ISAYA 14 - Bibliyeeda Ghaydit

Biiknooda fuga ghayi siipaleak

¹ Aba gideaba NG'UTAMIIDA gayghabwayda fuga Yakobo, ak gayghwaloat gicha Israeli, ak gayghoadealda jeeda ng'eanyiida nyaawa nea gabwageat ak gayghapka rabasta ak gwandeayi sea fuga gheeh Yakobo.

² Fuga eemoojiga gayghaweat fuga Israeli gabiikta ng'eanyiida ghayi adaw NG'UTAMIIDA. Ak aba hoowa gaygagadiiyeesa fuga Israeli gawuurji soomjooga gadeemga ea headiga. Ak fuga ghayi abaleak gayghoah fuga ng'uta aba heeda fuga ang'waay ak gaygoombal fuga ghayi ghabwas.

Sugoocheanda Babeli gwanda jeeda ng'eanyiida fuga nimeewa

³ Ak eaweedida NG'UTAMIIDA gaygagoonyi miyeenooda iing'ata gurmeahiidaang'u, ea iing'ata sawanadeadaang'u, ea iing'ata gadiyeeda ghayi hang'waay sinung' sinean,

⁴ Gaysarmana ak gishadayi sugoocheanda Babeli nea giyeeni: “Geanung' sugoocheanda ghabwas fih, ak ea maygudu gabiikta gwasawan buuneeda.

⁵ NG'UTAMIIDA nihirja bileangida fuga munyas, nihirja bileangida ambaliischeata sugoocheanda,

⁶ Ninyeeda ghayi bwar eemoojiga aba nyarasta aba bayiiga mamuudeana, ak goombal eemoojiga aba nyarasta siyaaga ghoorjooda nea manda siida jea ghwaadeal.

⁷ Ng'eanyiisean goobargiishi nea gaba seayu; gaba siisi sarman aba hooseaneega.

⁸ Gahoosan geediga siguura hoonyaweanda aba giibeedeaydaang'u, ak gwayi gubooyeeka Lebanoni, ‘ghang'eada dea sibwaanyaneey, manda siida laja geediga nigalu heedeanyu.’

⁹ Nihirbaban gheeda maloonghajeega aba badaydaang'u, ak ghwadeaptaneey inyas gihidu, ak geaheat fuga nimeewa ghapka googeacheeweey, ea fuga hees sean ghayi bea badayda ng'eanyiida; ak ghwanung' ghang'eat ng'eat sugoodiga sean bea eemoojiga aba badahuuka hoorgajeega nyaawa bea sugoocheanduumeeda.

¹⁰ Ak gayghwasha ghuutaang'u sean nea gwayi: ‘Ak eara ang'iing'i ea ning'arng'ariidi uurjeewaneasa! Ak eara ang'iing'i ea niwuurjeewaneasa!’

¹¹ Miyeenoadaang'u siiraraang'da ea ghwahita gheeda maloonghajeega, ea ghuuta nyeashta gidoondoorajeagaagu; ghuughuutka gayghoah muundaang'u jea bwada, nea habeergweega gayghoah hang'daang'u jea akweala.

¹² “Ang'iing'i geeng'adeateaydaneeyiin aba humng'eeda, Ea miing'weanda Muchuunooda, orjeeda Sakteayda Geanung' abeadaaydaan, ang'iing'eeda ijoari eemoojiga!

¹³ Giyeeni aba jeadaang'u, ‘Gaydadiyeada ea dahita humng'eeda; gaydamiinda hoorgeedeanyu ea ghwanaawa hoowa miinga ASEETA; ak gaydeapteada aba uhuuda giijeeda siroondooscheesa mida wiilooda ng'eanyiida ghayeawa;

¹⁴ gaydadiyeada ea dawa badayda shamooghuutka, ak gaydahinda geaw ASEETA haw.’

¹⁵ Gajearraraang'daneay ea hita gheeda maloonghajeega, ea hita uuta shoomanda.

¹⁶ Nea fuga daanyi gaygoomajeekseey gheanyanga, gayghahamng'eanyi nea gwayi: ‘Nih dea ghayi nung' ghwaduumduum ng'eanyiida, nih dea ghayi aduumduum sugoodigea,

¹⁷ Deaghayi nung' gawuurji ng'eanyiida dareapcheeda ak ghwalas uhuuda mujiinajeagaaschi, ak ghaheawa gwasiksa fugaaschi mida ghealooniga gaweay gheanyaawa?’

