ISAYA 25 - Bibliyeeda Ghaydit

Sarmeeda giigheambiita

¹ Ea NG'UTAMIIDA, ang'iing'i guwoosi ASEETEANYU; gaydaaghaambiinyi, nea ghaabwachi gheawungaagu; aba gideaba nisini ng'asheega deamdeameadi, gidaghayi iibean manyiida garayi, gaysina aba huumwa nea giidoabiiwi.

² Aba gideaba ninung' ghoah mujiini dulgwajeanda, nea ginung' ghoah eemeeda, mujiineeda mideawa ghamarda; nea gheeda rabasta ea mudea mujiini gil, ak ea maygudeadeas ea ghoah damanda manda muudeanooda.

³ Asi gayghoaghaambiinyi fuga majeekcheewi;

⁴ Aba gideaba ang'iing'i guwoosi heeda mang'awiisa fuga barbari, heeda mang'awiisa fuga mandeawana gil damanda sawanadeadaanyi, heechea eemng'awsa iihidu shaarara, jirooneeda damanda mideewa daknooda; damanda ayuuk jeameeda fuga munyas searooji nea gawuurji shaarareeda las ghamarda,

⁵ gawuurji daknooda dagu aba ng'eanyiida ghajaam. Ak ang'iing'i gaynung' ghwasiinda rabasta; ak gawuurji shamooghooda dukuta daknooda, ak ghwanung' ghwasiindaaydunu sarmoojiga jooriischooda bea fuga munyas searooji.

ASEETA goodiing'diing'da ghweelmeeda

⁶ Ak aba uhuudeaba giijeeni NG'UTAMIIDA bea lugweega gaygwasissa buuneesean ghweelmeeda, haleanjeeda riisheadi, ea ghweelmeeda difaayeeda miy, ea banyeega miyaas, ea nagheeda, ea difaayeeda miyaas.

⁷ Nea aba uhuudeaba giijeeni gaygageanda NG'UTAMIIDA shamooghooda, gurmeahiida dukuta buuneesean, ea sawanadeeda dukuta eemoojiga sean.

⁸ Ak gaygageanda miyeeda damanda manda muudeanooda, NG'UTAMIIDA was ASEETA gaygoobuus dabeaka mida gheanyanga sean, nea gageanda baspaseega fugaaschi aba badayda ng'eanyiisean, aba gideaba nih gwarugu NG'UTAMIIDA.

⁹ Abeeda eaweecheanji gajeeyi, “Nih ASEETEANYA gil ghayi siimuughu; nea gwandeawa uurda jea ghaweadaneasa. Nih NG'UTAMIIDA; ghayi siimuughu gil, eehoosana nea geeng'weelayi aba gideaba nilealneasa.”

ASEETA gayghwalas uhuuda fuga Moabu

¹⁰ Aba gideaba geatinda NG'UTAMIIDA gaygoobiida uhuudeaba giijeeni, nea fuga Moabu gajeeleapsa ng'eanyi aba hoowa midean, gawuurji gidasiilaapta nyeega gajeami aba jeeda shoomanda sururuuda.

¹¹ Ak gaygagatkat geatingaaschi gawuurji siida bwar lughunya aba jeeda beega, ak NG'UTAMIIDA gayghwahiing'u ghwarjeadaanyi aba fughareeda, ea searoojiga munyas bea geatingaaschi.

¹² Ak gaygwanyarja mujiinajeega nyaawa bea Moabu sideasa ghamarjeeka geawi, ak ghwanung' gaweay ng'eanyi.