ISAYA 19 - Bibliyeeda Ghaydit

ASEETA gayghwalas ng'eanyiida Misri

¹ Nih gisiihiimu gil aba badayda Misri. Ng'ula, NG'UTAMIIDA nidiyeada badayda shamooghooda weah nea ghwalamwajaada gaygawa ea ghwahita Misri; ak gaygaboodani sanaamajeega aba madeadaanyi, ak gayghwanyiit beega jeeda fuga Misri aba giyoonda.

² Ak gaydanung' gang'uchi fuga Misri nea gabwageat, gaygaba siisi ng'uchi sea orjeeda ghaamwat ak gaba siisi ng'uchi sea giischeewoocheandaanyi, mujiini ea mujiini nuut, sugoocheanduumeeda ea sugoocheanduumeeda nuut.

³ Gaydageanda meaynata fuga Misri ak gaydayam gadiyoojiga nyaawa gwachi jea gwasin; gaygaweay goonyeari ng'asheega aba heeda sanaamajeega, ea heeda meanga ea heeda fuga bara lagheanga ea beeneediga;

⁴ ak gaydearuudu fuga Misri ak ghaayiinyi geatinda sugoocheanda ng'waan; muy seara goombal saawa, gwarugu Ng'utamiida, NG'UTAMIIDA bea lugweega.

⁵ Ak gaygoosha beega eenda Nayli, ea eeyi bwak ea ghwajaam eenda ghoah ng'eanyiida ghajaam;

⁶ nea gang'uhu healatka eenda, ak ea maygwanda beega saang'a jeeda maparoojiga Misri ak gayghwajaam, gayghwasis nyeega ea sharahiida.

⁷ Haleanjeeda rinna murdeeda eenda Nayli, ea ghuuteenda Nayli, ea gea sihisa ghuuteenda Nayli abeeda gaygagajeamiidi, ak ghoaraghwaata jeameeda ea goosha.

⁸ Ak gaygooyeawda fuga lealu ghweayeega nea ghang'ut gurmeahiida, gea lealu ghweayeega aba sidageeda ghwarja ghaang'; nea gaygoohiili gea abuutiida gheareedanga jeeda beega.

⁹ Ak gayghwalagaan fuga sina gadiyeeda nabita hang'weaka bumbuni miyaas, ak gayghwalagaan jeesingeaba sean.

¹⁰ Fugiga was daranajeega ng'eanyiidean gajeehirjeaweada ea ghoah banajanga, nea fugiga bea gadiyeeda siitawi lapiyaan gaygagiisan.

¹¹ Fugiga was hees bea mujiineeda Soani nidasheahiidi muuchi, weedanga mideawa weaghuumeeda bea Farao ng'asheega nyaawa marachi gil. Gajoamuustaan ayeeshiina Farao gideaba, “Aniini geawoschi orjeeda gea mideawa weaghuumeeda, orjeeda sugoodigeaba garayi?”

¹² Gwanda yeenu fugaagu mideawa weaghuumeeda? Asi nung'waada saawa gwarukuneey ghamneawa ak ghwanal ng'asheega jea gwasin NG'UTAMIIDA bea lugweega aba badayda Misri.

¹³ Fuga hees bea mujiineeda Sohari nidasheahiidi, ak ea sireengani fuga hees bea Nofu; nea suh was sindeeta eemoojiga nyaawaan ninung' goodiiy fuga Misri

¹⁴ NG'UTAMIIDA niny nijaksa jeeda guroorooda fuga Misri jaliida; ak ghwanung' ghwaramwas fuga Misri aba gadiyoojiga nyaawa sean gwachi jea gwasin ak gawuurji siida boogit weah nea gakees.

¹⁵ Ak ea manda siida was sean aba Misri was meanang'oocheanda ghana siida bwarbwar, siida haw mida madeeda buuneeda ghana siida bea ng'eanyiida jea ghoamu gwasin gil.

Fuga Misri gayghabwat Ng'utamiida

¹⁶ Abeeda eaweedida fuga Misri gayghang'ut giyoonda gawuurji gadeemga, ak gaygaboodani aba muuwda iidaah geatinda NG'UTAMIIDA lugweega nea gooduumduum saawa.

¹⁷ Ak ng'eanyiida Yuda gaygwanda gharbeeda aba heeda fuga Misri. Siida was sean sirukusa iitaanyi gayghang'ut muuwda aba ng'asheanda jea gwasima NG'UTAMIIDA bea lugweega saawa.

¹⁸ Abeeda eaweedida gaygwanda mujiinaji muut aba jeeda ng'eanyiida Misri. Nea gabaloola iita eemeeda Ganaani, ak ghwaak habeawooda aba heeda NG'UTAMIIDA bea lugweega. Mujiineanagi aba jeedeaba suh gajeeguura mujiineeda aseeta.

¹⁹ Abeeda eaweedida gaygwanda heeda wagiida bea NG'UTAMIIDA jeeda ng'eanyiida Misri, ea daraneeda NG'UTAMIIDA mida moonghoadaanyi.

²⁰ Ak hiji bea wagiidean gayghoah gwadeagooda ea muuwuunooda aba heeda NG'UTAMIIDA lugweega aba ng'eanyiida Misri. Aba gideaba gaygoogeal shooka nyaawa heeda NG'UTAMIIDA aba fuga ghabwas saawa ak gajeeyeasa saawa lealnoocheanda jea ghaweat saawa ak ghoaghu.

²¹ Ak gaygwarukuta geaw NG'UTAMIIDA aba heeda fuga Misri, nea ghwanal fuga Misri NG'UTAMIIDA eaweedida ak gajeabwat lukghumeeda, ea haleanjeeda sisabwa geadi bea ghadooweeda sighwarda, ak gayghwaak habeawooda aba heeda NG'UTAMIIDA ak gwasinda ng'asheega gidida.

²² NG'UTAMIIDA gayghwalas fuga Misri, gayghwalas nea ghoahaap. Ama inyas gwayamsa geat NG'UTAMIIDA, gayghamwas gidamus saawa ak ghoahaap.

²³ Eaweedida gaygwanda naweeda haw bea bareanda leabu Misri, ak gawa ea ghwahita Ashuru, ak gaygaweay fuga Ashuru ng'eanyiida Misri nea gaweay fuga Misri ng'eanyiida Ashuru, ak gayghabwat ASEETA fuga Misri ea fuga Ashuru aba hijagi.

²⁴ Eaweedida fuga Israeli gaygaba samwagu sea fuga Misri ea fuga Ashuru. Ak gaygweadu ghawooda badayda ng'eanyiida.

²⁵ Ak gayghoadaw saawa NG'UTAMIIDA lugweega ghawooda nea gwayi, “Gaydagoonyi ghawooda fugeasu bea Misri ea ang'iing'i Ashuru, gadiyeeda geatingeasu, ea fuga Israeli was hearaniischoodeanyu.”