¹⁸ Sugoodiga sean bea eemoojiga geebuy sean aba mureeda, Gaba nih sibung'sa jeeda bung'eadaanyi;

¹⁹ Nea ang'iing'i ea sijaktaneey, eang'aamwaneey heeda bung'eadaang'u, gawuurji baleanda sijakta jeeda, siji nea nimi, gawuurji hang'weaka giika sibwariin was giika sibwara ng'utean, giika rarang'aada ea ghwahita sindeeta mida uuta lagheaneedean, ak gawuurji muscheeka siileapsa ng'eanyi.

²⁰ Ak ea majeebung'seey hijagi sea saawa aba jeeda bung'eeda, aba gideaba nilasi uhuuda ng'eanyiidaang'u, ak ea ninuusi fugaagu. “Jeacheenga jiilu gea munyas mwajeapkaat earahay!

²¹ Ootiing'diing'da heechea eenuuksa orjoagaaschi aba badayda ng'asheega munyas bea ghweaniga nyaawa, gajiidu ghapka ak goombal ng'eanyiida, ak ghwanyiit mujiinajeega badayda ng'eanyiida.”

ASEETA gayghwalas uhuuda Babeli

²² “Gaydang'eat dang'uchi saawa,” gwarugu NG'UTAMIIDA lugweega, “ak gaydeaheeli sea Babeli ak ghaalaschi uhuuda haleanjeeda sean eara boosteanga, mayghoabit diibiga ea gea duu eeji, gwarugu NG'UTAMIIDA.

²³ Ak ng'eanyiini gayghoah heechea goobiita usibicheanda, ea dabaschoojiga beega, ak gaydeabuus deasheagiit aba gheabuuscheanda jea dalas uhuuda, gwarugu NG'UTAMIIDA bea lugweega.”

ASEETA gayghwalas uhuuda Ashuru

²⁴ NG'UTAMIIDA bea lugweega ghwaak habeawooda nea gwayi: “Aba huumwa gidaneabatiidi sinooda, gaydasin, nea gidaneamanyiidi, gaygwasa,

²⁵ gaydahirjeaweada uurda Ashuru aba jeeda ng'eanyiideanyu, ak gaydealeapsa ng'eanyi aba iheenga giijeegeasu; ak gaydageandeawa fugeasu yookeeda sighabwasa saawa, ea sareenda sawanadeeda nyaawa mida gheatkweaka.”

²⁶ Nih gidamanyiida NG'UTAMIIDA gil aba badayda ng'eanyiisean; nih bileangida jea ghwalasa eemoojiga sean gil.

²⁷ Aba gideaba iinimanya NG'UTAMIIDA lugweega, abeeda gayghwayam ng'eaha gida nimanyiida? Ak iigasa ghwalas buuneeda, abeeda gayghoadeal ng'eaha geatindaanyi?

ASEETA gayghwalas uhuuda fuga Filisti

²⁸ Giijasi ghwahidu gweayda meawa sugoocheanda was Ahasi:

²⁹ “Adoohoosanyi oogasean, Ea fuga Filisti, aba gideaba bileangida ghayi silasaneey nigiinya, aba gideaba ichibooda gaygwaji ichibootuw mideawa furooda, nea ichibooda mideawa furooda gwaji ichibooda ng'eetiida mideawa beasta.

³⁰ Nea duweachajeega fuga barbari gaygwalang'uudi, nea fuga mandeawana gil gaygoobiitpiit nea gaba seayu; ak gaydabwar diibigaagu aba jalooda, ak gaydabwar eara boosteangaagu.

³¹ Aguula Ea ghuuta dooshta, ayeawda Ea mujiini; anung' ghwanyiit jeesingeagwa beega aba giyoonda Ea fuga sean bea Filisti! Aba gideaba ghwahidu aroosta leabu wiilooda ng'eanyiida ghayeawa, ak ea manda dea jea ghwashing'da aba lugoadaanyi.”

³² Gajeashaaha naaha ghuuta fuga siicheagu bea eemoojiga? “Gajeeyeesha gideaba NG'UTAMIIDA nideas nea goomajeek sindeeta Sayuni, ak fugaaschi ghayi sighabwas gaygamng'awsa hoowa.”