ISAYA 32 - Bibliyeeda Ghaydit

Sugoocheanda doabiiwaat

¹ Ng'ula, sugoocheanda gaygoombaliischi aba doobiiwnata, ak eara fuga hees gaygoombaliischi aba doobiiwnata.

² Gaygaba siisi uurji heechea eefuysa geat aba jeameeda, ak gawuurji heechea eefunya geat aba roopta jeameeda, ak gawuurji eeniga mida beega mida ng'eanyiida ghajaam, ak gawuurji jirooneeda lagheaneeda haw mida jeeda dareapcheeda.

³ Ak gheanyanga nyaawa ang'wearu ea maygwadukuta, nea geayiing'shi gaygwayiing'shi muuchi.

⁴ Fugiga sina ng'asheega nea ghwalamwajiin, gayghwalamwach girgweageeda aba weaghuumeeda, nea gea ageangean, gayghoamu gabalool.

⁵ Siida dasha maygudeeguura siida bwara uhu, nea siida ng'uyeega ea maygudeeguura siida mureeda.

⁶ Aba gideaba fuga dasheahi gabaloola ng'asheega leendeeda, ak gurooroadaanyi gaygwasin gea munyas; gaygwasin milmilanda nea gwarugu ng'asheega mii huumwa gil, aba badayda NG'UTAMIIDA, ak gwanung'usa heeda fuga bearji jalooda nea mandeawana gil, ak ghaweada beega fuga ak muwoash.

⁷ Ng'uyeega siida ng'uyeega ea muy, inyeessa gwanaba gea munyas, aba gideaba ghwalas uhuuda fuga ng'arng'ari aba ng'asheega ng'uyeega, earapeadi siida rugu ng'asheanda doabiiwaat.

⁸ Ak siida mureeda gooteemsheesa gea mureeda, ak ghoang'waay muuchi ng'asheega mureeda.

Girgweaksiinda ea biiknooda

⁹ Gadeemga mida jeeda miyeenooda ang'eatng'eada ak gooleeysean iit; ak gooleeysean iit gideargu.

¹⁰ Aba jeemba gwanyagi gajeeneayaneegwa agoogeeni oowooschi lang'uudeadiin, aba gideaba manda booga jea alaja, ak eara haghweega sabiibu ea maygwanda.

¹¹ Aboadana aba muuwda ea gadeemga mida jeeda miyeenooda, anyasa sawanadeeda agoogeeda maduupeena gil haleanjeeda; afwakta hang'weakeagwa ak gookweali hang'weaka guniyajeega.

¹² Agulgula daghanuunatkeagwa aba badayda madameega miyaas, ea aba badayda sabiibooda jih muuchi.

¹³ Aba badayda ng'eanyiida fugeasu, rinna halaghweenga ea ng'eamga; ea aba badayda gealga sean nyiit fuga hoosana ea mujiineeda mida ghweelmeeda.

¹⁴ Aba gideaba gajeanung'wa heeda gheeda sugoocheanda, nea mujiineeda nyiit buuneeda maygwanda jeeda sih, ak heayeeda ea madalooda gayghoah heechea goobiita diyeanga damanda manda muudeanooda ak gahoosan siingiiga aba jeedida, nea ghoah haghweega gisilga.

¹⁵ Gaygwasnu bwak ea gagooneasa ASEETA gurooroadaanyi, ea ghoah dareapcheeda madamnyeanda jih muuchi. Nea madamnyeanda jih muuchi gayghoah dimda.

¹⁶ Doobiiwnata gaygoobiida jeeda ng'eanyiida ghayi was dareapcheeda, nea goobiida doobiiwnata jeeda madameega jih muuchi.

¹⁷ Aba doobiiwnata buuneeda gayghwanyas hoyyoo, ak gaygaba ng'eanyiida saw nea gabaseayu damanda manda muudeanooda.

¹⁸ Ak fugeasu gaygoobiitpiit nea gaba hoyyoo, aba heeda siipteada nea geebaseayu, aba heeda ayisaw.

¹⁹ Gayghwaroabwan roopta lagheanga, iisilach geediga diimda ak gayghoabeada mujiini.

²⁰ Ghoang'wani agooga aba gideaba goohisti boogeagwa aba heeda mida beega, dugweagwa ea digeeniga gaygwaneayeata gidagasiida.