ISAYA 13 - Bibliyeeda Ghaydit

ASEETA ghwalas Babeli

¹ Nih giidaheachta daah Isaya gil was orjeeda Amosi aba badayda Babeli.

² Asi amiinda beendeera aba uhuuda heayeeda manda geediga, ooyeawusiina saawa aba ghuuta haw; ak googuursi buuneeda ghapka gidaghuuta mujiineeda fuga hees.

³ Aniini nearukusi fugeasu ghayi siikghaydiit, neaguursi fugeasu meanyi aba nyarasteanyu, fugeasu bwat gheawungeasu.

⁴ Oaleaydiit nyeashta mida iheenga giijeega gawuurji nyeashta eemeetuw! Oaleaydiit nyeashta sugoodiga, gawuurji gea eemoojiga bwatgeat! NG'UTAMIIDA lugweega gwasikteawa lugooda jea gaweay ng'ucheeda.

⁵ Fuga leabu ng'eanyiida sheagi, nea gwaleabu apeega ng'eanyiida NG'UTAMIIDA gaygweadu dabita nyarastaanyi ghwahidu ghwalas uhuuda ng'eanyiisean.

⁶ Ooyeawda aba gideaba eaweeda NG'UTAMIIDA nineekiit; gayghwahitaayda giishealda leabu heeda ASEETA hoauur!

⁷ Asi gaygang'arng'ariidi geatinga sean, ak gaygaba siisi bur uhuuda,

⁸ buuneeda gaygwahirbaban. Ak gayghang'ut muuwda ea sawanadeeda; nea ghoang'waay lajooda gawuurji gatmooda hita damanda jeata. Gaygoomuriitiisa geat gheanyanga; gheamamuunatka nyaawa gaygawuurji beasta aba baspaseega.

⁹ Ng'ula, eaweeda NG'UTAMIIDA ghwahidu, eaweeda ng'waan bea nyarasta ea nyarasta ng'waan, ak gayghwanung' ghang'ut ng'eanyiida salgheang'da nea ghwalas uhuuda fugaaschi bea riing'eega ghabeawa jeeda.

¹⁰ Nea miinga humng'eeda ea ijeayeega ea maygooboong'u ak aseeta eara goorearu mayghoabwaay ng'eanyiida nea eara sheeda ea maygwanda weeshinda.

¹¹ Gwayi NG'UTAMIIDA gaydalas uhuuda fuga ng'eanyiida aba riing'eeda nyaawa, ea gea sina ng'asheega munyas, ak gaydanung' goosha miyeenooda fuga ghwarjeeda nea gearareang'u weashweashta fuga ng'weani jeesin.

¹² Gaydanung' gang'ayiit buuneeda ea ghang'al dahaabooda miyaasiin siguura dahaabu, nea giliwas sih ghang'al dahaabooda Ofiri.

¹³ Asi gaydanung' gwaduumduum humng'eeda, nea gwasaw ng'eanyiida ghang'amwa hoorgeadaanyi, aba nyarasta NG'UTAMIIDA lugweega aba eaweeda nyarastaanyi ng'waan.

¹⁴ Abeeda gaygawuurji mayeanda simuuw, ak gawuurji gisilga manda jeagiischoocheanda, ak gaygaba siisi yamgeaw gabiikta heeda fugaaschi, nea gaba siisi fwach gabiikta ng'eang'da nyaawa.

¹⁵ Siida was sean siroonyi geang'ut, nea dea siing'waay geabwar aba ng'uta.

¹⁶ Nea diibiga nyaawa manang'i gajeenuuseada aba madeanyaawa, gealga nyaawa gayghoah rabadanga nea geabwaanyaada gadeemga nyaawa.

¹⁷ Ng'ula gaydeang'eesa saawa fuga Medi, fuga mamanyeewana gil lapiya nea mahoosana aba dahaabu siguura dahaabu.

¹⁸ Gheareemanga gajeabwar aba geatka; ak ea mayghabwayda diibiga; nea majeabwayda eara ghameeka manang'i

¹⁹ Ak Babeli ea giigheambiita sugoocheanduumeeda, ea leanga ea weashweashta fuga Galdayo gajeanung' gawuurji gidaghayi lasta ASEETA ng'eanyiida Sodoma ea Gomora.

²⁰ Nea manda siida jea goobiida jeedida ea gagul jeacheenga sean; nea Arabajeanda ea mayghamiinda maheemajeandaanyi aba hoowa, nea eara jeagiischoodiga maygooluula hoowa nooga nyaawa.

²¹ Ak hooweani gaygoobiita diyeanga ng'weani bea dareabeeta, gealga nyaawa gayghwanyiit jeeda udahiihiida; nea goobiida hoowa eara shageergweega, nea ghang'was beeneediga aba hoowa.

²² Gaygooyeawda suuyeeka aba badahuuka gealgaaschi, nea gooyeawda fureayoonga aba jeeda gealga miyeeni, ak nea askwearjoojigaaschi ea maygudeahaat.