ISAYA 37 - Bibliyeeda Ghaydit

Sugoocheanda ghoanyaash Isaya gichea gwaneada

¹ Iidu nea ghwayiiy sugoocheanda was Hesekiya ng'asheesu, hean ghabwaashaada hang'weakaaschi ak gookwa guniyajeega. Ng'ata gawa jeeda gheeda NG'UTAMIIDA.

² Ak goojeakta Eliyakimu was furiischoocheandeaba gheanyi, ea Shebna was ng'oorshoocheanda, ea gweargwa ashoohoodiga nea siikwa guniyajeega, ak geeweesa Isaya orjeeda Amosi was sibaneeda.

³ Hean geeyeesha, “Gwayi Hesekiya, ‘Eaweecheanji eaweeda sawanadeeda gil ea baspaseega, ea giing'weaka, aba gideaba aseasa geewuurjeewi gatmooda gasa jeata, ak ea mandeawana uurda jea gwajiila.

⁴ Gwadeepa NG'UTAMIIDA was ASEATAANG'U ghwayiiy ng'asheega shirikarajeanda haw, ghayi ajeakta sugoocheanda Ashuru was siidaanyi haw, abeeda goojeakta goong'eawi ASEETA mideawa eaweega. Ea NG'UTAMIIDA was ASEATAANG'U, ak gayghoawoow aba ng'asheega iiy, asi mwaasha ASEETA aba badayda boosteanga abit.’”

⁵ Hean gaweay fuga gadiyeeda bea gheeh Hesekiya was sugoocheanda heeda Isaya.

⁶ Ghwalamda Isaya ak gwayeesha saawa, “Ayeeshiina siideang'wa haw, ‘gwayi NG'UTAMIIDA adibeali aba ng'asheega iiyiinyi nea goong'eawean fuga gadiyeeda bea sugoocheanda Ashuru.

⁷ Ng'ula, gwanda guroorooda jea dayiin jeadaanyi, ak gayghwayiiy nyeashta, ak gaygabiikta ng'eang'daanyi, ak gaydanung' eabwara ng'uta aba ng'eanyiidaanyi.’”

Fuga Ashuru gabiikta goomuuw buuneeda

⁸ Hean nea gabiikta shirikarajeandida hawiin, ghwahita nea gang'uchi sugoocheanda Ashuru sea mujiineeda Libina, aba gideaba abeeda niyiiy gideaba sugoocheanda ninung'wa heeda Lakishi.

⁹ Nea abeeda sugoocheanda ea niyiiy iita Dirhaka was sugoocheanda Gushi gideaba “ghwahidu gang'uchi sea niny.” Hean nea ghwayiiy ng'asheanji goojeakta buuneeda heeda Hesekiya nea gwayeesha.

¹⁰ “Ayeeshiina Hesekiya was sugoocheanda Yuda gideaba, ‘Adagwareenganeey ASEATAANG'U ibatiidi nea gwayi Yerusalemu majeayiin geatinda sugoocheanda Ashuru.

¹¹ Ang'iing'i niyiinyi gidaghayi sima sugoodiga Ashuru darooraka suurja, ak ghwanung' goosha. Heapi ang'iing'i gayghuuha?

¹² Heapi aseecheeka eemoojiga ghayi nung' ghweanigeasu goosha niighuuheagwa? Gosani ea Harani ea Resefu, ea fuga Edeni mida Delasari?

¹³ Gwanda yeenu sugoocheanda Hamati, ea sugoocheanda Arpadi, ea sugoocheanda mujiineeda Sefarfaimu, ea sugoocheanda Hena, ghana sugoocheanda Ifa?’”

¹⁴ Hean ghwanyas Hesekiya barawajeanda adaw fugiga siicheaguun, ak ghoasoamwa, hean ghwascheang'da Hesekiya gawa gheeda NG'UTAMIIDA, ak gootin barawajeandida aba madeeda NG'UTAMIIDA.

¹⁵ Ng'ata ghamwaash Hesekiya NG'UTAMIIDA nea gwayi,

¹⁶ “Ea NG'UTAMIIDA bea lugweega, ASEETA Israeli mida badayda hoorgeeda gheambalmeeda, ak giibiiti heeda laabwa hoowa geeruubajeanda, ang'iing'i geaghusnyi guwoosi ASEETA sugoodiga sean bea badayda ng'eanyiida, ang'iing'i ghayi gibwadi humng'eeda ea ng'eanyiida.

¹⁷ Aleaydiit, Ea NG'UTAMIIDA, ak giyiinyi, ang'wearda ak gidaahi Ea NG'UTAMIIDA, aleeysiiniit ng'asheega Senakeribu ghayi ajeakta goong'eaweey ang'iing'eeda uwoosi ASEETA mideawa eaweega.

¹⁸ Huumwa gil NG'UTAMIIDA sugoodiga Ashuru nidatas eemoojiga sean ea darooraka nyaawa.

¹⁹ Ak gwajaksa aseecheeka nyaawa jeeda beasta aba gideaba suh mii aseecheeka gil, suh haleanjeeda sin buuneeda gil aba geatinga nyaawa, was geediga ea lagheanga, ak ghoah gidabaysiina lasooda uhuuda.

²⁰ Asi ghamneawa, Ea NG'UTAMIIDA was ASEETEANYA, lealnaneasa geatingaaschi, ak ghwanal sugoodiga sean bea badayda ng'eanyiida gideaba ang'iing'i guwoosi NG'UTAMIIDA nea gibwaageaw.”

