ISAYA 30 - Bibliyeeda Ghaydit

Heeleesiinda marachi gil sea Misri

¹ “Dashageada diibiga heawanaan,” gwarugu NG'UTAMIIDA, “gasa gideaba gajeergweaksa, ak ea magasa heedeanyu, inyeessa ghamwaal ng'asheega nyaawa nea mii gea gurooroodeanyu aba gideaba geejipsa riing'eeda badayda riing'eeda.

² Saawa ghwararang'aada gaweay Misri, nea miighoanyaashan, abeeda gaweay gagasa heechea gamng'awsa ak gafur Farao, ak ghwanyas heechea goobiida nea gabaseayu aba ng'eanyiida Misri!

³ Asi furiischooni bea Faraohiin aba heedeang'wa gayghoah baspaseega, nea eara heeda oopiidi nea goobeaseayu aba Misri iidu gajahirbibana.

⁴ Aba gideaba fugaaschi hees gwanda Soani, nea fugaaschi ajeakta ea nihita Hanesi.

⁵ Ak gayghoabwaaspwaas sean giika mandeawana weetean nea mayghaweadeagwa ak ea marachi gil, ak ghang'udaneegwa baspaseega ea giiseaneega.”

⁶ Ginyah ASEETA aba badayda diyeanga mida meatkweeda Negebu, was jeeda ng'eanyiida mida sawanadeeda ea giiseaneega, aba hoowa gwanda ng'adiida ea soorearda, ea ichibooda ea ichibooda ng'eetiida, haleanjeeda nyaawa ghwasar digeeniga, nea haleanjeeda nyaawa adiiwi ghwasar ngamiyajeega aba badahuuka nyaawa, inyeesa gaweay heeda buuneeda maygwaloosa gil saawa.

⁷ Aba gideaba Misri ghaweadeagwa mwadaagha nea marachi gil, ak ea neaguuri gheawungaaschi “Rahabu was dea apteada nea ghwasiinda.”

Fuga mandeawana mureeda

⁸ Asi una ak ging'waari aba madeanyaawa, ng'oorsiina badayda beehiida ak ging'oorsi jeeda gitaabu ak ghoah muuwuunooda jea ghwahidu damanda manda muudeanooda.

⁹ Aba gideaba fiisu ea hang'oonyi iheeni, was orjooga ng'uyeega, orjooga mayghwayiiy ginyah NG'UTAMIIDA;

¹⁰ inyeesa gwayeeniisa fuga deaha ng'asheega, “Adoadaayi gil”; ak gwayeesha sibanga, “Adoaramoaranyi ng'asheega doobiiweadi; arukuni ng'asheega sigasayi, arukwiida ng'asheega ng'uyeega,

¹¹ oosiipteawana jeeda naweeda huumwa, ak ghoayamnyi geat anung'usiina heeda naweeda, adagudoorukuneasa badayda Deaghaydit Asagi bea Israeli.”

¹² Asi gwayi Deaghaydit Asagi bea Israeli, “Aba gideaba noofooli ng'asheanji, ak ghoaghuschi ghabasta ea huteawda ak ghoah gidoaghuschi;

¹³ asi riing'eeni gayghwanung' awuurjeewana ghamarda geaw, bwaasha, ak gaygabean ghwanyar, ak ghoabeada aba geeshangiga;

¹⁴ ak giibeedeaydeaba ghamardida gaygawuurji dahuuda sinyarja ak geang'aal ea goosha, nea ea mutghoabit eara banajaneanagi jea eegeana beasta aba jeeda gisheatka ghana dea jea eeramna beega aba jeeda healacheanda.”

¹⁵ Aba gideaba gwayi NG'UTAMIIDA was ASEETA, Ghaydit Asagi bea Israeli, “Inyas goobiigu heedeanyu ak goofuufchi gajaghuuha, inyas ghoasiindi ak ghooghuschaan abeeda gajanyasa uurda.” Ak ea moamwasi.

¹⁶ Ak agooga gooyeenyi, “Manda! Aseasa gajeesaldeawana faraasajeega,” ng'weani aba ng'weega; asi huumwa gil “gaygwasaldeaweegwa faraasajeega ng'weani aba ng'weega,” asi faraasajeega weajoodigeagwa ghang'aleagwa aba ng'weega.

¹⁷ Fih sagalama gayghahoan shirikarajeanjagi was weajoocheanda, ak shirikaraji muut was weajoodiga gayghahoaneagwa oogasean, ama iidu boosteanga gaygawuurji geeta sighastaawa beendeera, mida uhuuda giijeeda ak gawuurji giirooraneeda aba uhuuda heayeeda.

