ISAYA 16 - Bibliyeeda Ghaydit

Moabu mayghwanyas weeta

¹ Ayeasiina dayeega gisilga siida ambal ng'eanyiida, ghang'eada Sela, ea gawa dareapcheeda ea ghwahita giijeeda Sayuni.

² Fuga Moabu gaygawuurji dariidaka deawiit, ng'eat gagal hoowa ea hoowa, gawuurji dariidaka sihoana jeeda ghoorajeega nyaawa aba bunooda eenda Arnoni.

³ Fuga Moabu gwayeesha fuga Yuda, “Agoona gichea eabeada, alaja girgweageedeanya; Oahaada furiischoodeang'wa aba badahuukaasa gawuurji misaneeda misaniit nea gudea askweari gil, afunyeasa aseasa fuga mang'aw, adoorukutaneasa aseasa geemang'awji.

⁴ Anung'waada fuga sihoonu bea Moabu goobiida ng'eang'deang'wa; asina heechea gamng'awsa gwasheagiideewa diita hoonuun. Bwak ea ea mudugwanda diita ghabwasi buuneedean, bwak ea goosha ghabasta, ak ea mudugwanda ng'eanyiida fuga ng'eetiisa buuneeda.

⁵ Ak hoorgeeda sugoocheanduumeeda gajeemajeek aba baydeayda, ak gaygoopteadawa siyagi aba huumeanda aba jeeda maheemajeanda Dawdi nea goorgweachi nea gagasa muuchi gea doobiiweadi ak ea wusis aba sinooda gea doobiiweadi.”

⁶ Siyiinyi iita ghwarjeeda fuga Moabu, gideaba gaba ghwarjeeda haw; ea iita weashweashtaanyi, ea ghwarjeadaanyi, ea nyarastaanyi– weashweashtaanyi mii gili.

⁷ Aba gideaba fuga Moabu gaygooyeawda aba badayda Moabu gaba nih ayeawda ak gajoonyahuusheena aba badayda mukaateeda sabiibu bea Gir-hareseti.

⁸ Aba gideaba madameega Heshboni nisis, eara sabiibooda Sibima; ghayi nung' gaboogit fuga hees bea eemoojiga ea ghwahita Yaseri ak ghwahita dareapcheeda ak ghwadarda damealgaaschi ea ghoaghaawa basooda.

⁹ Asi geayeawdi sea Yaseri aba sabiibooda Sibima; ghaabuutbuuchi dabeaka aba badaydeang'wa, ea mujiinajeega Heshboni ea Eleale; aba hooseaneega lajooda haghweega, hooseaneega lajooda booga ea niisha.

¹⁰ Ak ghweelmeeda ea hooseaneega madameega jih muuchi ea mudugwanda; nea mudugwanda sarmeeda aba jeeda madameega sabiibu, ghana nyeashta ghweelmeeda; maygudu eemuuru difaayi ghuuta ghweelmeeda lajooda booga niisha.

¹¹ Asi gurooroodeanyu gooyeawda aba badayda Moabu, gawuurji durumbeati, ak jeedeanyu gooyeawda aba badayda mujiineeda Gir-heresi.

¹² Fuga Moabu inyeesa gaweay nea ghabwatgeat ghamwaash aseeta nyaawa aba uhuuda giijeeda ak iissa iiwea headaanyi ghaydit ghamwaash aseeta, ea maygwajooriischi.

¹³ Nih ng'asheanda ghayi rugu NG'UTAMIIDA gil aba badayda Moabu.

¹⁴ Ak ghamneawa gwayi NG'UTAMIIDA, “Aba jeedeaba gweanyeew samwagu gawuurji gweanyeeka siida gadiyeeda, abeeda miyeenooda Moabu gaygoosha, earapeadi fugaaschi saang'a, boosteanga gajea ng'ay muuchi ak ea maygwanda uurjeenga.”