ISAYA 35 - Bibliyeeda Ghaydit

Naweeda ghaydit

¹ Gaygahoosan dareapcheeda ea ng'eanyiida ghajaam, ak gaygang'weela eeshtearajeanda nea gooruudu deakghweeda.

² Gaygooruudu deakghweeda saang'a nea gahoosan ak gang'weela nea gwasarman. Ak gajeataw giigheambiita uurji diita bea Lebanoniin, gidamiyda giijeeda Garmeli ea moangoachiyda Sharoni. Gayghwadaah buuneeda giigheambiita NG'UTAMIIDA ea hawunda ASEETEANYA.

³ Anung' ghwanyas uurda geatinga ng'arng'ari, ak ghoanung' gamajeegiidi gutung'eakeagwa ng'arng'ari.

⁴ Ayeeshiina fuga ning'ut muuwda gurooruunatka nyaawa gideaba, “Oahang'waanya geat, adoabeali! Ng'ula, ASEETEANG'WA gayghwahidu ghawalda mureandooda, ak ghwalas uhuuda weajoodigeagwa ak ghwahidu niny ghoaghuuheagwa.”

⁵ Hean abeeda gayghoang'wearda gheanyanga fuga ng'oowi, nea gwayiing'shi fuga miinyi.

⁶ Abeeda gayghang'was fuga badoojiga gawuurji ndoopkeeda, nea gwasarman siida manda ghuuta aba hooseaneega; aba gideaba gaygagulda beega aba dareapcheeda, nea gwarina beega jeeda eeshtearajeega.

⁷ Nea iseaskweanda gareadi mida jeeda dareapcheeda, gayghoah dabascheanda beega, ak ng'eanyiida ghajaam gaygwarina gheanyanga eeniga beega, nea heeda abiita fureayoonga gayghwanyiit beega, ak gaygwarina nyeega ak gwaheetu ea gawuurji diigheetka.

⁸ Nea aba jeedida gaygwanda naweeda bareanda, ak gajeeguura “Naweeda ghaydit;” ak fuga riing'eega ea maygwasik naweedida, geaghus fuga ASEETA, ak eara fuga dasheahi, maygwarooda aba naweedida.

⁹ Ak hooweani ea maygwanda ng'adiida, nea manda diyeayda ng'waan wassean jea gwasik naweedida, nea maygwanda aba hoowa, geaghus gwasik fuga ninyas lealeanooda.

¹⁰ Ak fuga adaw NG'UTAMIIDA lealeanooda gaygabiigu, gayghapka Sayuni nea gwasarman aba hooseaneega manda muudeanooda, ak gaygwandeawa hooseaneega ea ng'weelooda, ak ea maygwanda gurmeahiida ea shooka.