanyiida?

²² Niny dea apteada aba giibuurbuursiinda ng'eanyiida, nea fuga mida jeeda ng'eanyiida aba niny gawuurji dakajeega; niny ghoabwarghaan humng'eeda gawuurji hang'da beashooda, ak goongoor gawuurji maheemajeanda siipiita.

²³ Niny inyeesa goorareang'u fuga ambaliischi mideawa uurjeenga, nea fuga mida madeeda buuneeda bea badayda ng'eanyiida ghwanung' ghoah fuga mwadaagha.

²⁴ Damanda sing'aaptaawa ak ghaftu nea damanda mii ghang'uda ng'eanyi hawunga ghoah geediga, inyeesa ghwanung' Ng'utamiida ghaghuut jeameeda gagajeamiidi ak iidu ghaghuuta saawa shaarara gawuurji looyda.

²⁵ Gajooheamnyeewean ng'eaha, ak geawuurjeewi? Gwarugu dea Asagi Ghaydit.

²⁶ Heapi agatgada gheanyangeagwa oong'weersiina humng'eeda ak ghoadaayi: suh seaniin gwasin ng'eaha? Diita mida madeeda lugoanyaawa gil nea gwayiida, nea gaba nih guursa sean aba gheawungaaschi; aba hawundaanyi ea uurdaanyi aba gideaba ea majeek nea gaba uurda manda gea niroat eara akaleala.

²⁷ Ghwasaan anda giyeeni, Ea Yakobo, nea gibalooli Ea Israeli, “Naweedeanyu sifuy aba heeda NG'UTAMIIDA, nea gitoobiiwsean ea maduupa ASEETEANYU.”

²⁸ Heapi, neada ang'iing'i eaminali? Mii iinya? NG'UTAMIIDA ASEETA manda muudeanooda gil, ak gwasin haleanjeeda sean bea badayda ng'eanyiida, niny mayghwanyighis nea maygabur fughareadaanyi majeamu eesikteawa.

²⁹ Gayghoadaw uurjeenga gea ahiil, ak gaygooheasa uurda gea mandeawana uurjeenga.

³⁰ Asi eara orjooga gaygoohiili nea gabur nea gheareemanga gaygoobeedeayi;

³¹ nea fuga amuughu NG'UTAMIIDA saawa gayghwanyas uurdeesh, ak gayghang'eata gaweay humng'eeda nea gaba meang'eega rabearda; ak gaygwasalda nea maygabur, ak gaygaweay aba geeshanga nea maygoohiili.