ISAYA 11 - Bibliyeeda Ghaydit

Sugoocheanduumeeda hoyyoo

¹ Asi gaygwarina damealeanda gumdooda Yese, ak gaygwarina damealeanda hawungaaschi.

² Ak gaygoobiida guroorooda NG'UTAMIIDA badaydaanyi, guroorooda weaghuumeeda ea fughareeda, ea guroorooda baloolda ea dea uurda, ea guroorooda fughareeda ea gheawalmeeda NG'UTAMIIDA.

³ Nea hooseaneagaaschi gaygwanda jeeda gheawalmeeda NG'UTAMIIDA. Nea maygoorgweaksa gida daah aba gheanyangaaschi, ghana gida iiy aba iidigaaschi;

⁴ ak gaygoorgweaksa fuga barbari aba doobiiwnata, nea ghamiin gheang'da fuga eada geat ng'eanyi bea ng'eanyiida, nea ghwalas ng'eanyiida; aba ng'asheanda leabu ghuutaanyi, nea gwanuuseada fuga munyas aba jeameeda leabu ghuutaanyi.

⁵ Doobiiwnata gayghoah ghealooda manandaanyi, ak doobiiwnata gaygoobiida headaanyi gawuurji ghealooda sirasa manandaanyi.

⁶ Gaygwandeayi suuyeanda sea dayeenda gisilleanda, mariirda gaygaweay ruweanga sea dayeenda mbooyda, meayda gayghoajeada sea ng'adiida, nea haghweeda gawa baleanda mwanang'.

⁷ Gayghoajeada deeda sea idamooda aba hijagi; nea muhooga nyaawa gaweay ruweanga aba hijagi; ak ng'adiida gayghwaakta nyeega deeda.

⁸ Jeepta mwanang' duu gwareer gaygawadean aba ghuuta shoomanda ichibooda, nea baleanda duu ghoabuut gineeda gayghoabuuta geatindaanyi jeeda shoomanda ichibootuw.

⁹ Mayghwanyas gidamuy ghana giishealda aba uhuuda giijeedeanyu ghaydit; aba gideaba gayghwanyiit ng'eanyiida fughareeda NG'UTAMIIDA gawuurji ng'eanyiida gayghwanyiit nalooda gidanyiita beega basooda.

Fuga ghayi balak gaygabiigu

¹⁰ Ak eaweecheanji damealeanda Yese ghamiinaada ghoah gwadeagooda aba heeda fugaaschi; ak gaygagasa eemoojiga niny, nea heeda abiita niny gajea ghaambiidaat.

¹¹ Ak eaweecheanji Ng'utamiida gayghoahaakta geadi gicha goodeelu boosteangaaschi mida Ashuru, ea Misri, ea Batirosi, ea Gusi, ea Elamu, ea Shinari, ea Hamati, ea ng'eanyiida mida ghuuta basooda.

¹² Ak gayghamiiinda beendeerajeanda goohiimsa eemoojiga gideaba gayghoawaam fuga Israeli ghayi siitaarda, nea ghabwada geat fuga Yuda ghayi darda mida meadajeega asang'wan sean bea ng'eanyiida.

¹³ Geawunda gheang'da Efraimu aba badayda Yuda gaygoosha, nea maygudugwanda furjeeda aba heeda fuga Yuda ea Efraimu.

¹⁴ Ak gaygwadeambiirsa hamarjoojiga fuga Filisti mida heeda biyeara, ak ghwabwada nih gayghaghas eara fuga mida meatkweeda ghayeawa. Gayghoahaakta geatinga nyaawa ghoang'waay Edomu sea Moabu ak gaygwasissa fuga Amoni mureeda.

¹⁵ Nea aba NG'UTAMIIDA gaygwanyarja ghuuta basooda Misri; ak gayghamiinda geatindaanyi aba uhuuda eenda nea aba jeameadaanyi ng'waan, ghwalas ghwadarda ghoah ghuusiga ispwa ak ghoaghaawa buuneeda ng'eanyiida ghajaam.

¹⁶ Ak gaygwanda naweeda bareanda leabu Ashuru bea fugaaschi ghayi boos aba hoowa gawuurji aba damanda ghayi bea fuga Israeli damanda rinna ng'eanyiida Misri.