ISAYA 33 - Bibliyeeda Ghaydit

Mooshta ghawooda bea weeta

¹ Shageada ang'iing'eeda ilasi uhuuda siidean, nea ang'iing'i ea miyealas daang'u; Shageada ang'iing'eeda isinayi ng'asheega milmilandean, nea ang'iing'i ea miyeesineey milmilanda! Inyas giihiidi lasooda uhuuda eara daang'u gajealas, inyas giihiidi sinooda milmilanda isiniisi buuneeda, abeeda eara ang'iing'i gajeesineey milmilanda.

² Ea NG'UTAMIIDA bwaydaneasa aba gideaba geeghuscheey ang'iing'i. Ak ginung' eediiweey galeagasean ak giighuuheasa damanda sawanadeeda.

³ Inyeessa ghwayiiy buuneeda nyeashtaang'u ak gwasalda, nea inyeesa ging'eadi ak ghwadarda eemoojiga.

⁴ Nea easangaagu gajeepisa gawuurji gidabitiisiinda diyeanga, ak gayghang'eataawa uhuudaanyi gawuurji gidang'eetiideayda deashamga.

⁵ NG'UTAMIIDA ea ghaambiidaat, aba gideaba gwanda humng'eeda; ak ea ninyiit Sayuni girgweageeda doabiiwaat.

⁶ Damandaang'u gayghoah damanda lealeanooda muuchi, ea weaghuumeeda, ea fughareeda; gheawalmeeda NG'UTAMIIDA giidiiwshoadaanyi gil.

⁷ Ng'ula, fuga nyaawa meanyi gooyeawda aba jarooda, nea fuga siicheagu bea hoyyoo gooyeawda aba sawanadeeda.

⁸ Naweeda bareanda sinung'waada, ak ea manda siida aat naweedida. Nea eara neajeeda ea sinuus, nea geefool fuga muuwu ng'asheega, ak ea manda siida duupa sih nuut.

⁹ Ng'eanyiida goonyahuushi nea ghaghajaamiit, dimda Lebanoni nighajaamiit, nea moangoachiyda miy bea Sharoni ea niwuurji dareapcheeda; ak Bashani ea giijeeda Garmeli ea niibitbit seenga geediga.

Ng'utamiida goowoowsa weajoodigaaschi

¹⁰ “Asi gaydang'eat,” gwarugu NG'UTAMIIDA, “ak gaydeadiing'u geaw; nea ghaaghaambiichi geaw.

¹¹ Ak agooga gajagweayiida ng'ooyinda, ak gajajiila nyeega gajeami; giisiimeandeang'wa gawuurji beasta iidu jea ghwaageagwa.

¹² Ak buuneeda gaygawuurji gil ak beasta ea gawuurji deareeda nea gawuurji halaghweenga silajaada ak geejaksa jeeda beasta ak ghwaak beasta ea gamurjan.”

¹³ Oaleaydiit gichea dasin agoogeeda oowooschi sheagi, ea agoogeeda oowooschi neeki gajadaaha uurdeanyu.

¹⁴ Fuga riing'eega mida Sayuni nibeal, nea gaboodani fuga mwaawala gheang'da ASEETA nea gwayi: “Gaygabadaksa ng'eaha beastida ng'waaniin? Ak gayghoamu goobiida ng'eaha jeeda beasta manda muudeanooda?”

¹⁵ Siida giibinda doabiiwaat gil, nea gwaruku ng'asheega miyaas, nea magasa meanang'oocheanduumeeda agita gheanyanga buuneeda. Ak ea mayghamwas seawshooda earahay ak ea magasa ghwayiiy iita ng'asheega ng'ucheeda, nea magasa gideaba gayghwadaah ng'asheega munyas.

¹⁶ Siida sunu gaygoobiida humng'eeda; ak heeda abiita ea sineaweesa ghamarda sideasa lagheanga hees. Ak gajeataw gichea ghwaak galeagasean, nea beagaaschi bea leeyda ea maygoosha.

Giigheambiita jea ghwahidu

¹⁷ Gajadaaha sugoocheanda aba heeda abiita miy, ak gajadaaha ng'eanyiidaang'u haw bwara.

¹⁸ Ak gaygooteemshi gurooroadaang'u aba muuwda, nea gwayi: “Gwanda yeenu dea iida haleanjeeda? Gwanda yeenu dea adeeni gwaadi? Gwanda yeenu dea iida madalajeega?”

¹⁹ Maygutaah gicha fugiga ng'weaniin, fuga hang'oonyi ng'asha, mwoamu eanal bea iita buunga mwoamu eanal

²⁰ Ang'weersiina Sayuni mujiineeda ghweelmoojigeagwa, ak gaydaaha Yerusalemu niiw giibinda miyeenooda bea maheemajeanda majeek, ghamardaanyi majeamu ealoat. Nea eara ghealoonigaaschi ea majeamu ealach.

²¹ Ak gajeendeayeena NG'UTAMIIDA hoauur aba hoowa, heeda mida eeniga hees ea healatka, heeda mayghoamu gwasik maleambooda ea gidida simanmanean, nea eara maleambooda haw bea ng'ucheeda ea maygwasik hoowa.

²² Aba gideaba NG'UTAMIIDA dea jea gooheeleeweasa gil, NG'UTAMIIDA dea ambaleasa gil NG'UTAMIIDA sugoocheandeanya gil, ak gaygwalealneasa.

²³ Ghealoonigaagu nibealbeal, siraay eaghirit muuchi aba guumda daraneeda nyaawa, ak ea siraay eegilip weeloojiga hang'da. Hean iidu geelaja easanga, ak eara fuga badoojiga ghwanyas easanga.

²⁴ Ak ea manda siida jea gwayi, “Aniini ghaamnyaanyi,” ak fuga mida jeedida gajeesamsa riing'eega nyaawa.