ISAYA 22 - Bibliyeeda Ghaydit

Giijasta aba badayda Yerusalemu

¹ Nih giijasta gil siihiimu aba badayda moangoachi. Ak gwandaani? ghwasaan anda buuneesean bea mujiini gwading'da iheenga gealga.

² Ang'iing'eeda indeawi nyeashta haw, mujiineeda jaliida bea hooseaneega. Fugaagu ghayi sibwar meabwarana ng'uta nea meebarsiina jeeda ng'ucheeda.

³ Fugaagu sean ambaliischi nisalda sean, ak geang'waay damanda mii gwajakteawa geacheeda. Fugaagu sean sinyas geang'waay, earapeadi nisalda ea gwasheagiit.

⁴ Ak ghoah gideayeeshiinaneegwa: “Adooduubay gil aba badaydeanyu, anung'waada deayeawda aba sawanadeeda; adoodeawiichi aba giiheawdeaydeanyu aba habitkweeda nyas fugeasu.”

⁵ Aba gideaba NG'UTAMIIDA was ASEETA lugweega gayghwanung' ghwahidu eaweeda jea gaba shooka ea gooleabi geat buuneeda nea gwanda deambirista aba jeeda moangoachiyda gisiihiimu, ak ea sinyarja ghamarda mujiini nea giiguuleanda fugaaschi gawa ea ghwahita iheenga giijeega.

⁶ Ak lugooda Elamu ea niing'waay ghuweang'da ea geatka, ak ghapka nea gwanda badayda faraasajeega ea mutukwajeega ng'ucheeda, nea lugooda Giri goodiing'diing'da igeambooniga nyaawa.

⁷ Moangoachihajeagaagu iloadi ninyiit mutukwajeega ng'ucheeda, nea fuga ding'da faraasajeega ghabwatgeat aba ghuusiga dooshinga.

⁸ Ak ea niibeada furiischooda Yuda. Eaweedida gooweayi agasa dabita ng'ucheeda siitiiwsa jeeda gheeda mida dimda,

⁹ ak ghoadaayi bearuutka saang'a bea ghamarda mujiineeda Dawdi, hean googeanu ak ghoanyiichi beega dabascheanda.

¹⁰ Gooyiidayi gealga mida mujiineeda Yerusalemu, ama ng'ata goonyarji gealga mwaatkwa aba gideaba ghwanyagaan lagheanga jea eadeasa ghamarda.

¹¹ Agooga goodeeksi bugusta ghamarda dabascheanda jea goobiita beega; inyeesa gagulna beega dabascheanda waas. Ak agooga ea mooduupeeni gil ninyeeda sin ng'asheesuun, nea mooduupeeni gil ninyeeda ghayi sin ng'asheesuun.

¹² Eaweedida NG'UTAMIIDA was ASEETA lugweega gaygaguursa buuneeda gooyeawda nea goonyahuushi, nea gwalootu buudeega nyaawa nea gookwa guniyajeega.

¹³ Ak ng'ula, agooga goohoosanyi nea ghoayaaji reari, ak goonuuschi dugwa ea gisilga, nea ghoayaaji banyeega nea ghoaleayi difaayi nea gooyeenyi: “Eeyeagiischeena nea geeleeshi, aba gideaba numuji gajeemeewa.”

¹⁴ Ak goobaloolan NG'UTAMIIDA bea lugweega nea gwayi, “Aba huumwa riing'eeni majeesamsa, nea maygwariteawaneegwa ea ameewa,” gwarugu NG'UTAMIIDA lugweega.

Reekusiinda Shebina

¹⁵ Gwayeeshiinean NG'UTAMIIDA lugweega, “Una heeda Shebina was siida adiiwdooschi nea siida ambal fuga gheeda sugoocheanda gil ak giyeeshi niny,

¹⁶ Gisin naaha aba hiji? Ak gindeawi ng'eaha aba hiji, bwak ea ghurghura bung'eeda aba hiji, nea gigurgursi bung'eeda hoowa diyeadean, nea gisisi geaw heeda giibinda aba jeeda gwaleeda?

¹⁷ Ng'ula, NG'UTAMIIDA gaygwajaktaneey aba uurda ang'iing'eeda indeawi uurda; nea ghoamughunyi aba hijagi.

¹⁸ Aba huumwa gayghamughunyi ak gwajaktaneey uurjeewana mwapiri, bwak ea ghoahiitaneey ng'eanyiida sheagi, ak gimeewsi hoowa bea murdeeda mutukwajeagaagu igwari geawiin. Ak gajabwaaspwaasa gheeda siidaang'u haw.

¹⁹ Aniini gaydajaktaneey ak gaydageandeawaneey sugoocheanduumeeda, ak ghaang'aamwaneey heeda iibiiti.

²⁰ Eaweedida abeeda gaydaguursa Eliyakimu was siideanyu bea gadiyeeda was orjeeda Hilkiya.

²¹ Ak gaydeakwealsa niny hang'dida itaang'uun nea gearasi niny ghealoodida bea manandaang'uun, nea ghaadawji hawundida itaang'uun, ak niny gayghoah ghweanda aba heeda fuga Yerusalemu, ea fuga dooshta Yuda.

²² Ak gaydayiin hamarjeadaanyi gisiitina ghuuta gheeh Dawdi. Niny gaygootin ak ea manda siida jea ghwarat, ak gayghwarat, ak ea manda siida jea gootin.

²³ Ak gaydeamajeek niny gawuurji guhuunacheanda mida heeda majeek, ak niny gayghoah hoorgeeda giigheambiita aba gheenyaawa.

²⁴ Nea buweadeagaaschi sean, ghang'eada diibiga ea ghoah fuga hees gayghabwata niny gawuurji dahuuda ea gikoombajeega sighasta aba guhuunacheanda.

²⁵ Ak eaweedida, nih gwarugu NG'UTAMIIDA lugweega, gideaba guhuunacheandida silaksa heeda majeegiin, inyeesa ghwaleakghleakgh, ak gealach ea gang'adeesa ng'eanyi, abeeda sareendida mida badaydaanyiin gajeejakta aba gideaba nih gwarugu NG'UTAMIIDA.”