ISAYA 31 - Bibliyeeda Ghaydit

ASEETA gayghoahaaghwa Yerusalemu

¹ Eamuy daanyaawa gea inyeesa ghwararang'aada gaweay ng'eanyiida Misri gagasa weeta eara gea ghus faraasajeega, ea gea ghus faraasajeega aba gideaba aasaang'a, ea fuga ding'da faraasajeega aba gideaba gwandeawa uurjeenga muuchi, ak ea masachsiina ghaat dea Ghaydit bea Israeli nea magasa NG'UTAMIIDA!

² Ak niny gwandeawa weaghuumeeda, ak gaygweadu sawanadeeda, nea mayghwayam ng'asheagaaschi, ak gayghang'eat gang'uchi sea fuga munyas seara, ea gea weat fuga munyas.

³ Ak fuga Misri ea buuneeda gil, mii ASEETA; nea faraasajeega nyaawa ea diyeanga gil mii guroorooda. Inyeessa ghamiinda NG'UTAMIIDA geatindaanyi, abeeda gayghoabeada siida deaweeda buuneeda nea ghoabeada sean iyeenyeeda nyaawa.

⁴ Aba gideaba gwayeeshiinean NG'UTAMIIDA, gidamuumiida ng'adiida ghana dayeenda ng'adiida damanda fureewa shageataanyi, asi eara eeguursa jeagiischoodiga saang'a gang'uchi mayghoabeal aba nyeashta nyaawa nea mayghang'ut giyoonda aba ghuusiga nyaawa, asi NG'UTAMIIDA lugweega gayghwararang'aan ghwahidu gang'uchi Giijeeda Sayuni ea heayeenigaaschi

⁵ Gawuurji gidang'eetiideayda dariidaka, NG'UTAMIIDA bea lugweega gaygafur Yerusalemu, gaygafur ak ghoaghu gayghwalas uhuuda ak ghoaghu.

⁶ Ea fuga Israeli, abiiksiina diita ghayi oaheawiin.

⁷ Aba gideaba eaweedida gaygaba siisi jakta sanaamajeagaaschi. Sisna gharinga sisina lapiya ea gea sisna dahaabu siguura dahaabu, nung' geatingeagwa ghang'udaneegwa riing'eeda.

⁸ “Ak fuga Ashuru gajeabwar aba ng'uta, nea mii ng'uta siida gil; ak ng'utiida gayghwanaawa dea siida, ak gaygamng'aw aba ng'uta, nea gheareemangaaschi geanung' gwasin gadiyeeda hang'waay bea soomjeandumeeda.

⁹ Ak sugoocheandaanyi uurji lagheaneeda gaygamng'aw aba muuwda, nea fuga nyaawa hees gaygwanung'usa heeda beendeerajeanda nyaawa aba muuwda,” nih gwarugu NG'UTAMIIDA, dea mida beastaanyi mujiineeda Sayuni, nea duwayda beastaanyi gwanda Yerusalemu.