¹⁸ Asi NG'UTAMIIDA ghoamuukghuneegwa ghaweadeagwa; gayghang'eat ak aba gideaba NG'UTAMIIDA was ASEETA ea doabiiwaat, ghang'wana fuga amuughu niny.

ASEETA gayghoadaw ghawooda fugaaschi

¹⁹ Ea fuga Sayuni, abiita Yerusalemu, maygudu abiikta ooyeawda. Aba huumwa gayghabwaydaneey muuchi aba nyeashta shookaagu, inyas ghwayiiy gayghwasha ghuutaang'u.

²⁰ Earapeadi Ng'utamiida jea gagaooneegwa mukaateeyda hashooda ea beega sawanadeeda, asi Giinealshoocheandaang'u maygut ghafuy geaw ak gheanyangaagu gayghwadaah giinealangaagu.

²¹ Inyas ghoayaachi naweeda gal geatinda dugwa ghana geatinda ghaadaam, gajayiinya ghuuta siida aba badaydeang'wa nea gwayi, “Naweeda nih gil ayaada.”

²² Ak agooga gajang'udana ririnnyeanda aseecheekeagwa sisna gharinga sisina lapiya, ea aseecheekeagwa siyiin dahaabu siguura dahaabu gajajakta oosheagiida gawuurji haleanjeeda mideawa ririnnyeanda nea gooyeenyi, “Asi asiipteawana madeedeanyu.”

²³ Ak gaygagooneegwa Ng'utamiida roopta iyoohisti boogeagwa, ak gayghwaheas ak gajanyasa booga saang'a. Nea eara dugweagwa gayghwanyas nyeega saang'a.

²⁴ Heewga ea digeeniga barooda gajeaghwal ghoajeada aba hijagi nea nyeega nyaawa ea sisisin muuchi ak geayiin balang'da nea siileal.

²⁵ Nea gilinyoo ea giijeega geawi gil ea heayeeniga geawi gaygwanda eeniga beega gulda eaweeda jea eabwara weajoodigeagwa nea ghoabeada madalajeega.

²⁶ Ak weeshinda sheeda gaygawuurji dea daknooda, nea daknooda ghoahaada niba ispwa, gawuurji daknoomba eawooji ispwa. Ak ng'asheesu gaygapnu eaweeda jea ghoahaabwa NG'UTAMIIDA deaneaduutka fugaaschi nea ghwarat.

ASEETA gayghwalas uhuuda fuga Ashuru

²⁷ Ng'ula, NG'UTAMIIDA ghwahidu nea gwaleabu deasheagi, nea gaba nyarasta ng'waan, nea ghuutaanyi gwarina aroosta haw, ak ghuutaanyi ghwanyiit nyarasta, nea ng'ushaptaanyi gawuurji beashta.

²⁸ Giisiimeandaanyi gawuurji dea eenda gulda bea beega nyiit, ea ghwahita gheata siida, ak gayghoaleal eemoojiga aba gidida siileeliida jea ghwalasa uhuudean, ak gwarasa madeang'uuka eemoojiga ghealooda ak ghwaat heeda magasa.

²⁹ Ak gajasarmana gawuurji eaweeda ghweelmeeda ghaydit siing'wearu eaweesean, ak gajandeawana hooseaneega aba gurooruunatkeagwa, gawuurji siida ghuut furiimbu nea gawa uhuuda giijeeda NG'UTAMIIDA, was lagheaneeda Israeli.

³⁰ NG'UTAMIIDA gayghwanung' ghwayiiy buuneeda ghuutaanyi ghaambiidaat, ak gayghoahiimu gichea ghwalasta buuneeda aba nyarastaanyi, ak gaygwanda beasta ng'waan, ea siilakghta ea shaarara, ea roopta lagheanga.

³¹ Ak fuga Ashuru gayghang'ut muuwda, iiyiiy ghuuta NG'UTAMIIDA, damanda jea ghabwara aba bileangidaanyi.

³² Ak gilinyoo ea bileangida gil jea ghwalasa NG'UTAMIIDA fuga Ashuru, inyeesa gajeanung' goodeay sea ghuuta gidoondooriida ea bundiida. Nea ng'ucheeda gaygang'uchi niny saawa.

³³ Aba gideaba heechea ea ghwardaawa sugoocheanda Ashuru goola eesin garayi; nea shoomanda gidahaw gil, ak aahaw jih ak beasta gwanda ea ghweenga aasaang'a, ak gayghaghuut NG'UTAMIIDA aba Giisiimeandaanyi uurji eenda gulda.