ISAYA 28 - Bibliyeeda Ghaydit

Miinda gheang'da sugoocheanduumeeda mida wiilooda ng'eanyiida ghayeawa

¹ Dashageada fuga ghwarjeeda ea gea boogideadi bea Efraimu, miyeenoadaanyi gaygooshealda deakghweeda sis, miyeenooda mida jeeda moangoachi mida sigeeda miyaas, nea iheengeaba fugiga ea joara difaayiin!

² Ng'ula, Ng'utamiida gwandeawa siyagi mideawa uurda ak ea majeek, ak gawuurji siilakghta roopta lagheanga, ea shaarareeda nyarja haleanjeeda, ak gawuurji siilakghta beega saang'a gulda, ak nih ea gichea gwajaksiinda ng'eanyi gil aba geatinda.

³ Nea ghwarjeeda fuga leeshi bea Efraimu, gajeeleapsa ng'eanyi.

⁴ Ak miyeenoadaanyi gaygooshealda deakghweeda sis, miyeenooda ambal jeeda moangoachi aba sigeeda miyaas, ak gaygawuurji shaboogheecheanda bean ghwaheas nea mii ghwahita geayda; siida daah gageanu gaptu ak ghwaak

⁵ Eaweedida NG'UTAMIIDA bea lugweega gayghoah shiipcheanda ghaloamwaat, ea ngararooda miy aba heeda fugaaschi boos

⁶ Aba heeda fuga laja girgweaguutka niny gayghoah guroorooda doabiiwaat, niny gayghoadoabiiw eesin gea doobiiweadi. Ak gayghoadaw furiischoodiga mujiini uurda.

Isaya sea sibanga boogideadi bea Yuda

⁷ Ak suh ea niidiiy aba difaayi, ak ea nirooda aba booktuumeeda; ashoohoocheanda ea sibaneeda niidiiy aba booktuumeeda niibita jeeda difaayi, ak ea nirootiisa jeeda leeshooda, gidasiihiimsa nischoarda nea aba jeeda girgweageeda inyeesa ghwaramwasta.

⁸ Aba gideaba measajeega sean ninyiit geeseega, ak ea manda heeda miy.

⁹ “Gayghoanaal ng'eaha fughareeda? Gaygwarukusa ng'eaha ng'asheesu? Heapi, giika siishuukghu, siweada gidingeani?

¹⁰ Aba gideaba geayiin deaweeda badaydeaba niirja, deaweeda badaydeaba niirja, ghealooda badayda ghealooda niirja, hiji gilimwanang', hoowa gilimwanang'.”

¹¹ Asi NG'UTAMIIDA gaygabalool sea fiisu, aba iita eemoojiga, aba iita rabasta.

¹² Abeeda gwayeesha, “Nih heechea afuufana gil; anung' gafuuf dea nibur; nih heechea eefuufa gil”; ak ea manda dea aleeysiit.

¹³ Asi aba heanyaawa ng'asheanda NG'UTAMIIDA gaygwasnu, deaweeda gajeeyiin badayda deaweeda, ak ghealooda badayda ghealooda niirja, hiji gilimwanang', hoowa gilimwanang' aba gideaba iiweay ghoabeadaawa bwadaw, ak gagiishachi ak geang'waay ak geayaat.

Lagheaneeda washiin bea Siyoni

¹⁴ Asi ooleeysiiniit ng'asheega NG'UTAMIIDA ea fuga foola fih, oopali fiisu mida Yerusalemuun.

¹⁵ Aba gideaba gooyeenyi, “Sisinyi neajeeda sea miyeeda ak geeheeli sea gheeda maloonghajeega; ak gooyeenyi maygoobiseasa habitkweeda aba gideaba noanung' ghoah ng'uyeega gidoaghuschi, nea ghoanung' ghoah reengaweega igeamboodeang'wa”;

¹⁶ asi gwayi NG'UTAMIIDA was ASEETA, “Ng'ula, gaydayiin lagheaneeda Sayuni jea ghoah sindeeta, lagheaneeda jea eegala, lagheaneeda washiin bea sheayeeda haw, lagheaneeda majeek bea sindeeta: ‘Nea siida mwas mayghang'ut muuwda’.

¹⁷ Doobiiwnata gayghoah gichea eeteenda aba sindeeta, nea alooheeda gayghoah ghealoadaanyi. Nea roopta lagheanga gayghoaraghwaata fuga sean bea ng'uyeega ikghusi, nea guldeayda gaygwanyarja hoorgeadaang'u iibiiti bea seayu.”

¹⁸ Hean neajeeda ghayi ooneaji sea miyeeda gayghwayamwa, nea eara heeleeda ghayi ooheeli sea gheeda maloonghajeega gajeegeanda; inyas ghwahidu habitkweeda hawiin gaygwajakseegwa ng'eanyi.

¹⁹ Iinyoo ghang'ata sean, mayghoabuudeagwa; aba gideaba gayghang'ata sakteayda, ea askweari ea eawa; giijasta sunu iisiyiiy gayghang'uda fih muuwda.

²⁰ Aba gideaba bulaliida ea nuwaas muuchi, mayghoamu siida goowiida aba badaydaanyi, nea eara hang'da aamwanang' ea mwahita giikwealda.

²¹ Aba gideaba NG'UTAMIIDA gayghang'eat gawuurji giijeeda Berasimu, ak gayghwanyareas gawuurji moangoachiyda Gibeoni, ak gwasin gadiyeadaanyi–gadiyeadaanyi ghwasajaada! ak gwasin gadiyeadaanyi–gadiyeadaanyi daamdaamwaat!

²² Asi ghamneawa adoahuuyi fuga foola fih, aba gideaba adeeghirit ghealoonigeagwa; aba gideaba naayiinyi aba heeda NG'UTAMIIDA bea lugweega iita girgweageeda jea ghwahidu, ak ea simanya was dea jea ghwanyas ng'eanyiisean.

Weaghuumeeda ASEETA

²³ Oaleaydiit ak ghoayiinyi ng'asheegeasu; oaleaydiit ak ghoayiinyi ng'asheandeanyu.

²⁴ Heapi siida bwarng'eanyi jea gwahista, neada ghabwarng'eanyi mwadaagha? Heapi mabwara ng'eanyi nea masissina ghuuta madamnyeandaanyi?

²⁵ Iyahiit barooda madamnyeandaanyi, heapi maygwahista sagharooda aba ng'eanyoojiga sean, nea goodearsa geediga seenga ng'andidi, nea gwahista ngaano, nea gwasin ghealooniga ak ghwayiin nganooyda siguura shayiiri hijagi loat, ak gwahista geedi suuk aba moonghoadaanyi?

²⁶ Siisi inyeesa ghwanal gichea gwasin; aba gideaba inyeesa ghoanaal ASEATAANYI.

²⁷ Aba gideaba sagharooda majeebina dabicheanda ng'aniip, ghana mutukooda angiiri heewgean majeesiik badayda geediga seengiga ng'andidiin; sagharoodida gajeebina bileangida, ak geedigiga bea seenga ng'andidiin gajeebina ng'archeanda.

²⁸ Siidida las ngaano mayghwalas ea gwanyarjeawi gheanyanga? Niny ghwanal gichea ghwalasta, aba mutukooda angiiri heewgean, nea maygwanyarja eara gheang'nyeanda ngaano

²⁹ Giimuusteaba haleanjeeni gwaleabu heeda NG'UTAMIIDA bea lugweega; bea girgweaksiinda daamdaamwaat, ak weaghuumeadaanyi ghang'al gea buuneesean.