Giijasta Isaya weah heeda sugoocheanda

²¹ Hean goojeaksa Isaya was orjeeda Amosi giijasta heeda Hesekiya ak gwayeesha, “Gwayi NG'UTAMIIDA was ASEETA Israeli, aba gideaba nimuscheani aba badayda Senakeribu sugoocheanda Ashuru,

²² nih ng'asheanda baloola NG'UTAMIIDA gil aba badayda sugoocheandida: ‘Mujiineeda Sayuni ea Yerusalemu gafoolnyi– nea goong'eaweey, mujiineeda miy bea Yerusalemu– goodiindiil uhuuda nea gamachiidaneey.’

²³ ‘Ghayi niing'eawayi ng'eaha ak ea nirukusi ng'eaha ng'asheega munyas? Ak ea nijaadi ghuutaang'u ajuursiina ng'eaha, nea gimachiidi ng'eaha aba ghwarjeeda, mii Deaghaydit bea Israeli!

²⁴ Ninung' goong'eawi NG'UTAMIIDA, fugaagu bea gadiyeeda, aba gideaba giyeeni neadiing'di iheenga giijeega aba seang'ayda mutukwajeegeasu bwak ea dahita jeeda Lebanoni; ak gaydalajaada gubooyeekaaschi geawi ea geedigaaschi miyaasiin was hoonyaweega, ak gaydawa ea dahita heetiyeada mida, ea jeeda dimdaanyi haw.

²⁵ Ghaaghurghurji healatka ak ghaaleayi beagaaschi, ak ghaanung' ghwajaam gheanyanga eeniga Misri aba baneaguuka geeshangeasu.’

²⁶ ‘Neada ng'asheanji ea mii iinya? Gideaba ng'asheanji geabean dasin nea gudea garayi gil? ak ghaahiichi ghamneawa, ak nih ea gadiyeadaang'u gil gideaba gaynung' goosha mujiinajeega sineaweesa ghamarda nea ginung' ghoah dilgwajeega ea eemeega.

²⁷ Fuga bea ng'eanyiida ning'arng'ariidi, aba gideaba niisha uurda, ak ea ning'ut giyoonda nea gwahirbiban, ak ea niwuurji booga mida madamnyeanda, ak gawuurji nyeega was boosheanda aba jeeda madamnyeanda nea gawuurji nyeega rinna uhuuda gheeda, ghana ngaano damanda miighwaheas.’

²⁸ ‘Aniini ghaanali gidiibiideati, ea gidiriteaydi sean ea damanda ibiikni, ea nyarastaang'u iinyareeksean.

²⁹ Aba gideaba ginyareeksean, ak ea naayiinyi ng'asheagaagu bea ghwarjeeda, asi gaydayiin sidageedeanyu ghwanaghaang' sareadaang'u, nea ghaarachi ghuutaang'u aba ghealoodeanyu, ak gaydaadealdaneey biikta siga naweedida iskuuni.’

³⁰ “Ak nih gajea gwadeagooda gil aba headaang'u gweanyi gajayaaga gearidu nea gabwageat, aba madamnyeanda, ak eara gweaydeaba iyeenya gaygwasnu ak gweaydeaba samwagu goohisti histeanga ak ghoalaji nea goohisti sabiibu aba madameegeagwa ak ghoayaaji haghweagaaschi.

³¹ Ak boosteangiga abit bea gheeh Yudahiin gayghoahaada ak ghwasaang'ayiit gawuurji geeta iin hawunga ng'eanyi ak gwaji haghweega muuchi aba heetiyeada.

³² Aba gideaba gaygwanda boosteanga jea ghoabit aba Yerusalemu, ak gwanda fuga jea ghaghu aba giijeeda Sayuni, ak nih ea gichea gwashissiinda ghaang' NG'UTAMIIDA bea lugweega gil.

³³ “Asi gwayi NG'UTAMIIDA aba badayda sugoocheanda Ashuru niny mayghwahidu jeedeaba mujiineani, ak ea maygwajakta geacheeda aba hiji, nea mayghwahidu madeadaanyi nea gwandeawa igeambooda, nea maygooneaweesa ghamarda.

³⁴ Gaygabiikta ghwaat naweeda ghayi leabu, ak ea mayghwahidu jeedeaba mujiineani nih gwarugu NG'UTAMIIDA.

³⁵ Aba gideaba gaydafur mujiineani, daaghu aba badaydeanyu, ea aba badayda Dawdi was siideanyu bea gadiyeeda.”

³⁶ Hean gawa malaykajeanda NG'UTAMIIDA ak ghabwar fih sagalamnyooji bughala ea seedam ea muut, aba heeda mida fuga Ashuru; ghang'eat ng'eat buuneeda nea gudea sakteayda duu gil, geadaah muscheeka sean bea buuneeda.

³⁷ Hean ghang'eat gawa Senakeribu was sugoocheanda Ashuru, ak gabiikta Ninawi ak goobiida hoowa.

³⁸ Eaweecha nea ghamwaash ASEATAANYI aba gheeda aseeta siguura Nisroki, hean gawa Adrameleki ea Sharesa was orjoagaaschi ghabwar ghwaan aba ng'uta, amang'ata gwasalda gaweay ng'eanyiida Ararati, ak gawa hoorgeadaanyi Esar-hadoni was orjeedaanyi.