ISAYA 29 - Bibliyeeda Ghaydit

Giijasta weah Yerusalemu

¹ Eamuy daang'u mujiineeda Yerusalemu, heeda wagiida bea ASEETA, mujiineeda deeksa Dawdi hoorgeadaanyi! Inyeessa ghwahidu gweanyeeka ak ghang'ata, ea ghweelmoojigaaschi.

² Ak gaydang'uda gurmeahiida Yerusalemu, ak gaygwanda giinyahuushooda ea shooka, nea aba heedeanyu gaygawuurji Yerusalemu.

³ Aniini gaydabwada geat lugooda gang'uchi Yerusalemu, ak gaydaneaweesa ak geang'ucheewi.

⁴ Ak ang'iing'i gajeerareang'neey, ak gaybaloola nea gindi ng'eanyi ak ng'asheagaagu gaygwanda ng'eanyi jeeda birjeanda, nea nyeashta ghuutaang'u gawuurji nyeashta ghuuta maloonghajeanda, leabu jeeda ng'eanyiida, ak ng'asheagaagu gaymeang'sheena aba jeeda birjeanda.

⁵ Weajoodigaagu giika saang'aan gaydanung' gawuurji birjeanda, nea giika ghabwasnyiin gaydanung' gawuurji looyda, ak ng'asheanji gajeesin nea geesham,

⁶ ak gaygabareaseey NG'UTAMIIDA lugweega aba giighweendandeeda ea sawooda ng'eanyiida ea nyeashta haw, ea shaarara ea jeameeda ng'waan, ea beasta ng'waan.

⁷ Ak eemeetuw bea eemoojiga ng'uchi sea Yerusalemu, ea gea ng'uchi niny ea museasoadaanyi ea gea anyareas niny, gaygawuurji giirgweatka ea gisiihiimsa bea eawa.

⁸ Eemeetuw saang'a ng'uchi sea Yerusalemu gaydanung' gawuurji siida argweadi nea gweagiischi, amang'eat ea gutgabearji jalooda, ghana siida ak muwoash argweadi nea ghwali beega, amang'eat ea gutghwaak muwoash, abeeda fuga bwat geat sean gaygang'uchi sea giijeeda Sayuni.

Washtaanyi dea heawa miinda gheang'da

⁹ Ahamwageat nea goobea geat, ahinda geat fuga ng'oowi ak goong'oowiidayi! aboogida nea ea adoaleayi difaayi; gwareang'useadayi nea masina leeshooda.

¹⁰ Aba gideaba NG'UTAMIIDA niidearseegwa guroorooda ruweanga, ak ea nidukuta gheanyangeagwa was gheanyanga sibanga, ak ea nidukuta iheengeagwa was iheenga fuga deaha ng'asheega.

¹¹ Ak gilisiihiimu aba badaydeaba ng'asheesu seaniin gawuurji giijasta sing'oorsa jeeda gitaabooda sirat aba giirooraneeda. Ama iyeasi siida was sean nal giisoomanda ak giyeeshi, “Asoamwana gitaabwajeanji,” gaygwayi, “Maydaamu daasoamwa aba gideaba sirat aba giirooraneeda.”

¹² Ama ng'ata geataw gitaabwajeandida siida mwanala giisoomanda ak geeyeesha, “Asoamwana gitaabwajeanji,” ak gwayeesha, “Maydaamu daasoamwa.”

¹³ Hean gwayi NG'UTAMIIDA, “Fiisu gwaneekiisean ak gwasinnean mureeda aba ghuusiga nyaawa gabeachi, nea gurooruunatka nyaawa ea sheageewanean, ak ghoawalan aba diigheanyeeka buuneeda ghayi siinaal.

¹⁴ Ak ng'ula, gaydasima fiisu gicha ng'asheega deamdeameadi, ng'asheega deamdeameadi jea ghahamng'eanyi buuneeda; ak fuga weaghoot gaygoosha weaghuumeeda nyaawa, nea fuga bareahi iheeni, goosha bareaynacheeka iheenga nyaawa.”

Rarooda eaweeda jea ghwahidu

¹⁵ Eamuy daanyaawa giika funya ng'asheega nyaawa NG'UTAMIIDEAN, nea sinaweega nyaawa gwanda jeeda misaneeda, nea gwayeena, “Neada ghwadaaheasa ng'eaha? Ak ghwanaleasa ng'eaha?”

¹⁶ Agooga inyeesa ghoayamnyi ng'asheega! Heapi siida sin sheang'weeda gajeegala sheang'weeda gidida sisiniin gayghoamu goobalool dea sin nea gwayi, “Misinyean ang'iing'i,” ghana gidida sisiniin goobalool siidida siniin nea gwayi, “Siisi mwanala gil.”

¹⁷ Siipuut eawoojisu ng'ay, ng'eanyiida Lebanoni gajeayam ghoah madamnyeanda mideawa sigeeda miyaas, ak gwaji haghweega nea madamnyeanda mideawa sigeeda miyaasiin jih haghweega ea ghoah dimda?

¹⁸ Ak eaweedida fuga miinyi gayghwayiiy ng'asheegeaba gitaaboani nea fuga ng'oowi gayghoamu ghoang'wearda aba jeeda misaneeda.

¹⁹ Fuga eadageat ng'eanyi gayghoahaada hooseaneega nyaawa aba badayda NG'UTAMIIDA, nea fuga barbari mida bugusta buuneeda gaygahoosan aba badayda dea Ghaydit asagi bea Israeli.

²⁰ Aba gideaba dea ng'uta buuneeda muuwda silas uhuuda, nea dea foola buuneeda ea niisha, nea fuga sean manya sinooda ng'asheega munyas gajeanung' goosha,

²¹ Fugiga inyeesa ghwanung' ghoaschoarda ng'asheanda siida aba jeeda girgweageedean, ea fugiga inyeesa ghwayam ng'asheanda was huumeanda ghoah ng'uyeega, nea inyeesa ghwasach siida doabiiwaat ea mwanyasa gidadoobiiwsa.

²² Asi gwayi NG'UTAMIIDA lealu Abrahamu, aba badayda gheeh Yakobo: “Yakobo mwajeapwaaspwaas, nea maygudu ghwayamwa gheamamdaanyi.

²³ Ama inyas ghwadaah diibigaaschi, was gea ghayi aadawji aniini, abeeda saawa gayghoaghaambiit gheawungeasu, gayghoaghaambiit dea Ghaydit asagi bea Yakobo, nea ghabwat ASEETA Israeli.

²⁴ Nea giika roodeadi aba gurooroodean gayghwanyas fughareeda, nea giika aniikghiin gayghwanal gichea ghabeada.”