ISAYA 27 - Bibliyeeda Ghaydit

¹ Ak eaweedida NG'UTAMIIDA gaygageanu ng'utaanyi ng'waan, majeek, haw ak ghwalas uhuudeaba ichiboodida deambiiri siguura Lewiatani, ak gayghabwar Lewiatani ichiboodida hala geaw abiita jeeda basoodean.

² Ak eaweedida, “Asarmana duumda madamnyeanda sabiibu aabwariinyi!

³ Aniini, NG'UTAMIIDA gil, ak geawooschi furiischoocheandaanyi; nea ghaayiinyi beega damanyoojiga sean. Aba gideaba adaghwadatas sih, ak geafurji eawa ea askweari;

⁴ Meandeawani nyarasta aba jeedeanyu. Inyeeda gwachi goobissean ng'eamga ea halaghweenga gwachi gaydang'uchi saawa, ak ghaaghwardi sean aba beasta.

⁵ Geaghus ak ghoang'waay uurdeanyu, ak ghoah hoyyoo sea aniini, asi ak gwasin hoyyoo sea aniini.”

⁶ Galanya jeata Yakobo gayghang'uda ng'eanyi hawunga, nea fuga Israeli gooruudu deakghweeda ak ghafiirfiir, ak gayghwanyiit ng'eanyiisean haghweega.

⁷ Heapi nilasta saawa gidaghayi silasta saawa? Ghana sinuusta saawa gidaghayi sinuusta gea ghayi nuus saawa?

⁸ Ghwalas fugaaschi ak goobaleak, damanda shaarareeda ng'waan leabu gayeew, ak ghwanung' goosiipta aba lasooda ng'waan.

⁹ Asi giidiinyeanda Yakobo gajeesamsa, nea ea haghweega majeekcheewi gil bea geandeayda riing'eadaanyi, damanda sina lagheanga sean bea heeda wagiida, gawuurji roonghooda lagheanga sigul ghoah basanga, ak ea maygwanda Asherimu ghana heeda wagiida ng'andit jea ghoabit nea ghamiinaada.

¹⁰ Nea mujiineeda sineaweesa ghamarda, ea sinung'wa heeda, hean geanung'wa heeda ak geanung' gawuurji dareapcheeda, nea geanung' ghoah heeda haghweeda haleanjeeda ea ruweanga nyaawa.

¹¹ Nigajeamiidi damealga geediga ak gagiishachi; ak gayghapka gadeemga ak ghaghwarda. Aba gideaba suh mii fuga mideawa fughareenga gil, aba gideaba dea sin saawa ea mayghabwayda saawa, nea dea sin saawa maygwasamsa.

¹² Nea eaweedida, ghang'eada eenda Furati ea ghwahita moonghooda Misri NG'UTAMIIDA gayghwalach boagaaschi, ak agooga gajeeliimuunaneegwa, Ea fuga Israeli.

¹³ Ak eaweedida gajeaghuut durumbeateeda haw, ak fuga Israeli roosa ng'eanyiida Ashuru, ea gea darsa jeeda ng'eanyiida Misri gaygabiigu ghabwat NG'UTAMIIDA aba giijeeda ghaydit aba Yerusalemu.