ISAYA 18 - Bibliyeeda Ghaydit

ASEETA gayghwalas uhuuda fuga Gushi

¹ Dashageada ng'eanyiida nyiit nyeashta dabaschoojiga ng'eanyiida mida giigheawda eenda Gushi;

² inyeesa goojeakta giijasoodigaaschi ak gwasik jeeda eenda Nayli, nea inyeesa gaweewa badayda beega aba maleambooda sisna nyeega! Aweayeena ea giijasoodiga hasasi, heeda eemeeda geawi nea bumbuni sasa, fuga inyeesa ghwanung' ghang'ut fih giyoonda, ghang'eada mwadi ea ghoah ghamneawa; eemeeda mideawa uurjeenga, inyeesa ghoalaapta ng'eanyi buuneeda, ng'eanyiida nyaawa ghwalach eeniga bugusta.

³ Ea fuga sean bea ng'eanyiida, ea gea abiita badayda ng'eanyiida, inyas geamiinda beendeera aba iheenga giijeega, abeeda goong'ulay! nea iisighuut durumbeati ghoaleaydiit!

⁴ Aba gideaba gwayeeshiinean NG'UTAMIIDA, “Aniini gaydasiinda ak geang'ulayi nea geandi hoorgeedeanyu eabiiti dang'ula haleanjeeda bunu ak gaydasiinda dawuurji beasta daknooda ng'waan, gawuurji shamooghooda eadu rahooda damanda lajita booga.”

⁵ Aba gideaba nea miighwahita damanda lajita booga, nea ning'ata damanda apta deakghweeda, nea ghwaheas sabiibu, abeeda gayghwalach damealga aba bardida silacha geedigean, ak ghwalach damealgiga dabwaardaan.

⁶ Ak saawa sean gajeanung'wa dariidaka ng'weani bea giijeega ea diyeanga badayda ng'eanyiida. Ak dariidaka ng'weani gaygoobiida badayda nyaawa, nea goobiida dariidaka sean bea ng'eanyiida badahuuka nyaawa damandida bea gooroogeedean.

⁷ Abeeda aba damandida NG'UTAMIIDA lugweega gajeeyeasa haleanjeeda sisabwa geadi bea ghadooweeda leabu heeda fuga geawi bumbuni sasanuuka, fuga mideawa gharbeeda aba mwadi ea ghoah ghamneawa, eemeeda mideawa uurjeenga aleabi buuneeda, ak ng'eanyiida nyaawa ghwalach bugusta eeniga, ea ghwahita giijeeda Sayuni, heeda gheawunga NG'UTAMIIDA bea lugweega.