ISAYA 36 - Bibliyeeda Ghaydit

Fuga Ashuru goomuuw fuga Yerusalemu

¹ Gweaydeaba damanang'wan bea sugoocheanduumeeda Hesekiya, hean ghang'eat Senakeribu was sugoocheanda Ashuru, ak ghwascheang'da gang'uchi sea mujiinajeega sean bea Yuda mideawa ghamarda majeekcheew, ak ghwajoar.

² Hean goojeakta sugoocheanda Ashuru shirikarajeanda haw, ghang'eada Lakishi ea ghwahita Yerusalemu, heeda Hesekiya nea goodeayi lugooda saang'a. Ak ghamiinaada aba ghuuta mapariida dabascheanda mida heeda diyeada, mida ghuuta naweeda bareanda gal heeda siihuuniisa hang'weaka.

³ Ak ghwahidu roonyeadaanyi Eliyakimu was orjeeda Hilkiya was siida ahaaghwa gheeda sugoocheanda, ea Shebna was ng'oorshoocheanda, ea Yoa orjeeda Asafu was siida ng'oora ng'asheega damanyoojiga.

⁴ Ghwalamda shirikarajeandida hawiin ak gwayeesha saawa, “Asi ayeeshiina Hesekiya gideaba ‘gwayi sugoocheanda haw was sugoocheanda Ashuru, rarooni irariin aneeda?

⁵ Gighayi gideaba ng'asheega mwadaagha gaygweadu uurda ea fughareeda aba jeeda ng'ucheeda? Gighusi ng'eaha ea nung'usean heeda?

⁶ Ng'ula, gibwati fuga Misri, saawa gawuurji bileangida giinyeat bea diigheecheanda ama siida bwata ghwaak geatinda. Ak ea giduurji Farao gil was sugoocheanda Misri aba fuga sean bwata niny.

⁷ Ak eara ayeeshiinean, “geabwat NG'UTAMIIDA was ASEETEANYA,” heapi mii dea ghayi nyarja Hesekiya heeda wagiidaanyi, ak gwayeesha fuga Yuda ea Yerusalemu gideaba “gamiiseegwa aghadoawana hiji bea wagiiniini”?

⁸ Asi sina neajeeda sea siideanyu haw, was sugoocheanda Ashuru, ak abeeda gaydagooneegwa Faraasaji sagalamnyooji iyeenya inyas gajanyasa fuga jea gwading'da badahuuka nyaawa.

⁹ Iijea anung' gabiigu bwadaw siida gadiyeeda mwanang' bea jeeda fuga gadiyeeda siideanyu haw, nea agooga ghoabwati fuga Misri, gideaba gajanyasa mutukwajeega ng'ucheeda ea fuga jea gwading'da faraasajeega?

¹⁰ Iing'ulayi ghaahidu dang'uchi ng'eanyiidaang'u ak ghaalaschi uhuuda nea mwaweadan NG'UTAMIIDA? Gwayeeshiinean NG'UTAMIIDA siyeang'da ak ging'ucheewi ng'eanyiini ak gilasi uhuuda.’”

¹¹ Hean ghwalamda Eliyakimu orjeeda Hilkiya, ea Shebna ea Yowa, ak geeyeesha shirikarajeandida hawiin, “Eaniyean abaloola fugaagu bea gadiyeeda aba ghuuta fuga Ashuru, aba gideaba geanali, adibaloolaneasa ghuuta fuga Ebraniya, aba gideaba gwayiing'shi fuga mida uhuuda ghamarda.”

¹² Ghwalamda shirikarajeandida hawiin ak gwayeesha saawa, “Goojeaknean siideanyu haw heeda siidaang'u haw, ea headaang'u dargu ng'asheesu, moojeaknean heeda fiisu mida uhuuda ghamardean, aba gideaba saawa gawuurjeewaneegwa, iing'ata eawoojisu ng'ay gayghwaak fiyeega nyaawa nea ghwali sagwaseega nyaawa.”

¹³ Hean ghamiinaada shirikarajeandida hawiin ak goojuur aba ghuuta haw bea fuga Ebraniya nea gwayi, “Oaleaydiit ng'asheega sugoocheanda haw, was sugoocheanda Ashuru.

¹⁴ Gwayi sugoocheanda, ‘adagwareenganeegwa Hesekiya, aba gideaba maygwalealneegwa.

¹⁵ Ak ea adoamwaschi foolayda Hesekiya bea gideaba abwata NG'UTAMIIDA nea gwayi, “Gayghaweadeasa NG'UTAMIIDA nea mujiineani majeayiin geatinda sugoocheanda Ashuru.”

¹⁶ Adooleeysiit Hesekiya, aba gideaba gwayi sugoocheanda Ashuru, “Abeaha hoyyoo aba heedeanyu, ak goomang'awu apkaana heedeanyu. Abeeda gaygaba siisi ak haghweega sabiiboadaanyi ea haghweega meaghayeandaanyi, nea gaba siisi leah beega healadeadaanyi.

¹⁷ Bwak ea dahidu ak ghaayaadeagwa ng'eanyiida uurji ng'eanyiideang'wa, ng'eanyiida mida booga ea difaayi, ng'eanyiida mida mukaate ea madameega sabiibu.

¹⁸ Ashageada adaghwahidu Hesekiya ak gwareenganeegwa nea gwayi, “Gayghaweadeasa NG'UTAMIIDA.” Heapi gwanda aseecheeka eemoojiga niighu ng'eanyiidaanyi aba geatinda sugoocheanda Ashuru?

¹⁹ Gwanda yeenu aseecheeka Hamati ea Arpadi? Gwanda yeenu aseecheeka Sefarfaimu? Heapi niighu Samariya aba geatindeanyu?

²⁰ Aba jeedeaba aseecheeksu sean bea darooraksuun, gwanda dea niweat darooraka nyaawa aba geatindeanyu eara NG'UTAMIIDA ghaweat Yerusalemu aba geatindeanyu?’”

²¹ Ak geasiinda measha ghuutaanyi eara ng'asheanjagi, aba gideaba nih diigheanda sugoocheanda gil, gideaba “Adoashaayi ghuutaanyi.”

²² Hean Eliyakimu orjeeda Hilkiya was siida ahaaghwa gheeda sugoocheanda, ea Shebna was ng'oorshoocheanda, ea Yowa orjeeda Asafu was siida ng'oora ng'asheega damanyoojiga, hean gaweay heeda Hesekiya nea hang'weaka nyaawa ea beareadi, ak geerukusa Hesekiya ng'asheega shirikarajeandida hawiin.