ISAYA 26 - Bibliyeeda Ghaydit

ASEETA gayghoadaw fugaaschi jooriischooda

¹ Eaweedida sarmeani gajeesarman aba ng'eanyiida Yuda; “Aseasa geendeawi mujiineeda majeek; ASEETA gaygooneaweeseasa lealeanooda gawuurji ghamarda.

² Ajaada ghuusiga dooshinga mujiinajeega, gaweay jeeda eemoojiga doobiiweadi sina ng'asheega doobiiweadi.

³ Gayfura siidida ghusnyi gurooroadaanyiin, aba hoyyooyda doabiiwaat, aba gideaba ghaghusnyi.

⁴ Ghusa NG'UTAMIIDA galeagasean, aba gideaba NG'UTAMIIDA was ASEETA lagheaneeda manda muudeanooda gil.

⁵ Aba gideaba niihiing'u fuga abiita heetiyeada, was mujiineeda nalaat. Ak ghwanung' ghwahiing'aan ea ghwahidu ng'eanyi ak gwajaksa jeeda birjeanda.

⁶ Ak ghamneawa, mujiineani ghoala badayda fuga barbari ea gea mandeawana gil.”

⁷ Naweeda siida doabiiwaat doobiiwnata, ang'iing'eeda iwoosi doabiiwaat adoabiiwa naweeda siida doabiiwaat.

⁸ Ea NG'UTAMIIDA, aba naweeda girgweageadaang'u geamuukghuneey giipkeata gheawungaagu gidagasa gurooruunatkaasa.

⁹ Gagaseey gurooroodeanyu eawa, ak geagaseey aba gurooroodeanyu. Inyeessa giirgweaksi ng'eanyiida, abeeda gayghwanal fuga sean bea ng'eanyiida doobiiwnata.

¹⁰ Siida muy iisiitaw alooheeda ea mayghwanal doobiiwnata; aba jeeda ng'eanyiida doabiiwaat gaygwasin ng'asheega munyas ak ea mayghwadaah giigheambiita NG'UTAMIIDA.

¹¹ Ea NG'UTAMIIDA, gigatgadi geatindaang'u, ak ea meadaaha ahiimsiina gidubwariiydi fugaagu, ak gajeapwaaspwaas, beasta nyarastaang'u gaygwaduulu sean.

¹² Ea NG'UTAMIIDA, ang'iing'i ginyakneasa hoyyoo, ak ginung' eanyagaada aba gadiyoojigaasa sean.

¹³ Ea NG'UTAMIIDA was ASEETEANYA, ghayi niimbaleasa fih suuk ea ng'utamoojiga nyaawa, ak geamwaschi gideaba ang'iing'i ak ghwahit guwoosi ASEETEANYA.

¹⁴ Saawa nimeewa, maygut goobiida; ak ea niiw maloonghajeega, ak ea maygut gwaduutu, aba gideaba giweesi ak ginung' goosha, ak ginung' goosha ea mudeapkaat saawa.

¹⁵ Ak ea niihaadi eemeedeanya, Ea NG'UTAMIIDA, ak ea siikghaambiinyi ak ea niihaadi moonghajeega sean bea ng'eanyiida.

¹⁶ Ea NG'UTAMIIDA, damanda sawanadeeda iissa geegaseeyi ang'iing'i, iissa ghamoash muuchi ghawooda damanda mideewa lasitaang'u badahuuka nyaawa.

¹⁷ Gawuurji gatmooda bearji lajooda damanda jeata, ayeawda aba lajooda, ak gooyeawda aba sawanadeeda, ak ea gidasiwuurjeewi gil aba madeadaang'u, Ea NG'UTAMIIDA;

¹⁸ Aseasa geanyaschi sawanadeeda jeata, ak geejiili jeameeda mwadaagha. Ea manda jooriischooda sinyaschi aba badayda ng'eanyiideanya ak ea mii eamuusa eahaada mooneeda buuneeda aba badayda ng'eanyiida.

¹⁹ Muscheekaagu gayghwanyas eaweega, saseenuuka nyaawa gaygwaduutu. Ak gealil aba jeeda bung'eadinga nyaawa, gayghang'eatng'eat ak gwasarman aba hooseaneega! Aba gideaba NG'UTAMIIDA gaygweadu rahoadaanyi bea eaweega nea muscheeka gaygwaduutu ak ghapka nea majeekcheew.

Girgweaksiinda ea giideelnooda

²⁰ Apkaani fugeasu, ak gooweayi ak gooweayi jeeda ghoorajeegeagwa, ak ghoarachi gidaghuudajeegeagwa; ak ghoafunyi geat gil mwanang', ea ghang'ata girgweageeni.

²¹ Aba gideaba, ng'ula, NG'UTAMIIDA ghwahidu nea gwaleabu humng'eeda heeda abiita, ghwahidu ghwalas uhuuda fuga badayda ng'eanyiida aba riing'eega nyaawa, ak ng'eanyiida ea maygut ghafuy fuga ghayi sibwar, ak gayghoahiimu foojeanyeeka sean ghayi sibwar.