ISAYA 21 - Bibliyeeda Ghaydit

Geahiimu giibeedeayda Babeli

¹ Nih gisiihiimu gil aba badayda dareapcheeda mida ghuuta basooda. Gawuurji shaarareeda Negebu ghuudu nea gwaleabu dareapcheeda, was ng'eanyiida muy.

² Geahiimnaan ng'asheanda mideawa gharbeeda; geehiimu iita fuga milmili sina ng'asheega milmilanda, geehiimu iita fuga lasa iheenga buuneeda sina ng'asheega lasooda iheenga buuneeda. Ascheang'da aweayeena ng'ucheeda ea fuga Elamu, ak goong'uchi sea fuga Meedi; ASEETA gayghwanung' goosha sawanaduutka ghayi eadu fuga Babeli.

³ Aba badaydeaba gili siihiimuun, ning'udan muuwda muuchi; ea sawanadeeda haw gawuurji dea gatmooda weesa jeata; niraanya sawanadeeda muuchi ea ea mutayiiy gil, neahirbabanyi ea ea mudu dadaah gil.

⁴ Gwateemban uhuudeanyu nea ghang'udan muuwda, geagasayi ghwahita shing'ada iidu nea ghwahita ghaabwaadanyi.

⁵ Geesin heechea eeyeagiischeewa, ak geapwarghaan hang'weaka, amang'ata geeyeagiischi nea geeleeshi. Ang'eatng'eada ea fuga hees, ak ghoayeashchi igeambooniga!

⁶ Aba gideaba gwayeeshiinean NG'UTAMIIDA, “Una ak giyiini furiischoocheanda, ak giyeeshi niny rukuta gidida daahiin.

⁷ Ama inyas ghwadaah fuga ding'da faraasajeega nea gabadiina iyeenya iyeenya ea gea ding'da digeeniga ea gea ding'da ngamiyajeega, abeeda ea daaleaydiit, daaleaydiit muuchi.”

⁸ Hean goojuurda ng'adiida nea gwayi, “Ea NG'UTAMIIDA, aniini inyeesa ghaamiinaadi aba uhuuda madalooda askweari ea eawa nea geasinyi gadiyeedeanyu bea furiischooda.

⁹ Ng'ula, ghapka fuga ding'da faraasajeega, nea gabadiina iyeenya iyeenya!” Ak ghwasha nea gwayi, “Niibeada Babeli, niibeada Babeli; nea eara haleanjeeda sibada sean was aseecheekaaschi sihirjeaweada ak geejaksa ng'eanyi.”

¹⁰ Ea fuga Israeli was fugeasu, ghayi siilealdaneegwa booga, ghamneawa nearukuneegwa ng'asheega aayiinyi aba heeda NG'UTAMIIDA bea lugweega, ASEETA Israeli, nearukuneegwa ng'asheagaaschi.

Gisiihiimu aba badayda Edomu

¹¹ Nih gisiihiimu gil aba badayda Edomu. Ghaayiinyi ghuuta siida guuru aba Seyiri nea gwayi, “Furiischoocheanda nidaahi naaha eawa? Furiischoocheanda nidaahi naaha eawa?”

¹² Hean ghwalamda sugoocheanda ak gwayeesha, “Gaygamuchu ak eara ada gaygamikta. Iyoogasayi oanyaashta ghoanyaashti; abiikni gicha.”

Gisiihiimu aba badayda ng'eanyiida Arabu

¹³ Nih giijasta gil aba badayda ng'eanyiida Arabu. Ea bareanoodiga Dedani, gajalana jeeda dareabeeta ng'eanyiida Arabu.

¹⁴ Ea fuga ng'eanyiida Deema, ayeasiina beega fuga bearji muwooshta ak gooweayi ayeasiina fuga mang'aw hamita, ea fuga ng'eanyiida Deema.

¹⁵ Aba gideaba gamng'aw aba ng'uta, ng'uta sifagu, ea geacheeda sijakta, ea gidang'waanda ng'ucheeda.

¹⁶ Aba gideaba gwayeeshiinean NG'UTAMIIDA, “Aba jeedeaba gwanyagi, nea mayghwanaawda ghana ghoashoay, gaygoosha miyeenooda Gederi;

¹⁷ ak gaygaboos fiisu ng'ay aba jeeda fuga daruuscheew ng'uchi bea Gederi; gearugu NG'UTAMIIDA was ASEETA Israeli.”