ISAYA 17 - Bibliyeeda Ghaydit

ASEETA gayghwalas uhuuda fuga Ashuru ea Israeli

¹ Nih gisiihiimu gil aba badayda Dameski. Ng'ula, Dameski maygut ghoah mujiini, gayghoah raghwata.

² Mujiinajeega Ashuru gayghoah dareapcheeda damanda manda muudeanooda; ak gayghoah heeda ruweanga gisilga, ea nooga, ak ea manda siida jea goomuuw.

³ Ak ghamarda gheeda sugoocheanda bea Efraimu gaygoosha, ea sugoocheanduumeeda Dameski; ea boosteanga Ashuru gaygawuurji miyeenooda diibiga Israeli, gwarugu NG'UTAMIIDA bea lugweega.

⁴ Nea eaweedida hawunda fuga Yakobo gajeerareang'u, ak gaygoosha ghashneeda saseadaanyi.

⁵ Fuga Israeli gaygooshealda madamnyeanda silaja booga ak gajeenung' gawuurji siida lach booga, ak gaygawuurji madamnyeanda silach booga ak geenung'usa heeda aba moangoachiyda Refayimu.

⁶ Ak saawa gajeepuusa fiisu ng'ay, gawuurji dayeega siipuutpuudu bea saytuunajeega– gawuurji dayi iyeenya ghana samwagu siipuusa uhuuda damealga mida humng'eeda muuchi. Ghana gawuurji dayi ang'wan ghana muut mida uhuuda damealga geeta jih muuchi gwarugu NG'UTAMIIDA was ASEETA Israeli.

⁷ Eaweedida buuneeda gaygang'ula dea ghayi sin saawa, nea ghaghus dea ghaydit bea Israeli.

⁸ Ak ea maygut gang'ula heeda wagiida was gadiyeeda geatinga nyaawa nea maygut gang'ula gadiyeeda sina geatinga nyaawa was sanaamu bea aseecheeka siguura Asheri ghana heeda wagiida siing'andiit.

⁹ Eaweedida mujiinajeagaaschi mideawa ghamarda majeek gajeenung'usa heeda gawuurji mujiinajeega nung'wa heeda fuga Hiti ea Amori damanda mang'aw aba fuga Israeli, ak haleanjeeda sean gajeadatas.

¹⁰ Aba gideaba nirooseey ASEETA was lealnoocheandaang'u, ak ea mudu apkaada harearacheanda jea mang'awsiina; aba gideaba gihisti madameega miyaas ak gihisi jeeda sabiibaji suuk bea aseeta rabasta.

¹¹ Eara gwachi anung' gwardu ak gwaheetu eaweecheanji oohisteawiin, ak goonung' gooruutu bayriida sakteaweanji; abeeda boogeagwa gaygoosha eaweecheanji bea gurmeahiidean, ea sawanadeeda maygooshean.

Sijoar eemoojiga was weajoodiga

¹² Uu, nyeashta fuga saang'a, ghwanyaashta nyeashta basooda! Uu, nyeashta eemoojiga, ghwanyaashta nyeashta beega saang'a!

¹³ Eemoojiga ghwanyaashta nyeashta beega saang'a, ak gaygoowoowsa saawa, ak gaygwasalda gwasheagiit muuchi, ak gajeahoan gawuurji gidahiniida jeameeda looyda aba uhuuda giijeeda ak gawuurji birjeanda shaarara.

¹⁴ Damandida bea shing'adaan, ng'ula, gwanda giyoonda! Ama aguul nghaghooda, goosha! Nih gichea ghwanyas fuga geanda haleanjeedeanya gil, ea fuga areeteasa haleanjeedeanya.